1 पतरस 3 - गवली उनाई नियम

जापाएकु

^1-2 हे जापाएकु, आपे भी आपेगा सानाकु गा हात टाल्लेन थंदळे। ताकी अगर दिकु तालाटे जेकाभी परमेश्वर गा वचन लिंजेन विश्वास दडा टे इंकार दडावा होय, मेटे जो खिजाटे आपे जीवन बिबातातिंज्बा होय, डीच आपेगा चोच्का मंडीके बिना का दिकुके विश्वास दडा गेन मदत डाएवा। जब दिकु चोखरा चाल-चालन के डोगेवा, मेटे दिकु मसीह लिंजेन विश्वास डाएवा।

^3-4 आपेगा सोबा सिर्फ दोडो गा का बाकी होना, जैसा हुफ कोखोट, सोना गा बर्तन या कपळेनौर टे सिंगरु, पेनो आपेगा उखु मिनी कोरोपन नम्र मन गा आरी जैसा अविनाशी गुणनौर टे सिंगरके मेना होय, जो परमेश्वर गा नजर गेन किमती होय।

⁵ जुना जमानान थंदळ मिंकू जापाएकु भी, जो परमेश्वर लिंजेन आसा दोडो डा, इकु खुदके इनिका रिती टे सिंगारवा एठा आपना-आपना साना गा हात टाल्लेन थंदळ डा।

⁶ जैसा सारा अब्राहम गा हुकूम ममानातिंज डा, एठा डीचके स्वामी मंडी डा। जब आपे भी भलाई डाएवाका एठा तुनिका रोंगो गा हिगरा टे हिघराऊ बाने, मेटे आपे सारा गा कोंजाईकु गा खिजा आरुवा।

साना

⁷ डेनोगोका हे सानाकु, आपे भी जापाएकु गा सेंग्गोन समझदारी टे थंदळे, एठा दिकुगा ध्यान डोए, चोयाकी दिकु आपेटे कामजोर होय, इनिघल्जी आपे दिकुगा आदर डाए। इनी समझातिंजटे कि आलिंज बार्खिंज जीवन गा कृपा गा वारिश होय, देटे आपेगा प्रार्थनानौर आजुमजा होना।

आशीर्वाद गा वरिश आरु गा हाको

⁸ आखरी गेन, इंज आपे सेबाईकु टे इनी मंडी चाहतावा मेना, कि म्याका थंदळे, एठा इनिज-दियागा प्रति सहानुभूति डोए, इनिज-दियाटे डाईचो-बोकाजाईचो गा खिजा प्यार डाए, इनिज-दियागा प्रति करुणामय, एठा इनिज-दियागा सेंग्गोन नम्र आरोए।

⁹ बुराई गा बेदला बुराई बाकी दडा, एठा न आराम गा बेदला आराम जे, पेनो येनेगा बेदला आशीर्वाद का जे चोयाकी परमेश्वर नी आपेके इनिघल्जी का हकोलेमी होय, अगर आपे येनोगो दडावा होय, मेटे परमेश्वर आपेके भी आशीर्वाद जेबा।

¹⁰ चोयाकी पवित्र ग्रंथ मंडीवा होय, “अगर तुनिका कोरो हेजा जीवन गा खुशी सा चाहतावा होय, एठा अच्छा दिन दोडो चाहतावा होय, मेटे डीच बुरा बातो एठा धोका गा बातो बाकी मंडी।

¹¹ डीच बुराई दडा आराकी, एठा भालाई का डाए, डीच दूसराकु गा सेंग्गोन मिलातिंजू गा सेंग्गोन थंदळ गा घल्जी कोशिश डाए।

¹² चोयाकी प्रभु गा नजर धार्मिकू लिंजेन येंडाका थंदळवा होय, एठा दियागा लुटूर दिकुगा प्रार्थना गा कोनेन येंडाका थंदळवा होय, पेनो प्रभु बुराई दडामिंकू टे म्वार म्याधेळेनेवा होय।”

भलाई दडा गा वाजा सताव

¹³ अगर आपे हमेशा भाला कामय दडा गा कोशिश दडावा होय, टासो मेटे जेकाभी आए टेमोन आपेके कासु बान जिऊ साकता।

¹⁴ पेनो अगर आपे धार्मिकता गा कामयनौर गा वोजीटे कासु भी टूलेवा होय, मेटे आए टेमोन आपे धन्य होय, डेनोगोका डाए जैसा परमेश्वर गा कोनेटे मंडीमिंकू यशायाह नी ओल्के डा, “डी कुरकू टे बाकी हिगरा, जो आपेके हिघरावा होय, न दिकुटे हिघराए।”

¹⁵ पेनो मसीह के प्रभु चिनाटे आपना दिल गेन श्रध्द डोए, एठा जो जेका आपेटे आपेगा आसा गा बारेन चोच्का कोम्बाराए, दिकुके विनम्रता यानेकी आदर गा सेंग्गोन जवाब जिऊ गा घल्जी हमेशा तैयार थंदळे।

¹⁶ एठा दिमाग भी सपा डोए, इनिघल्जी कि जो बातोनौर गा बारेन आपेगा बदनामी डाऊवा होय, डेगा बारेन दिकु, जो मसीह गेन आपेगा अच्छा चाल-चालन गा अपमान दडावा होय, सेरोमके होय।

¹⁷ चोयाकी अगर परमेश्वर गा इनिका इच्छा होय, मेटे बुराई दडा गा वाजा दण्डो भोबगातिंज गा अपेक्षा भलाई गा वाजा कासु सेहेसेन चोटोका अच्छा होय।

मसीह गा कासु

¹⁸ इंज इनी इनिघल्जी मंडीवा मेना, चोयाकी मसीह नी भी म्या बार का आलेगा पापो गा वोजीटे कासु सेहेनके एठा डीच धर्मी मेंटो भी, आले अधर्मिकू गा घल्जी गोएन, ताकी आलेके परमेश्वर गा मेरान सालेमी होना, डीच कोम्बोर गा तौरेन, मेटे गोएन पेनो पवित्र आत्मा गा शक्तीटे डाबोलटे जीटाकेनेच मेना।

¹⁹ मेटे दियागा आत्मा नी ओलेडो डी आत्मानौर के अच्छा खाबोर गा प्रचार डाके, जो डी जगा लिंजेन परमेश्वर गा द्वारा केटकेनेच मेना डा, देटेन गोएन कुरकू गा आत्मानौर होय।

²⁰ इनी डी कुरकू गा आत्मानौर डा, दिकुनी डी ओले टेमोन हुकूम बान आजुमडूका डा, जब नूह हेजा डोंगा के आरु लक्के डा, मेटे परमेश्वर आराम्बोटे राह दोडो लक्के डा, कि डोगे चोच डी कुरकू मन बदलाएवा, पेनो सिर्फ इलार कुरकू के डी भयानक आडीन नामुजूटे बचातिंजकेकु।

²¹ इनी बपतिस्मा गा साबुत होय, जो नका आपेगा उध्दार दडामिठाच होय, बपतिस्मा गा मतलब कोम्बोर गा मेलो अबुंज बाने, बनकी सपा दिल टे खुदके परमेश्वर गा प्रति समर्पित दडा होय। इनी बपतिस्मा यीशु मसीह गा गोएन मिठाच जाटे जीटाऊ गा द्वारा आलेगा उध्दार दडामिठाच होय।

²² नका डीच परमेश्वर गा जेवना कोनेन सुबांके होय, एठा डीच सेबाई स्वर्गदूतकु, अधिकारीकु एठा शक्तीनौर लिंजेन राजो दडावा होय।