1 ಕೋರಿಂಥ್ 15 - गवली उनाई नियम

मसीह गा गोएन मिठाच जाटे डाबोलटे जीटाऊ

¹ हे इंजा विश्वासी डाईचो, इंज आपेके डीका अच्छा खाबोर यादो जेबा मेना, जो पेला आपे आजुम्के मेना होय, एठा डी खाबोर लिंजेन आपेनी विश्वास भी डाके डा एठा डी विश्वास गेन पक्का हारोएन होय।

² परमेश्वर आपेके डी अच्छा खाबोर गा द्वारा बचातिंजकोम्बा होय, आपे दिया लिंजेन अच्छा खाबोर लिंजेन विश्वास दडा चालुका डोके, डेगा बारेन इंज्नी आपेके घाल्के होय। अगर आपे विश्वास दडा बंदोए टासो, मेटे आपेगा विश्वास गा तुनिका किमती बाऊ होय।

³ इनी वाजा इंज्नी आपे कुरकू के सेबाईकु टे पेला डी खाबोर जीके मेना जो इंज्के हासिलजे डा, मतलब पवित्र ग्रंथ गा रोंगो मसीह आलेगा पापोनौर गा घल्जी गोएन मेना।

⁴ एठा डी कब्र गेन डोके मिनी एठा पवित्र ग्रंथ गा रोंगो आफाई दिन बादोन गोएन मिठाच जाटे डाबोलटे जीटाएन।

⁵ डीच पतरस (कैफा) के एठा बादोन बारह चेलाकून डोके मेना।

⁶ डाबोलटे मोनाई सेद्दी टे येठाभी चेलाकून म्या सेंग्गोन डोके मेना, दिकु तालाटे घोनेच सेबाई आए टाएन जीटाका होय, एठा अदाकु गोएन मेना होय।

⁷ डाबोलटे याकूब बेन डोके मेना मेटे डाबोलटे सेबाई कलामके मिंकू चेलाकून डोके मेना।

⁸ एठा सेबाईकु गा बादोन इंजेन भी डोके मेना, अचानक इंज म्या येनोगो टेमोन का प्रभु यीशु गा कलामके मिठाच चेला आरोएन, डेगा उम्मीद बान दडुका डा, म्या येनोगो सनी गा खिजा जो डी दिन डाएन टासो जो दियागा डाऊ गा महिना बान डा।

⁹ इंज कलामके मिंकू चेलाकू तालाटे सेबाईकु टे सनी मेना। सच्चो कोम्बाराए, मेटे इंज कलामके मिठाच चेला मंडी गा लायको भी बाने, चोयाकी इंज्नी परमेश्वर गा मसीह गा मंडली लिंजेन अत्याचार डाके डा।

¹⁰ पेनो इंज परमेश्वर गा कृपा टे म्या कलामके मिठाच चेला आरोएन, एठा दियागा कृपा इंजा जीवन गेन आसरदार डाएन डा। इनिघल्जी इंज्नी दूसरा कलामके मिंकू चेलाकू टे बळातिंजटे मेहनत डावे, मेटे भी इनी इंज कोनेटे बान दडुका, पेनो परमेश्वर गा कृपा नी इंज्के परमेश्वर गा कामय दडा गा लायको आरुकेमी।

¹¹ चाहे इंज मेना, चाहे दूसरा कलामके मिंकू चेला होय, आले सेबाईकु नी मसीह गा बारेन म्याका खाबोर गा प्रचार डाके।

गोएन मिंकू गा डाबोलटे जीटाऊ

¹² इनिघल्जी नका इंज आपेटे इनी कोंकाम्बारा चाहतावा मेना, चोयाकी आले सेबाईकु नी आपेगा तालान इनिका प्रचार डाके, कि जब मसीह गोएन मेटे परमेश्वर नी डीचके डाबोलटे जीटाकेनेच। मेटे आपे तालाटे जेकाभी इनी बाकी मंडी कि परमेश्वर विश्वासीकु के गोएन गा बादोन डाबोलटे जिजाटा बाने!

