1 पतरस 5 - गवली उनाई नियम

खाळु गा ताठ्या

¹ अदा येनोगो बातो होय, जो इंज डेगा जुनाकु टे मंडी चाहतावा मेना, चोयाकी इंजभी आपेगा खिजा म्या जुना सनाकु होय। इंज्नी खुद डी कासुके डोके होय, जो घोनेच टेमो पेला मसीह नी सेहेनके। जब डीच डाबोलटे हेजेवा, मेटे इंजभी दियागा महिमा गेन बेल्लाऊवा।

² नका इंज आपेटे बिनती दडावा मेना, कि विश्वासीकु गा डी खाळु गा देखभाल डाए, जो परमेश्वर गा होय, एठा डीचके आपेके देखभाल गा घल्जी जीकेनेच होय। इनी मजबूरी टे बाने, पेनो परमेश्वर गा इच्छा गा रोंगो खुशीटे डाए। आपे इनी कामय डामा गा ललिचो टे गा घल्जी बाकी दडा पेनो परमेश्वर एठा कुरकू गा सेवा दडा गा इच्छा गा सेंग्गोन डाए।

³ जो कुरकू आपेके जिकेकु मेना होय, डी कुरकू गा मठान म्या राजो मिठाच गा खिजा बाकी आरु, बनकी दिकुगा घल्जी म्या अच्छा उदाहरण आरोए।

⁴ चोयाकी जब यीशु मसीह, जो कि आलेगा याजक ताठ्या होय, डाबोलटे हेजेवा, मेटे आपेके म्या पुरस्कार जेबा, जो चोलाकाभी हेजे गा चमकातिंजू बान आट।

परमेश्वर के समर्पित दडा एठा शैतान गा विरोध दडा

⁵ इनी खिजाटे आपे जवाननौरकु, जुनाकु गा हात टाल्लेन थंदळे, आपे सेबाईकु गा सेबाईकु आरी गेल्ला गा सेंग्गोन इनिज-दियागा सेवा डाए। चोयाकी जेकाभी पवित्र ग्रंथ गेन पळातिंज सकतावा होय, “परमेश्वर घमंडीनौर कुरकू गा विरोध दडावा होय, पेनो दिननौर लिंजेन कृपा दडावा होय।”

⁶ इनिघल्जी, आपना खुदके परमेश्वर गा सम्मान नम्र डाए, जो रक्षा दडा गेन ताखातदार होय, ताकी डीच सही टेमो लिंजेन आपेके भेबावटेका सम्मन जेबा।

⁷ परमेश्वर के आपना सेबाई परेशानीनौर एठा चिंतानौर परमेश्वर लिंजेन येंडाकी, चोयाकी डीच आपेगा परवाह दडावा होय।

⁸ चताराय थंदळे, एठा झाटटो थंदळे, चोयाकी आपेगा दुश्मान शैतान बरसातिंजू मिठाच कुला गा खिजा आपेगा तलाश गेन इखाट थंदळवा ताकी आपेगा नशो डाकी।

⁹ मजबूत विश्वास गा सेंग्गोन दियागा सामना डाए, चोयाकी आपे हाडाई होय, कि इनी दुनिया गेन आपेगा सोप्ती विश्वासी इनिका खिजा आपेगा का रोंगो कासु भोबगातिंज लक्के होय।

¹⁰ परमेश्वर जो पूरा खिजाटे कृपा टे भेट्टिके होय, डीचनी आपेके यीशु मसीह गा सेंग्गोन आपेगा म्याजुट गा वोजीटे दियागा अनन्त महिमा गेन बेल्लाऊ घल्जी आपेके हाकोलेमी होय। डीच आपेगा थोळाका टेमो टाएन कासु भोबगातिंजा गा बादोन आपेके भेट्टिटे आरुकोम्बा ताकी आपे तालाटे जेका दोष बाकी थंदळ, डीच आपेगा दिल के मजबूत डाएवा ताकी आपेगा विश्वास दिया लिंजेन पक्का आरुयु।

¹¹ डीच हमेशा गा घल्जी शक्तीशाली रुपोटे राजो डाएवा। आमीन!

आखरी नमस्कार

¹² इंज्नी काकोडो गेन आपेके इनी पत्र ओल्के होय, सिलवानुस गा मदत टे ओल्के एठा आपेके कुलके होय। इंज डीचके मसीह गेन म्या विश्वास लायको डाई गा रुपो गेन मनातिंजेच्बा मेना। इंजागा इनिके ओलगा मकसद आपेके आरी घल्जी एठा आपेके सजाका दडा होय, कि जो चोच्काभी आपे अनुभाव दडा लक्के होय, डी आए टेमोन आपेगा प्रति परमेश्वर गा कृपा गा हिस्सा होय, इनी कृपा गेन मजबूत थंदळे।

¹³ बेबीलोन शहर गा विश्वासी कुरकू आपेके अभिवादन दडावा होय, दिकुके परमेश्वर नी कलामकेकु होय, जैसा डीचनी आपेके कलामकेमी डा। एठा मरकुस, जो इंजा घल्जी म्या कोण गा खिजा होय, डीच भी आपेके अभिवादन दडावा होय।

¹⁴ इनिज-डीचके आए टेमो प्यार टे नमस्कार डाए, कि परमेश्वर डी हर कोरो के शांती जे चाले, जो मसीह गा होय।