1 ಕೋರಿಂಥ್ 3 - गवली उनाई नियम

परमेश्वर गा सेवक

¹ हे विश्वासी डाईचो, इंज आपे कुरकू टे डी खिजा बातो बान दडुका। डी खिजा आत्मिक कोरोकु टे डाएवाका होय, पेनो इंजेन आपे कुरकू टे डी खिजा बातो दडा बोचोएन, डी खिजा कोम्बोरा कोरोकु टे जो मसीह गेन सिर्फ चाफ्निकु टेका डाएवा होय।

² डी टेमो इंज्नी आपेके परमेश्वर गा वचन तालाटे बस असान बातोका इथूकेकु, जैसा म्या कोरो सानी चफनी के नुनू गा घल्जी दिडोम जेबा होय। डेनोगोका इंज्नी परमेश्वर गा वचन गा खोल सच्चाईनौर के बान इथूडुका, जो म्या काळक्को आटा गा खिजा होय चोयाकी आपे दियागा घल्जी तैयारके बाने डा।

³ चोयाकी आपे आए टाएन कोम्बोरा एठा पापमय स्वभाव गा रोंगो सेंदरावा होय। एठा आपे कुरकू गेन जुलू एठा झागळा डाऊवा होय। चोच इनी इनिका बातो गा साबुत बाने, चोच आपे कोम्बोर एठा दुनिया गा कुरकू गा खिजा जीवन बिबातातिंज्बा होय?

⁴ इनिघल्जी कि जब म्याखोम मंडीवा होय, “इंज पौलुस गा मेना,” एठा दूसरा, “इंज अपुल्लोस गा मेना,” मेटे चोच आपे कोम्बोर एठा पापमय स्वभाव गा रोंगो जीवन बान बिबातातिंज्बा होय?

परमेश्वर गा भाग्यकु गा भूमिका

⁵ मेटे डाबोलटे अपुल्लोस जे होय? एठा पौलुस जे होय, बस सेवक, दियागा द्वारा आपे कुरकू नी परमेश्वर लिंजेन विश्वास डाके। जैसा आले तालाटे हरेक नी डीका कामय डाके, जो परमेश्वर नी आलेके दडा गा घल्जी जिले।

⁶ इंज आपे कुरकू के बारेन परमेश्वर गा घागल मिठाच पेला कोरो डा, इनिघल्जी इंज म्या येनोगो कोरो गा खिजा मेना डेन खिटीन बीजो बिटके। डेगा बादोन, अपुल्लोस नी आपेके विश्वास गेन मजबूत आरु गेन मदत डाके, साही डीका खिजा जैसा कि तुनिका दूसरा कोरो डी रोपोनौर के डा जेबा होय जो बळातिंजू लज्जूवा होय। पेनो परमेश्वर नी आपेके उनाई जीवन जीके होय एठा देटे आपे आत्मिक रुपोटे बळातिंजू चाले जैसा परमेश्वर रोपो के बळातिंजेवा होय।

⁷ इनिघल्जी जो रोपो येंडावा होय एठा जो डा जेबा होय दियागा तुनिका महत्व बाऊ होय। एकला परमेश्वर गा महत्व होय, चोयाकी डीच डीका होय जो रोपो के बळातिंजू गा वोजीटे आरुवा होय।

⁸ इंज्नी आपेके अच्छा खाबोर घाल्के एठा परमेश्वर गा वचन के इनी खिजा पपाळातिंज सुरुके जैसा तुनिका कोरो रोपो येंडावा होय, एठा अपुल्लोस नी आपेके पपाळातिंज चालुका डोके जैसा दूसरा कोरो रोपो के डा जेबा होय, पेनो आलिंज बर्खिंज गा म्याका लक्ष होय। इनिघल्जी रोपो येंडा मिठाच एठा डा जिऊमिठाच बर्खिंज के परमेश्वर दिकुगा कामय गा रोंगो ईनाम जेबा।

⁹ आले परमेश्वर गा सेंग्गो कामय मिंकू होय, एठा कुरन्थ शहर गा मसीह गा मंडली गा कुरकू आपे परमेश्वर गा खिटी एठा परमेश्वर गा भवन भी होय।