¹³ अगर परमेश्वर विश्वासीकु के गोएन गा बादोन डाबोलटे जिजाटा बाने, मेटे मसीह भी जीटाडुका बाने।

¹⁴ एठा अगर मसीह के परमेश्वर नी गोएन मिठाच जाटे जीटाडुका, मेटे जो खाबोर गा आले प्रचार दडावा होय, एठा मसीह गेन आपेगा विश्वास गा तुनिका अर्थ बाऊ होय।

¹⁵ येनेगा इलावा, अगर गोएन मिंकू कुरकू गुजू गा बादोन जीटाऊ बाने होय, मेटे आले परमेश्वर गा बारेन लाबाळ गवाही जिऊवा होय, कि डीच मसीह के जीवन गेन हिरालेनेच

¹⁶ इंज डाबोलटे मंडीवा मेना, अगर गोएन मिंकू कुरकू गुजू गा बादोन जीटाऊ बाने होय, मेटे मसीह भी गुजू गा बादोन जीटाडुका बाने होय।

¹⁷ एठा अगर मसीह बान जीटाडुका टासो, मेटे आपेगा विश्वास गा तुनिका अर्थ बाऊ होय। एठा आपे आए भी पापो गा शक्तीगा हात टाल्लेन होय।

¹⁸ पेनो अगर मसीह मुर्दाकु तालाटे बान जीटाडुका होय, मेटे जो विश्वासी गोएन मेना होय, डीच बचातिंजडुका बाने होय, बनकी दिकु नशोएन होय, मतलब दिकु हमेशा गा घल्जी परमेश्वर टे अलग्गोएन होय।

¹⁹ अगर मसीह गेन आलेगा आसा सिर्फ इनिका जीवन गा घल्जी होय, मेटे दुनिया गेन तुनिका दूसरा गा तुल्न गेन सेबाई टे येठाभी आले लिंजेन दया घागल होना।

²⁰ पेनो सच्चाई इनी होय कि परमेश्वर नी आए टेमोन मसीह के पेला गोएन मिठाच जाटे जीटाकेनेच होय, इनी बातो साबित देवा होय, कि डीच डी विश्वासी कुरकू के भी जीटाकुवा जो गोएन मेना होय।

²¹ मेटे आपे दोडोवा होय, जैसा कि म्या कोरो आदम गा द्वारा इनी दुनिया गेन गुजू हेन, एठा नका मुर्दाकु तालाटे जीटाऊ गेन हिरा भी म्या अलग्गो कोरो मतलब मसीह गा द्वारा सुरोएन होय।

²² जैसा कि म्या कोरो मतलब आदम गा पापो गा वाजा सेबाई कोरोकु के गुजू बोचोएन होय। डीका खिजा म्या कोरो मतलब यीशु मसीह नी जो डाके दियागा वाजा, सेबाई मुर्दाकु के डाबोलटे जीटाकुवा मेना।

²³ पेनो हरेक कोरो सही बरी - बरी गा रोंगो जीटाएच्बा, मसीह पेला कोरो डा डीचके जीटाकेनेच मेना। डाबोलटे मसीह गा हेजे लिंजेन दियागा कुरकू के जीटाकुवा मेना।

²⁴ डाबोलटे जब मसीह सेबाई शक्तीनौर एठा प्रधानताकु के नाशोकुवा मेटे दुनिया गा अंत हेजेवा, एठा डीच परमेश्वर बाटे के राज्य जेबा।

²⁵ मसीह के राजा गा रुपो गेन राजो दडा होना, जब टाएन कि परमेश्वर दियागा सेबाई दुश्मनकु के पूरा खिजाटे हरातिंजू बान टाएन।

²⁶ सेबाई टे अखिरीन नाशो डाऊ मिनी, दुश्मान गुजू होय।

²⁷ पवित्र ग्रंथ मंडीवा होय, “परमेश्वर नी सेबाई चोच्का दियागा नंगा इटान डोके होय”, पेनो जब डीच मंडीवा होय कि सेबाई चोच्का दियागा हात टाल्ले होय, मेटे इनी सपा होय, कि परमेश्वर डीचनी सेबाई चोच्का मसीह गा हात टाल्ले डाके होय, सेबाई चोच्का गेन परमेश्वर बेल्लाका बाऊ होय।

²⁸ जब सेबाई चोच्का कोण गा हात टाल्ले नेवा, मेटे कोण खुद परमेश्वर गा हात टाल्लेन होय, डीचनी सेबाई चोच्का दियागा हात टाल्लेनकेकु एठा इनी खिजा परमेश्वर सेबाईकु लिंजेन पूरा राजो डाएवा।

²⁹ अगर मुर्दाकु के जीटाकु बाने होय, मेटे दिकु कुरकू चोच डाए जो मुर्दाकु गा घल्जी बपतिस्मा सवा होय? अगर मुर्दाकु गा डाबोलटे जीटाऊ बिलकुल बान डाऊ, मेटे दिकु मुर्दाकु गा घल्जी बपतिस्मा चोया सेगे?

