1 ಕೋರಿಂಥ್ 10 - गवली उनाई नियमइस्राएल गा इतिहास टे चेतावनी 1 हे विश्वासी डाईचो, इंज चाहतावा मेना कि आपे डी बातो के यादो डोए कि जो डोंगोर गेन आलेगा जुना सनाकु गा सेंग्गोन घोनेच पेला चोच डाएन डा। परमेश्वर नी दिकु सेबाई के म्या बदळा कुल्टे अगुवाई डाके, जो दिकुगा सम्मा-सम्मान चेल्के डा, एठा दिकु सेबाईकु के लोखोळ ओटे टे राटा समुद्र गा डा गा तालाटे सजाका रुपोटे सालेकु। 2 आले मंडी सकतावा होय, कि जैसा आले प्रभु यीशु गा चेला आरु गा घल्जी बपतिस्मा सवा होय, डीका खिजा आलेगा जुना सनाकु नी बदळा गा साईली गेन थंदळ टे एठा मूसा गा नियम चेला आरु गा घल्जी राटा समुद्र टे सेने टे बपतिस्मा घाटाएन डा। 3 एठा दिकुनी डीका सोकळा जोवे देटे परमेश्वर नी दिकुगा घल्जी स्वर्ग टे जीके डा। 4 एठा दिकु सेबाईकु नी डा भी नुवे, जो परमेश्वर नी दिकुके पाठा टे जीके डा। एठा डी पाठा गा तुल्न मसीह टे डाए सकतावा होय, डीचनी दिकुगा सेंग्गोन ओलेडो दिकुके जीवन जीके। 5 पेनो परमेश्वर दिकु तालाटे घोनेचकुटे खुशो बान डा, इनिघल्जी दिकु सुनसान जगा गेन गोएन। 6 इनी घटनानौर उदाहरण स्वरूप होय एठा आलेके इनी शिक्षा जिऊवा होय, कि आलेन दिकुगा रोंगो बुरा चीजो गा ललिचो बाकी दडा होना। 7 दिकु तालाटे अदा कुरकू गा रोंगो मूर्तिपूजक बाकी आरु, दिकुगा बारेन पवित्र ग्रंथ गेन इनी ओल्के होय, “कुरकू जोजोम-कखाफ गा घल्जी खानान सुबांजे एठा डाबोलटे बुरा कामय दडा गा घल्जी बिटजे।” 8 आले आनोवा बाकी दडा, जैसा कि दिकु तालाटे अदा कुरकू नी आनोवा डाके एठा म्याका दिनेन तेविस हजार गोएन। 9 एठा न आले प्रभु के अंदजोएच, जैसा दिकु तालाटे अदा कुरकू नी डाके, एठा बिंजकु गा द्वारा गोएन। 10 एठा न आपे कुरूकुरू, जो रिती टे दिकु तालाटे अदा कुरकू कुरुकुरूके, एठा म्या दूत डीचके परमेश्वर नी कुल्केनेच, डीचनी दिकुके घोचकेकु। 11 इनी सेबाई उदाहरण स्वरूप दिकु लिंजेन बितातिंजे एठा आलेके चेतावनी जिऊ गा घल्जी ओल्के मेना होय, जो इनी दुनिया गा अंत गा टेमोन थंदळवा होय। 12 इनिघल्जी अगर देटेन तुनिका येनोगो कोरो होय जो मंडीवा होय, कि परमेश्वर लिंजेन दियागा भरोसा मजबूत होय, मेटे दियेन ध्यान टे थंदळ होना कि येनोगो बाकी डाऊ, कि डीच अचानक पपासा टे पसायु एठा डीच पापो डाए। 13 पापो दडा गा इच्छानौर आले सेबाईकु गा मेरान जरुर हेजेवा होय, फिरभी परमेश्वर विश्वास लायको होय, कि आलेके आलेगा पचातिंजू टे जादा पसा डाए बाने। जब आले डी पपासा टे धुक्काऊवा मेटे डीच आलेके हमेशा डी पपासा टे बचातिंजू गा कोरा जेबा, ताकी आले डीके सेहेसेन गा घल्जी मजबूत आरुवा। मूर्तीपुजा टे लेंक्कीन थंदळे 14 इनी वोजीटे, हे इंजा प्यारे विश्वासी डाईचो मूर्तीपुजा टे लेंक्कीन थंदळे। 15 इंज आपेके समझदार चिनाटे, आपेटे इनी मंडीवा मेना, कि ध्यान टे सोचातिंजे कि जो बातो इंज आपेटे मंडी चेल्के मेना डी सही या बाने। 16 जब आले प्रभु भोज गेन उपयोग डाऊ मिनी कटोरी टे अंगूर गा रेस्सो नुनूवा होय, डेगा घल्जी आले परमेश्वर के धन्यवाद जेबा होय, मेटे आले आए टेमोन मसीह गा पचना गेन बेल्लाऊवा होय। 