1 पतरस 1 - गवली उनाई नियम

शुभकामनाए

¹ इंज पतरस, यीशु मसीह गा कलामके मिठाच चेला, इनी पत्र परमेश्वर गा कलामके मिंकू डी कुरकू के ओल लक्के मेना जो कि पुन्तुस, गलातिया जिल्हा, कप्पदूकिया, आसिया एठा बितूनिया जिल्हा गा रेंग्गो-रेंग्गो शहरनौर गेन दूसरा गाँवकु गा खिजा थंदळवा होय।

² घोनेच पेला परमेश्वर बाटे नी हेजा मकसद गा रोंगो आपेके दियागा हेजा गा कुरकू आरु गा घल्जी कलामजेमी होय एठा पवित्र आत्मा गा कामय गा रोंगो चोखरा आरुकेमी होय। डीचनी येनोगो इनिघल्जी डाके ताकी आपे यीशु मसीह गा हुकूम गा पालन डाए एठा दियागा पचना टे चोखराऊ होना। इंज प्रार्थना दडावा मेना, कि परमेश्वर आपेके कृपा एठा शांती भरपूर टे जे।

म्या स्वर्गीय विरासत

³ आलेगा प्रभु यीशु मसीह गा बाटे एठा परमेश्वर धन्यवाद डायु, परमेश्वर नी आलेगा प्रति हेजा खाट दया टे आलेके म्या उनाई जीवन जिले होय। चोयाकी परमेश्वर नी यीशु मसीह के गोएन मिंकूटे जीटाकेनेच, डीचनी आलेके विश्वास गा सेंग्गोन उनाई जीवन गा आसा जिले होय, मतलब इनी कि डी चीजो के हासिल दडा गा पूरा उम्मीद डाए सकतावा होय, जो डीचनी आलेके जिऊ गा वादा डाके होय।

⁴ आले डी महान विरासत के हासिल दडा गा इंतजार दडावा होय, जो परमेश्वर नी आलेगा घल्जी तैयार डाके होय, एठा जो परमेश्वर हेजा कुरकू गा घल्जी दोडोवा होय। डीचनी डीचके आपेगा घल्जी स्वर्ग गेन डोके मेना होय, देटेन डी सळातिंजू बाने, या खराबोऊ बाने या उथुरू बाने होय।

⁵ परमेश्वर हेजा महान शक्तीटे आपेके सजाका डोकोम लक्के होय चोयाकी आपे यीशु लिंजेन भरोसा दोडोवा होय, डी आखिरी दिन टाएन जब मसीह डाबोलटे हेजेवा, आपेके बचातिंज डोकोम्बा।

⁶ आपेके इनी सेबाई चीजो गा बारेन खुशोऊ होना, चाहे आए थोळा टेमो गा घल्जी रेंग्गो-रेंग्गो खिजा परेशानीनौर आपेके कासु कोम्बा होय।

⁷ इनी मुसीबात नौर गा मकसद इनी होय, कि आपेगा परमेश्वर लिंजेन विश्वास अंदजो गा द्वारा सही ओटजू। सोना भी मेटे सिंगेल गेन चटागेवा होय एठा डेनोगोका अगर मसीह गेन आपेगा विश्वास रेंगो-रेंगो खिजा गा अंदजोनौर गा द्वारा अंदजो धोटे पक्का ओटजू, मेटे इनी आपेगा गा घल्जी यीशु मसीह गा डाबोल गा दिननौर गेन प्रशंसा, महिमा एठा आदर गा वाजा ठहरातिंजूबा।

⁸ आपेनी यीशु के चोलाकाभी बान दोडुका होय, पेनो फिरभी आपे दियाटे प्यार दडावा होय। आपे डीचके आए बान दोडुका, पेनो आपे दिया लिंजेन विश्वास दडावा होय। इनिघल्जी, आपे खुशी एठा महिमा टे भेट्टिके ठायका खुशोयु डीके शब्दनौर गेन बयान बान डाए साकता।

⁹ आपे खुशोके होय चोयाकी परमेश्वर आपेके पापो गा दण्डो टे बचातिंज थंदळके होय। इनी यीशु मसीह गेन आपेगा विश्वास गा ईनाम होय।

परमेश्वर गा कोनेटे मंडीमिंकू गा गवाही

¹⁰ इनी उध्दार गा बातो परमेश्वर गा कोनेटे मंडीमिंकू गा बिचारनौर यानेकी घागटा गा विषय डा। दिकुनी आपे कुरकू के घाटाऊमिनी कृपा गा बारेन भविष्यवाणी डाके डा।

¹¹ मसीह गा आत्मा परमेश्वर गा कोनेटे मंडीमिंकू गेन डा, जो मसीह गा कासुनौर के सेहेनजे एठा डी कासुनौर गा बादोन घाटाऊमिनी महिमा गा बारेन दिकुके पेला टे घाले लक्के डा। परमेश्वर गा कोनेटे मंडीमिंकू नी इनी मालूमु गा कोशिश डाके कि आत्मा दिकुके चोच घाले लक्के डा, इनी सेबाई बातो चोला डाऊवा एठा इनी टोनोगो पूराऊवा।

