1 ಕೋರಿಂಥ್ 13 - गवली उनाई नियम

प्यार महान होय

¹ इंज भलाका कुरकू एठा स्वर्गदूतकु गा भाषानौर गेन मांडे, पेनो अगर इंजेन नी प्यार गा स्वभाव बाऊ होय, मेटे इंज ठनठन मिनी पित्र एठा झुनझुन मिनी खंजर गा रोंगो मेना।

² इंजेन भलाका भविष्यवाणी दडा गा वरदान घाटाएन होय, एठा भलाका इंज सेबाई रहस्य हाडाई होय, इंजेन पूरा ज्ञान हासिल मेना होय, इंजा विश्वास येटो पक्का होय, कि इंज टुक्कीनौर के बाजुकी। पेनो अगर इंजेन नी प्यार गा स्वभाव बाऊ होय, मेटे इंज चोच्काभी बाऊ मेना।

³ इंज भलाका इंजा सम्पति दान जिकी एठा मशहूर घाटाऊ गा घल्जी इंजा कोम्बोर पेळेजेकी, पेनो अगर इंजेन नी प्यार गा स्वभाव बाऊ होय, मेटे येनेटे इंजेन चोच्का फायदा बाऊ।

⁴ जो कुरकू दूसराकु टे प्यार दडावा होय, दिकु सेहेसेन एठा दया गा सेंग्गोन कामय दडावा होय, एठा दिकु जुलू बाने होय, एठा दिकु इकुगा बारेन घमंड बान दडा होय।

⁵ दिकु दूसराकु गा सेंग्गोन बुरा व्यवहार डाटे दिकुगा अपमान बान दडा होय, दिकु स्वर्थी बान थंदळ होय, दिकु जल्लो खिजोऊ बाने होय, एठा दिकु ठायका आसानी टे डी कुरकू के मापोकुवा होय जो दिकुगा खिलाफ गलत दडावा होय।

⁶ जब कुरकू गलत कामयनौर के दडावा होय, मेटे दिकु खुशोऊ बाने होय लेकिन जब कुरकू येनोगो कामय दडावा होय जो सही एठा सच्चोऊवा होय, मेटे दिकु खुशोऊवा होय।

⁷ दिकु हर म्याखोम लिंजेन विश्वास दडावा होय, हर बातो गा आसा दडावा होय एठा सेबाई चोच्का आराम्बो गा सेंग्गोन सेहेनेवा होय।

⁸ डी टेमो हेजेवा जब भविष्यवाणी एठा अलग्गो भाषानौर एठा कास ज्ञान गेन मंडी गा जरुरत बान थंदळ। लेकिन प्यार हमेशा गा घल्जी आरुका थंदळवा!

^9-10 आलेगा ज्ञान गा वरदान एठा परमेश्वर गा खाबोर गा प्रचार दडा गा शक्ती अधुरा होय। पेनो जब डीच जो सेबाई एठा पूरा रुपोटे भेट्टिके होय हेजेवा, मेटे डीच जो अधुरा होय, मेटे दियागा जरुरत बान बोचो।

¹¹ इंज जब सनी डा, मेटे सनीकु गा खिजा मंडी डा, सोचातिंज डा, एठा समझातिंजे डा, पेनो सयानाऊ घल्जी लिंजेन इंज्नी सनीकु खिजा बातो मंडी आराके।

¹² आए भी मेटे आलेन आयना गेन जखा-जखा का डूगुवा होय, पेनो मेटे आले परमेश्वर अम्मा-सम्मान डोगेवा। आए भी मेटे इंजा ज्ञान पूरा बाऊ होय, पेनो मेटे इंज डीका खिजा पूरा रुपोटे चिनायाबा, जो खिजा परमेश्वर इंज्के चिनायेमी मेना होय।

¹³ इनिघल्जी नका इनी आफाई रोंगो गा कामय के आलेन दडा होना। पेला परमेश्वर लिंजेन विश्वास डाए, दूसरा परमेश्वर गा वादानौर गेन आसा डोकी, एठा आफाईय्या बाएरा टे प्यार डाए। लेकिन डी आफाईकु तालाटे, म्या होय जो सेबाई टे अच्छा होय, डी होय दूसराकु टे प्यार दडा।