17 चोयाकी म्या सोकळा इनी बातो गा चिन्हा होय, कि आले जो घोनेच होय, मसीह गेन म्या कोम्बोर होय चोयाकी आले सेबाईकु म्या सोकळा गा तालाटे जोम्बा होय। 18 इस्राएली कुरकू गा रिवाज के डोगे, जब सेबाई कुरकू परमेश्वर के पेळेच्के मिनी आटा के जोम्बा होय, मेटे परमेश्वर गा आराधना गेन हिसा सवा होय। इनिका खिजा जो कुरकू मूर्तिनौर के बलिदान पेळेच्के मिनी आटा जोम्बा होय, दिकुभी डी मूर्तिनौर गा आराधना गेन हिसा सवा होय। 19 इंज चोच मंडे कि कोशिश दडा लक्के मेना? चोच इंज इनी मंडी लक्के मेना कि मूर्तिनौर आसली गोमेच होय, दियागा घल्जी बलिदान डाएवा होय एठा इनी बलिदान थोळाका किमती गा थंदळवा होय? बाने! 20 इंज इनी मंडी लक्के मेना कि जो चीजो के अलग्गो जाटो गा कुरकू मूर्तिनौर के बलिदान दडावा होय, दिकु परमेश्वर गा घल्जी बान दडा, पेनो भूतोकु गा घल्जी बलिदान दडावा होय एठा इंज बान चाहता, कि आपे भूतोकु गा बेल्लाऊ। 21 आपे प्रभु गा कटोरी एठा भूतोकु गा कटोरी बाएरा गा तालाटे बान नुनू साकता। 22 अगर आपे येनोगो दडावा होय, मेटे आपे पक्का रुपोटे प्रभु के खीजोकेच्बा होय। यादो डोकी कि आपे प्रभु टे जादा ताखातदार बाऊ होय। मसीह आजादी 23 आपे मंडी होय, “आले चोच्काभी दडा गा घल्जी आजादके होय” हें आले आजादके होय भी, लेकिन आलेगा घल्जी सेबाई चोच्का अच्छा बाऊ होय। आले चोच्काभी दडा गा घल्जी आजादके होय, लेकिन सेबाई चोच्का परमेश्वर गेन आलेगा विश्वास के मजबूत बान दडा होय। 24 हर जेका आपना बाऊ, बनकी दूसराकु गा घल्जी गा ध्यान भी डोए। 25 हाटीन जो जिलु किजिऊवा होय, डीके आपे मन गा शांती गा घल्जी पूछताछ डाके बिना जोमे सकतावा होय। 26 चोयाकी जैसा पवित्र ग्रंथ गेन मंडीके मेना होय, “पृथ्वी एठा डेन जो चोच्का होय डी सेबाई प्रभु गा होय।” 27 जब अविश्वासीकु तालाटे जेका आपेके निमंत्रण जेबा होय एठा आपे सेने चाहतावा होय, मेटे जो चोच्का कटींजेवा होय डीके मन गा शांती गा घल्जी पूछताछ डाके बिना जोमे सकतावा होय। 28 पेनो अगर जेका आपेटे मंडे, “इनी घोमेजकु के बलिदान पेळेच्के मिनी जिलु होय,” मेटे घागल मिठाच एठा मन गा शांती गा वोजीटे डीके बाकी जोम। 29 इंजा मतलब इनी होय, कि दियाटे अमा मन गा बाने, पेनो दूसराकु गा भला होय, इंजा आजादी तुनिका दूसरा कोरो गा द्वारा रोकातिंज्की होना? 30 अगर इंज धन्यवाद गा प्रार्थना दडा गा बादोन खानान बेल्लाएन मेना, मेटे जो आटा गा घल्जी इंज परमेश्वर के धन्यवाद जेबा मेना, डेगा वोजीटे जेका के इंजा निंदा दडा गा हाक बाऊ। 31 इनिघल्जी आपे कुरकू चाहे जोमे या नोए, जो चोच्काभी डाए, सेबाई परमेश्वर गा महिमा गा घल्जी डाए। 32 आपे जेका गा घल्जी खेडा गा वाजा बाकी आरु, न यहूदी कुरकू गा घल्जी एठा न यूनानी कुरकू गा घल्जी एठा न परमेश्वर गा मसीह गा मंडली गा घल्जी। 33 इंजभी इंजा बारेन गा बाने, बनकी दूसराकु गा बारेन गा ध्यान धोटे सेबाई बातोन सेबाईकु के कुखोशो गा कोशिश दडावा मेना, देटे दिकु उध्दार हासिलजा होना। |
Gowli (गवली) Bible by The Love Fellowship is licensed under Creative Commons Attribution-ShareAlike 4.0 License.
Beyond Translation