¹⁰ परमेश्वर नी इंज्के जो वरदान जिले, दियागा इस्तमाल दडा लठ्ठाका, इंज्नी डी उरा गा पैय्या म्या दिमागदार उरा आरु मिसत्री गा खिजा डोकी। अलग्गो कुरकू डी पैय्या लिंजेन कामय दडा लक्के होय, लेकिन सेबाई कुरकू के ध्यान टे थंदळ होना कि दिकु एने लिंजेन टोनोगो कामय दडावा होय।

¹¹ यीशु मसीह डी उरा गा पैय्या गा खिजा होय, जो उरा आरोए लक्के होय, डीचका म्याका पैय्या होय। येनेगा मतलब होय, यीशु मसीह गा द्वारा का कुरकू परमेश्वर के हाडाई होय।

¹² अगर मसीह गा मंडली गा गुरूजी सही शिक्षा जिऊवा होय, जो परमेश्वर नी दिकुके जीके होय, मेटे दिकु डी उरा आरु मिसत्री गा खिजा होय, जो सोना, चाँदी एठा किमती मिनी घोटानौर खिजा अच्छा गुण मिनी सामोन गा इस्तमाल डाटे पैय्या आरुवा होय। पेनो अगर दिकु लाबाळ जिऊवा होय, मेटे दिकु डी उरा आरु मिस्त्रीकु गा खिजा होय, जो लकळी एठा झरा खिजा गुण मिनी सामोन गा इस्तमाल डाटे पैय्या आरुवा होय।

¹³ पेनो न्याय गा दिन जब मसीह डाबोलटे हेजेवा, मेटे सिंगेल हरेक कोरो गा कामय गा गुण मिनी घालेवा। एठा सिंगेल घालेवा तुनिका कोरो के कामय किमती होय।

¹⁴ अगर तुनिका उरा आरु मिसत्री नी पैय्या लिंजेन जो कामय डाके होय, डीच बान जुलू होय, मेटे दियेन ईनाम घाटाऊवा।

¹⁵ अगर तुनिका उरा आरु मिसत्री नी पैय्या लिंजेन जो कामय डाके होय, डीच जुलू होय, मेटे दियेन तुनिका ईनाम बान घाटाऊवा। पेनो डीच येनोगो बचातिंजूवा, जैसा जेका सिंगेल पारटे बचातिंजूवा होय।

¹⁶ आपे अच्छा खिजाटे हाडाई होय, कि आपे परमेश्वर गा मंदिर होय, एठा परमेश्वर गा आत्मा आपेन नी थंदळवा होय।

¹⁷ अगर जेका आपे विश्वासीकु गा तालान फाळीऊ सेगेवा होय, मेटे परमेश्वर डीके नाशोएवा चोयाकी परमेश्वर गा मंदिर चोखरा होय। एठा परमेश्वर गा मंदिर आपे होय।

दुनियादारी ज्ञान टे बचातिंजे

¹⁸ अगर आपे तालाटे जेकाभी इनी दुनिया गा कुरकू गा नजर गेन समझदार होय, मेटे आपेके इनी दुनिया गा कुरकू गा नजर गेन खुदके बेदिमाग आरु होना, ताकी आपे परमेश्वर गा नजर गेन सही मायना गेन समझदार आरुयु।

¹⁹ चोयाकी इनी दुनिया गा ज्ञान परमेश्वर गा नजर गेन बेदिमाग होय। एठा पवित्र ग्रंथ गेन इनी ओल्के होय, “डीच ज्ञानिकु के दिकुगा चतुरु गेन का फसातिंजुवा होय।”

²⁰ एठा पवित्र ग्रंथ गेन इनी भी ओल्के होय, “प्रभु ज्ञानिकु गा बिचारनौर के हाडाईवा होय, कि वोया होय।”

^21-23 इनिघल्जी आपे दूसराकु गा डाके मिनी कामयनौर गा बारेन घमंड दडा बंदोकी। इंज, पौलुस एठा अपुल्लोस एठा पतरस (कैफा) सेबाईकु आपेगा होय, आए टेमोन सेबाईका आपेगा होय, डेन दुनिया, जीवन, गुजू, आए टेमो एठा हेजे मिनी टेमो बेल्लाके होय। सेबाईका आपेगा होय, एठा आपे मसीह गा होय एठा मसीह परमेश्वर गा होय।