1 ಕೋರಿಂಥ್ 8 - गवली उनाई नियम

मूर्तिनौर के पेळेच्के मिनी आटा

¹ नका मूर्तिनौर के बलिदान पेळेच्के आटा रिश्ता गेन आले सेबाई इनी ज्ञान हाडाई होय, पेनो डीच “ज्ञान” कोरो के घमंडी आरुकोम्बा होय, पेनो प्यार टे बळातिंजकोम्बा होय।

² अगर जेका समझातिंजेवा होय कि डीच चोच्का हाडाई होय, मेटे डीच आए टाएन इनी बान हाडाई, कि तुनी खिजा हाडाई होना।

³ पेनो अगर जेका परमेश्वर टे प्यार दोडोवा होय, मेटे इनी इनिघल्जी कि परमेश्वर डीचके हाडाई होय।

⁴ मूर्तिनौर के बलिदान पेळेच्के आटा गा बारेन आले हाडाई होय, कि दुनिया गेन मूर्ति गा तुनिका असलीयत बाऊ होय, म्याका परमेश्वर गा इलावा तुनिका दूसरा परमेश्वर बाऊ होय।

^5-6 पेनो फिरभी, बदळा गेन एठा पृथ्वी लिंजेन चोटोका कुरकू के परमेश्वर एठा प्रभु मंडीवा मेना होय। पेनो आलेगा घल्जी म्याका परमेश्वर होय एठा डीच आलेगा बाटे होय। डीचनी सेबाई चोच्का आरुके होय, एठा आले दियागा घल्जी जीटाका होय। डीका खिजा आलेगा म्या प्रभु होय एठा डीच यीशु मसीह होय। दियागा द्वारा सेबाई चोच्का आरुके मेना डा एठा दियागा द्वारा आले जीटाका होय।

⁷ पेनो आलेगा अदा विश्वासीकु आए टाएन बान हाडाई होय, कि मूर्तिनौर गा मेरान तुनिका शक्ती बाऊ होय, चोयाकी दिकु पेला डी मूर्तिनौर गा पूजा दडा डा। नका जब दिकु डी मूर्तिनौर के बलिदान पेळेच्के मिनी आटा जोम्बा होय, दिकु गलती टे सोचातिंज्बा होय कि दिकु आए भी डी मूर्तिनौर गा पूजा गेन बेल्लाके होय। एठा दिकु इनी सोचातिंजे परेशानुबा होय, कि अगर दिकु मूर्तिनौर के पेळेच्के मिनी आटा जोम्बा होय, मेटे दिकु पापो डाके मेना होय।

⁸ पेनो आटा आलेके परमेश्वर गा मेरान बान सा। आटा के जोम गा इंकार दडा टे आले परमेश्वर के खुशोएच बाने, एठा आटाजोम आलेके परमेश्वर गा नजर गेन अच्छा बान आरु होय।

⁹ पेनो येनेगा ध्यान डोकी, कि आपेगा आजादी, जो कुरकू गा मन के कमजोर होय दिकुगा घल्जी पापो गा वाजा बाकी आरु।

¹⁰ मनातिंजे कि आपे जो “ज्ञान” हाडाई होय एठा आपे तुनिका मंदिर गेन आटा जोजोम सेने। अगर येनोगो तुनिका कोरो आपेके इनी डाटे डोके, दियागा मन कमजोर होय, मेटे चोच डीके मूर्तिनौर के बलिदान पेळेच्के आटा गा घल्जी बळातिंजू बान घाटाऊ।

¹¹ इनी खिजा आपेगा “ज्ञान” गा वाजा डी मन गा कमजोर डाई एठा बोकाजाई गा विनाश डाऊवा होय, डेगा घल्जी मसीह घोजे।

¹² डाईचो एठा बोकाजाईचो गा खिलाफ इनी खिजा पापो दडा टे एठा दिकुगा कमजोर मन के कासु जिऊ टे आम मसीह गा खिलाफ पापो दडावा होय।

¹³ इनिघल्जी अगर इंजा आटा इंजा डाई एठा बोकाजाई गा घल्जी पापो गा वाजा आरुवा होय, मेटे इंज डाबोलटे चोलाकाभी डी खिजा गा आटा बान जोम। कही येनोगो बाकी डायु कि इंज इंजा डाई एठा बोकाजाई गा घल्जी पापो गा वाजा आरुयु।