1 ಕೋರಿಂಥ್ 1 - गवली उनाई नियमनमस्कार 1 इंज पौलुस इनी पत्र ओल लक्के मेना, जो मसीह यीशु गा कलामके मिठाच चेला आरु गा घल्जी परमेश्वर गा कोनेटे हकोकेमी मेना। इंज येटेन आलेगा सोप्ती डाई सोस्थिनेस गा सेंग्गो मेना, 2 इंज कुरिन्थुस शहर गा मसीह गा मंडली के ओल लक्के मेना, जो चोखरा आरु गा घल्जी हाकोके होय। परमेश्वर नी आपे कुरकू के डेनोगोका चोखरा केकु, जैसा डीचनी हर जगान सेबाई कुरकू के डाके, जो आलेगा प्रभु यीशु मसीह लिंजेन भरोसा दोडोवा होय। 3 इंज इनी प्रार्थना दडावा मेना कि आलेगा बाटे परमेश्वर एठा प्रभु यीशु मसीह आपे कुरकू के कृपा यानेकी शांती जे चाले। पौलुस गा परमेश्वर के धन्यवाद 4 इंज आपेगा बारेन इंजा परमेश्वर गा रोजका धन्यवाद दडावा मेना, चोयाकी आपेके यीशु मसीह द्वारा परमेश्वर गा कृपा घाटाएन मेना होय। 5 इनिघल्जी मसीह गा सेंग्गोन बेल्लाटे आपे सेबाई वचन एठा सेबाई ज्ञान गेन लकपाती आरोएन होय। 6 एठा परमेश्वर नी इनी बातो के साबित डाके होय, कि मसीह गा बारेन खाबोर सच्चो होय। 7 इनिघल्जी आपेन नी तुनिका आत्मिक दान गा कमी बाऊ होय एठा नका आपे आलेगा प्रभु यीशु मसीह गा डाबोलटे ओट गा तथाराव लक्के होय। 8 परमेश्वर आपेके आखरी टाएन विश्वास गेन मजबूत आरुका डोकोम्बा देटे आपे आलेगा प्रभु यीशु मसीह गा हिरा गा दिन निर्दोष डोयु होना। 9 परमेश्वर येनेगो इनिघल्जी डाएवा, चोयाकी डीच विश्वास लायको होय एठा डीच जो मंडीवा होय, डीका डाएवा भी, एठा डीचनी आपेके हेजा कोणटे यीशु मसीह आलेगा प्रभु गा सेंग्गोन म्या रिश्ता गेन हाकोकेमी होय। कुरिन्थुस शहर गेन मसीह गा मंडली गा दलबन्दी 10 हे विश्वासी डाईचो, आलेगा प्रभु यीशु मसीह गा जीमू लिंजेन इंज आपे कुरकू टे इनी अनुरोध दडावा मेना, कि आपे कुरकू म्या मुठ्ठो टे दलबन्दी टे लेंक्कीन थंदळे। आपे इनिज-दियाटे मिलातिंजे एठा दिल यानेकी मन टे पूरा रुपोटे म्याजू। 11 चोयाकी हे इंजागा विश्वासी डाईचो, खलोए गा खटला टे इंजेन पता घाईय्ये होय, कि आपे कुरकू गेन अलग्गो बोचोएन होय। 12 इंजा मंडी गा मतलब इनी होय कि आपे तालाटे जेका मंडीवा होय, “इंज पौलुस गा मेना”, एठा जेका मंडीवा होय, “इंज अपुल्लोस गा मेना”, एठा आफाई मंडीवा होय, “इंज कैफा गा मेना”, एठा जेका मंडीवा होय, “इंज्नी मेटे मसीह गा मेना।” 13 इनी अच्छा बाऊ होय कि मसीह के समूहनौर गेन कटिंजकेच! चोच इनिज पौलुस डा जो आपेगा पापो गा घल्जी क्रूस लिंजेन गोएन मेना डा? चोच आपे कुरकून पौलुस गा जीमू लिंजेन बपतिस्मा घाटाएन होय? बिलकुल बाने! 14 इंज परमेश्वर गा धन्यवाद दडावा मेना, कि इंज्नी इंकिंज बर्खिंज क्रिस्पुस एठा गयुस के आरागेच, आपे तालाटे जेकाकेभी बपतिस्मा बान जिडुका। 