¹² पेनो परमेश्वर नी इनी परमेश्वर गा कोनेटे मंडीमिंकू के घाल्के कि दिकुगा खाबोर खुद गा घल्जी बाने बनकी आपेगा घल्जी डा। डी खाबोर यीशु मसीह गा बारेन अच्छा खाबोर होय जो आपेनी नका आजुम्के होय। परमेश्वर नी स्वर्ग टे हेजा पवित्र आत्मा कुल्केनेच कि आपे अच्छा खाबोर गा घागलेन कुरकू गा मदत डाए। इनी सेबाई येटो अचम्बो होय कि येटे टाएन कि स्वर्गदूत भी आरीटे इनी चीजो के डाऊ लठ्ठाका दोडो लक्के होय।

चोखरा जीवन बिबातातिंज गा हाको

¹³ इनिघल्जी इकुगा मननौर के तैयार डाए जैसा कुरकू कामय दडा गा घल्जी तैयारु घल्जी इकुगा मयांग के पट्टा टे टोलेवा होय। मतलब इनी कि, जो चोच्काभी आपे सोचातिंज्बा होय डे लिंजेन आपेके ध्यान दोडो होना, एठा येनोगो डाटे आपना जीवन गा संचालन पूरा खिजाटे एठा विश्वास गा सेंग्गोन डाए, डी उध्दार के हासिल दडा गा आसा धोटेका, जो परमेश्वर कृपा टे आपेके जेबा जब यीशु मसीह स्वर्ग टे हिराबा।

¹⁴ परमेश्वर गा हुकूम पालन डाए, चोयाकी आपे दियागा कोणकु होय। डी बुरा कामय के बाकी दडा डीके आपे डी टेमो दडा गा इच्छा दोडो डा, जब आपे परमेश्वर गा सच्चाई के बान हाडाई होय।

¹⁵ पेनो नका आपेके हर कामय गेन जो आपे दडावा होय चोखरा थंदळ होना, जैसा कि परमेश्वर चोखरा होय, डीचनी आपेके हेजा कोणकु आरु गा घल्जी कलामजेमी।

¹⁶ चोयाकी पवित्र ग्रंथ गेन इनी ओलके होय, कि परमेश्वर नी मंडीके, “आपेन थंदळ होना चोयाकी इंज चोखरा मेना।”

¹⁷ जब आपे प्रार्थना दडावा मेटे आपे परमेश्वर के आपना बाटे मेंबा होय। पेनो यादो डोए कि डीच पक्षपात बान दडा एठा सेबाई कुरकू गा न्याय म्याका सारी गा रोंगो दडावा होय मतलब हर म्याखोम नी चोच-चोच डाके होय। इनिघल्जी जब कि आपे इनी धरती लिंजेन म्या पावना मिठाच मेंटो थंदळवा होय, मेटे आपेन दियागा प्रति घोनेच आदर गा सेंग्गोन थंदळ होना।

^18-19 आपे हाडाई होय कि पेला बिना मतलब गा जीवन बिबातातिंज लक्के डा, जो आपेनी आपेगा जुना सनाकु टे घाटावे डा। पेनो आपेन डी वोया जीवन टे बचातिंज्केमी मेना। आपेन सोना या चाँदी खिजा नशोऊ मिनी चीजो टे बान साडुका, पेनो मसीह गा किमती पचना टे, जो म्या चोखरा एठा सही सिळी कोंटे खिजा डा।

²⁰ इनी दुनिया गा आरुटे पेला, परमेश्वर नी इनी पक्काके मेना डा, कि यीशु मसीह आरामिठाच होंगा। एठा डीच आपेगा मदत दडा गा घल्जी इनी आखरी दिननौर गेन इनी दुनिया गेन हेन।

²¹ यीशु मसीह नी जो आलेगा घल्जी डाके, दियागा वोजीटे आपेन का परमेश्वर लिंजेन विश्वास दडावा होय। डीचका परमेश्वर होय डीचनी यीशु मसीह के दियागा गुजू गा बादोन जीटाकेनेच एठा डीचके महिमा जीके। इनिघल्जी आपे विश्वास दडावा होय एठा परमेश्वर गेन आपेगा उम्मीद नका पक्का होय।

²² चोयाकी सच्चाई गा पालन दडा गा द्वारा आपेके चोखराकेमी, नका आपेन आमगा सोप्ती विश्वासी डाईचो टे बिनादागो टे सेंग्गोन प्यार दडा होना। इनिज-दियाटे आरी टेका पूरा दिल टे प्यार दडा सुरुका डोए।

²³ आपेन इनिज-दियाटे प्यार दडा होना चोयाकी आपेके परमेश्वर गा कोनेटे म्या उनाई जीवन घाटाएन मेना होय। आपेके इनी जीवन तुनिका येनोगो चीजो गा द्वारा बान घाटाडुका, जो नशोऊबा पेनो परमेश्वर गा जीटा एठा हमेशा वचन टे घाटाएन होय।

²⁴ पवित्र ग्रंथ इनी मंडीवा होय, “सेबाई कुरकू झारा गा रोंगो होय एठा दिकुगा सेबाई सोबा डोंगोरा फुल गा खिजा होय। झारा लोखोळुवा एठा फुल ओटे लिंजेन बोचोवा।

²⁵ पेनो परमेश्वर गा वचन हमेशा कायम थंदळवा होय। इनी वचन मसीह गा बारेन अच्छा खाबोर होय, जो आपेगा बारेन घाल्के मेना डा।”