1 ಕೋರಿಂಥ್ 5 - गवली उनाई नियम

मसीह गा मंडली गेन बुरा कामय

¹ इंज्नी कुरकू के आपेगा बारेन मंडी लठ्ठा आजुम्के होय, आपेगा मसीह गा मंडली गेन टोनोगो अदा कुरकू आनोवा दडावा होय। पेनो येनोगो आनोवा अलग्गो जाटो गा कुरकू भी बान दडा, डी आनोवा इनी होय कि, म्या कोरो दियागा दूसरा आंटे गा सेंग्गोन गिटीचबा होय।

² आपेन एने बारेन दुखीऊ होना मेना डा, एठा डी कोरो के डीचनी इनी डाके, मसीह गा मंडली टे ओटकेच होना डा। पेनो डीचके ओट गा बजाय आपे घमंड महसूस दडावा होय।

³ येठाभी इंज देटेन लिंजेन बाऊ मेना, लेकिन इंजा मन गेन इनी रोंगो होय, कि इंज आए टेमोन गेन डी जगा लिंजेन मेना एठा डी कोरोनी इनी डाके होय, दियागा न्याय दडा लक्के मेना।

⁴ एठा इंजा निर्णय इनी होय, कि आबु प्रभु यीशु गा जीमू गेन आपे कुरकू एठा इंज शक्तीगा सेंग्गोन गोलाऊवा, एठा आबु प्रभु यीशु गा हाक टे

⁵ डी कोरो शैतान गा हवाले जीकेच, देटे दियागा कोम्बोर गा विनाश होय, पेनो प्रभु गा दिन दियागा आत्मा गा उध्दार होय।

⁶ आपे घमंड दडा बन्दोए चोच आपे बान हाडाई, कि थोळासा खमीर सेबाई लोखाके कोलोम के डीका रोंगो खमीर आरोएवा होय, जैसा म्या कोरो के पापो दडा गा अनुमति जेबा होय, मेटे जल्दीका सेबाई डीका दडा गा घल्जी लालिचोयुवा होय।

⁷ आपे जुना खमीर कोलाटे अच्छा आरुयु, दियाटे आपे उनाई घुलीके कोलोम हारूयु। ताकी आपेके बिना खमीर गा सोकड़ा जैसा हारूयु होय, चोयाकी आलेगा फसह गा तिवार गा मेमना मतलब मसीह बलिदान पेळेन होय,

⁸ इनिघल्जी आले न मेटे जुना खमीर टे एठा बान बुरा एठा उदाहरण गा खमीर टे, बनकी बिना खमीर गा सोकड़ा गा सेंग्गोन जो पवित्रता एठा सच्चाई दर्शातिंजेवा होय तिवार ममानातिंज होना।

⁹ इंज्नी आपे कुरकू के आपना पत्री गेन ओलके डा, कि आनोवा दडामिंकू टे मिल-जुल बाकी थांदळ।

¹⁰ इंजा मंडी गा मतलब इनी बान डा, कि इनी दुनिया गा आनोवा दडामिंकू, लोभी, एठा दूसराकु के धोका जिऊमिंकू या मूर्ति पूजाकु टे तुनिकाभी संम्बन्ध बाकी दोडो। एगो दडा गा घल्जी आपेके दुनिया केका आरा होना।

¹¹ पेनो इंजा मंडी मतलब डा कि अगर विश्वासी डाई मंडीमिठाच जेका कोरो आनोवा डाए, लोभी होय, मूर्तीपुजा डाए, आराम मिठाच, सिडू मिठाच या दूसराकु के धोका जिऊमिठाच होय, मेटे दियागा सेंग्गोन आटा भी बाकी जोजोम।

^12-13 दुनिया गा कुरकू गा न्याय दडा आलेगा कामय बाने, परमेश्वर दुनिया गा कुरकू गा न्याय डाएवा। पेनो मसीह गा मंडली गा तालान कुरकू गा न्याय चोच आपे खुद बान डाए साकतावा? जैसा पवित्र ग्रंथ गेन मंडीके होय, “आबुगा तालाटे बुरा कामय दडामिंकू के कोलाकू।”