1 ತೆಸಲೊನಿಕ್ 4 - गवली उनाई नियम

पवित्रता गा घल्जी कोखेंज

¹ इनिघल्जी हे विश्वासी डाईचो, आपेनी आलेटे इथूके होय कि तुनिरोंगो परमेश्वर के कुखोशो होना एठा टोनोगो व्यवहार दडा होना एठा डीका खिजाटे आपे जीवन बिबातातिंज भी लक्के होय। एठा नका आले प्रभु यीशु गा जीमू टे बिनती दडावा होय, कि इनी विषय गेन आपे सेबाई येठाभी बळातिंजू लक्कू।

² चोयाकी आपे डी हुकूमनौर के हाडाई होय, जो प्रभु यीशु मसीह गा हुकूम टे आलेनी आपेके जीके होय।

³ परमेश्वर चाहतावा होय कि आपे चोखरा आरोए एठा आनोवा टे बचतिंज्कु।

⁴ हार म्या कोरो हेजा जापाएटे गा सेंग्गोन पवित्रता एठा आदर भाव गा सेंग्गोन थंदळ हाडाईयु,

⁵ आपना इच्छा गा गुलाम बाकी आरु जो येनोगो कुरकू खिजा होय जो परमेश्वर के बान हाडाई होय।

⁶ इनी बातो गेन, तुनिका कोरो हेजा विश्वासी डाईके धोका बाकी जिऊ, एठा न दियागा फायदा टूले। आलेनी आपेके पेलाका इनी चितातिंज्केमी डा एठा खाट्टेका हुशारकेमी डा कि प्रभु येनोगो दडामिंकू के दण्डो जेबा।

⁷ परमेश्वर नी आलेके बिसोटो टे जीवन बिबातातिंज घल्जी बाने पेनो पवित्रता गेन जीवन बिबातातिंज घल्जी हाकोकेमी होय।

⁸ इनिघल्जी, जो जेकाभी इनी शिक्षा के बेकार मेंबा होय, डीच कोरोकु के बाने पेनो परमेश्वर के आरागेच्बा होय, जो आपेके हेजा पवित्र आत्मा जिऊवा होय

प्यार एठा कामय

⁹ आपना विश्वासी डाईचो टे प्यार दोडो गा बारेन इंजेन जरुरत बाऊ, कि आपेके चोच्का ओले। चोयाकी आपे-आपेन का प्यार डोकी आपेनी-आपेका परमेश्वर टे इथूके होय।

¹⁰ आपेनी पेलाका आपना प्यार आपना विश्वासी डाईकु गा बारेन टिपीके होय, जो सेबाई मकिदुनिया जिल्हा गेन होय। इनिघल्जी हे विश्वासी डाईचो, आले आपेटे बिनती दडावा होय। कि आपे प्यार गेन बळातिंजेका।

¹¹ जैसा कि आलेनी पेला आपेटे मंडीके डा, दूसराकु गा घल्जी समस्या वाजा बाकी आरु शांती पूरा जीवन बिबातातिंज घल्जी के आपना मकसद आरोए, आपना-आपना कामय काजो गा कोनेन ध्यान येंडाए, एठा आपना-आपना टी टे ककामय गा कोशिश डाए।

¹² इनी खिजा आपे दिकुटे आदर घाटाए चाले जो विश्वासी बाऊ होय, एठा आपेके इकुगा जरुरत घल्जी तुनिका कमी बाकी डाऊ।

मसीह गा डाबोलटे हेजे

¹³ हे विश्वासी डाईचो, आलेन लगातिंजुवा होय, कि गोएन मिंकू कुरकू गा बारेन आपेन पक्काटेका मालूम होय, तोटेनका येनोगो बाकी डाऊ कि आपे डी कुरकू खिजा शोक मनातिंजे, दिकुन तुनिका आसा बाऊ होय कि गुजू गा बादोन दिकु डाबोलटे जीटाऊवा।

¹⁴ आले विश्वास दडावा होय, कि यीशु गोएन एठा डाबोलटे गोएन मिठाच जाटे जीटाएन, एठा इनिघल्जी आलेन इनी विश्वास होय कि परमेश्वर दिकुके भी जो यीशु लिंजेन विश्वास डोके लठ्ठाका गोएन होय, यीशु गा द्वारा एठा दियागा का सेंग्गोन साकुवा।

¹⁵ नका आलेन प्रभु टे जो शिक्षा घाटाएन होय, डेगा आधार लिंजेन आले आपेटे इनी मंडीवा होय। आले जो जीटाका होय एठा प्रभु यीशु गा हेजे टाएन बचातिंज थंदळवा, मसीह गेन गोएन मिंकूटे पेला महिमा गेन मुगू बाने।

¹⁶ डी टेमो ललकार गा सेंग्गोन आदेश एठा याजक स्वर्गदूत गा आवाज एठा परमेश्वर गा पिंगी गा आवाज आजुमूबा, एठा प्रभु खुद स्वर्ग टे इटान आगुरुवा। एठा जो मसीह गेन गोएन मेना होय, दिकु पेला जीटाऊवा।

¹⁷ मेटे आले जो डी टेमो जीटाका एठा बचातींज्का थंदळवा, दिकुगा सेंग्गोन बदळा लिंजेन ठुलूबा, कि बादळा गेन प्रभु टे मिलातिंजुवा। एठा इनिका रिती टे आले हमेशा प्रभु यीशु गा सेंग्गोन थंदळवा।

¹⁸ इनिघल्जी इनी बातो टे इनिज-दियाटे होशला जिऊ लक्कू।