³⁰ देटेन टाएन आलेगा बातो होय, अगर मुर्दाकु के जीटाडुका बाने होय, मेटे आलेन खुदके खतरा गेन येंडा बेदिमाग होय।

³¹ हे इंजा विश्वासी डाईचो, इंज आपेके घालेवा मेना कि इंज हर दिन अंदजोटे गुजूवा मेना। इंज जो इनी मंडीवा मेना इनी आए टेमोन सच्चो होय जैसा कि इनी भी सच्चो होय, कि इंज आए टेमोन खुशोके मेना चोयाकी आपे आलेगा प्रभु, यीशु मसीह लिंजेन विश्वास दडावा होय।

³² येटेन इफिसुस शहर गेन, इंजा दुश्मान जानवरकु गा खिजा होय, जो इंज्के नुकसान आदिर चाहतावा मेना। इंज आए भी इनी सेबाई सेहेने चोया लक्के मेना, अगर इंजा फल इनी दुनिया गेन का होय। अगर इनी सच्चोऊवा होय कि इंज्के आखरी दिन गेन डाबोलटे जीटाऊ बाने, मेटे अच्छा डाऊ डा कि इंज मजा उळातिंज्बा, जैसा कि इनी कहावत होय, “हेजे आले जोजोम नुनूवा चोयाकी शायद गाफान आले घोयुवा एठा डीच आलेगा अंत डाऊवा।”

³³ जो कुरकू इनी खिजा गा बातो दडावा होय दिकुगा द्वारा बेदिमाग बाकी आरु, बुरा सोप्ती अच्छा स्वभाव के बिगळातिंजेवा होय।

³⁴ आपेके आपेगा सही तरीका टे सोचातिंज लिंजेन हिरा होना एठा पापो दडा बंदोकी होना। चोयाकी “आपे तालाटे अदा कुरकू गा रिश्त परमेश्वर गा सेंग्गोन सही बाऊ होय।”

डाबोलटे जीटाऊ गा बादोन कोम्बोर

³⁵ एठा अगर उदाहरण गा घल्जी जेका कोकाम्बारावा होय कि परमेश्वर मुर्दाकु के जीटाकुवा, या दिकुगा कोम्बोर टोनोगो डाऊवा।

³⁶ इंजा जवाब इनी होय, हे बेदिमाग, जो चोच्का आम बिबीटवा होय, डीके म्या बीजो रुपोन बिडेवा होय, मेटे रोपो आरुटे पेला डी बीजो गुजूवा होय।

³⁷ अगर आपे चाऊली या तुनिका अलग्गो बीजो येंडावा होय, मेटे आपे पेलाटेका ओटके मिनी रोपो बान येंडा, बनकी सिर्फ गुं बीजो येंडावा होय।

³⁸ जब बीजो येंडाएवा होय, मेटे परमेश्वर रोपो के डी रुपो जेबा होय, जो डीच दियागा घल्जी चाहतावा होय। हरेक रोंगो गा बीजो हेज खुद गा रुपोन बळातिंजुवा होय।

³⁹ अगर आले पृथ्वी लिंजेन थंदळ मिंकू सेबाई जानवरकु गा बारेन भी सोचातिंज्बा, मेटे दिकु सेबाईकु गा सेबाईकु म्या खिजा बान डूगु। कोरोकु गा म्या रुपो थंदळवा होय। भूरिकु गा दूसरा रुपो थंदळवा होय। काकूकु गा म्या अलग्गो रुपो थंदळवा होय। हर रोंगो गा जानवर, डी सेबाईकु गा म्या अलग्गो थंदळवा होय।

⁴⁰ इनिघल्जी बदळा गा चीजो, जैसा सूर्य, चंद्रमा एठा इफिलकु, दिकु पृथ्वी गा चीजो गा रोंगो बाऊ होय। बदळा गा चीजो गेन म्या खिजा गा सोबा थंदळवा होय, एठा पृथ्वी गा चीजो गेन दूसरा खिजा गा सोबा थंदळवा होय।

⁴¹ सूर्य गा उजाला अलग्गो होय, चंद्र गा उजाला अलग्गो होय, एठा इफिलकु गा उजाला अलग्गो होय, चोयाकी म्या इफिल गा उजाला एठा दूसरा इफिल गा उजाला अंतर होय।

⁴² मेटे येनोगोका मुर्दा कुरकू गा डाबोलटे जीटाऊ गेन भी डाऊवा। जो कोम्बोरके दिकु गळातिंजेवा होय, डी येनोगो कोम्बोर होय जो सळातिंजुवा होय, पेनो जब इनी डाबोलटे जीटाऊवा होय, मेटे इनी म्या येनोगो कोम्बोर आरुवा होय, जो सळातिंजू बान साकता।

⁴³ जब आलेगा कोम्बोरके गळातिंजेवा होय, मेटे आलेगा कोम्बोर सोबा बाऊ एठा कमजोरुवा होय। पेनो जब दिकु जीवन हिराबा होय, मेटे दिकु सोबा एठा मजबूत थंदळवा होय।

⁴⁴ जो रोंगो आलेगा मेरान इनी जिलु एठा पचना गा कोम्बोर होय, डीका खिजा येनोगो कोम्बोर भी होय, डीके परमेश्वर गा आत्मा गा द्वारा जीवन जेवाका होय। एठा आलेगा जिलु एठा पचना गा कोम्बोरके डी कोम्बोरनौर गेन बदलातिंजेवा मेना, डीके परमेश्वर गा आत्मा गा द्वारा जीवन जेबा मेना।

⁴⁵ पवित्र ग्रंथ गेन भी इनी ओल्के होय कि, “पेला कोरो मतलब आदम जीटा जानवर आरोएन” एठा आखरी आदम जो मसीह होय, डीचका होय जो हमेशा गा जीवन जिऊमिठाच आत्म आरोएन।

⁴⁶ इनिघल्जी आलेगा मेरान आए गा दुनिया टे संबंधित कोम्बोर थंदळ होना, डाबोलटे आलेके स्वर्ग टे संबंधित कोम्बोर जेवाका होय।

⁴⁷ आदम, जो कि पेला कोरो होय, डी धरती गा कासा टे आरुके मेना डा। एठा मसीह, जो कि दूसरा कोरो होय, स्वर्ग टे हेन होय।

⁴⁸ जो कुरकू पृथ्वी टे संबंधित होय दिकु पृथ्वी गा पेला कोरो, आदम गा खिजा होय। पेनो डी कुरकू जो स्वर्ग टे संबंधित होय, डीच स्वर्ग गा कोरो, मसीह गा खिजा होय।

⁴⁹ आले सेबाईकु गा मेरान डी कोरो आदम गा रुपो होय, डीचके कासा टे आरुकेनेच डा। इनिका खिजाटे, म्या दिन, आलेगा मेरान मसीह गा रुपो होंगा, जो स्वर्ग टे हेन डा।

⁵⁰ हे इंजा विश्वासी डाईचो, इंज इनी मंडी मेना कि, इनी पृथ्वी लिंजेन आलेगा कोम्बोर जिलु एठा पचना टे आरुके होय, आले स्वर्ग गेन परमेश्वर गा राज्य गेन आपना इनी कोम्बोर गा सेंग्गोन मु बाने मेना। आले स्वर्ग गेन आलेका येनोगो कोम्बोर गा सेंग्गोन बाने थंदळ साकता जो नाशो मिंकू होय, चोयाकी देटे जगान तुनिका गुजू बाऊ होय।

^51-52 इनी उखुके मिनी सच्चो के आजुमे, आले सेबाईकु गुजू बाने, लेकिन जब आखरी लम्बा पिंगी साडीवा, मेटे आले अचानक येटो तेजो टे बदलातिंजूवा जो तेजो टे जेका हेजा मेट जफीटडेवा होय। जब लम्बा पिंगी साडीवा मेटे जो कुरकू गोएन मेना होय दिकु हमेशा गा जीवन बिबातातिंज गा घल्जी डाबोलटे जीटाकोम्बा एठा आले जो जीटाका होय, आलेगा कोम्बोर बदलातिंजूवा।

^53-54 चोयाकी आलेगा इनी कोम्बोर जो आसानी टे गुजूवा होय एठा सळातिंजुवा होय, डीके म्या येनोगो कोम्बोर गेन बदलातिंजू होना, जो न चोलाकाभी गुजूवा होय न चोलाकाभी सळातिंजुवा होय। जब येनोगो डाऊवा, मेटे डी पूराऊवा जो परमेश्वर नी पवित्र ग्रंथ गेन ओल्के होय, जो मंडीवा होय, “जीटाऊ नी गुजू के उटजेनेच।”

⁵⁵ हे गुजू अमा जीटाऊ तुगन थंदळके? “हे गुजू अमा ताटाम्बा तुगन थंदळके?” इनी खिजाटे, पवित्र ग्रंथ गेन जो ओल्के होय, डी पूराऊवा।

⁵⁶ गुजू गा ताटाम्बा पापो होय, एठा मूसा गा नियम गा वाजा गा शक्ती आलेगा जीवन गेन हेजेवा होय।

⁵⁷ पेनो परमेश्वर गा धन्यवाद डायु, डीचनी प्रभु यीशु मसीह गा द्वारा आलेके पापो एठा गुजू लिंजेन जीटाऊ जिले होय।

⁵⁸ इनिघल्जी हे इंजा प्यारे विश्वासी डाईचो, इकुगा विश्वास गेन मजबूत थंदळे एठा प्रभु गा घल्जी जो कामय आपे दडावा होय, डेन हमेशा बळातिंजे चाले। चोयाकी आपे इनी हाडाई होय, कि जो कामय आपे प्रभु गा घल्जी दडावा डी चोलाकाभी वोया बान डाऊ।