15 इनिघल्जी जेका इनी बान मंडी सकता कि आपेके पौलुस गा लिंजेन बपतिस्मा घाटाएन होय। 16 हें! इंज्नी स्तिफनास गा खटला के भी बपतिस्मा जीके। देटे टाएन इंजेन यादो होय, इंज्नी इंकुगा अलावा तुनिका दूसराके बपतिस्मा बान जिडुका। 17 चोयाकी मसीह नी इंज्के बपतिस्मा जिऊ बाने, बनकी अच्छा खाबोर गा घागल कुल्केमी होय। इंज्नी इनी कामय गा घल्जी दुनिया गा ज्ञान गा उपयोग बान दडुका, देटे मसीह गा क्रूस गा खाबोर वोया ठहरातिंजूबा। क्रूस गा शिक्षा 18 जो नशो गा कोरा लिंजेन सेंदरावा होय, दिकु क्रूस गा शिक्षा के “मुर्खपणा” समझातिंजेवा होय। पेनो आले कुरकू गा घल्जी, जो उध्दार गा कोरा लिंजेन सेंदरावा होय, डी परमेश्वर गा शक्ती होय। 19 चोयाकी पवित्र ग्रंथ गेन ओलके होय, “इंज ज्ञानमिंकू गा ज्ञान नाशोएवा एठा समझदारकु गा समझो वोया कीवा।” 20 मेटे डाबोलटे, आले दिमागदार कुरकू गा बारेन चोच मंडी सकतावा होय? एठा आले मूसा गा नियम इथूमिंकू गा बारेन भी चोच मांडे? एठा आले दुनिया गेन येनेगो कुरकू गा बारेन चोच मंडी सकतावा होय, जो मंडी गेन चतुरु होय,? परमेश्वर नी दिकु सेबाईकु के मूर्खा आरुकेकु होय एठा दिकुगा दिमाग के बेकार टिपीके होय। 21 इंज येनोगो इनिघल्जी मंडीवा मेना, चोयाकी परमेश्वर नी समझदारी टे इनी निर्णय सावे डा, कि इनी दुनिया गा कुरकू इकुगा दिमाग गा द्वारा डीचके चिचाना गेन सक्सेदू बाने। इनिघल्जी परमेश्वर डी कुरकू के बचातिंजकुवा होय, जो आलेगा द्वारा प्रचार गा डाके मिनी अच्छा खाबोर के मनातिंजेवा होय, चाहे डी कुरकू इनी शिक्षा के मूर्खा समझातिंजेवा होय। 22 इनी यहूदी कुरकू के मूर्खापूर्णा लगातिंजुवा होय चोयाकी दिकु इनी साबित दडा गा घल्जी स्वर्ग टे म्या चिन्हा चाहतावा होय कि इनी सच्चो होय। एठा यूनानी कुरकू गा घल्जी भी होय, जो कोरोकु गा ज्ञान चाहतावा होय। 23 पेनो आले प्रचार दडावा होय कि मसीह आलेके आलेगा पापो टे आरा गा घल्जी क्रूस लिंजेन गोएन। इनी यहूदी कुरकू गा विश्वास गेन आळचोन होय एठा अलग्गो जाटो गा कुरकू गा घल्जी मूर्खापणा। 24 पेनो परमेश्वर गा कलाम्केमिंकू कुरकू गा घल्जी, चाहे दिकु यहूदी होय या यूनानी, इनिका मसीह परमेश्वर गा शक्ती, एठा परमेश्वर गा ज्ञान होय। 25 चोयाकी परमेश्वर गा मूर्खापणा कोरोकु गा ज्ञान टे चोटोका येठाभी ज्ञानमिंकू होय। एठा परमेश्वर गा कमजोरी कोरोकु गा येठाभी शक्तीशाली होय। बस प्रभु गेन घमंड 26 हे विश्वासी डाईचो, आपना हाल के यादोए कि हाकोकेमी टेमो दुनिया गा नजर गेन आपे कुरकू तालाटे घोनेच काम कुरकू ज्ञानी, शक्तीशाली यानेकी लकपाती डा। 27 ज्ञानी कुरकू के सेरोम दडा गा घल्जी परमेश्वर नी डी कुरकू के कलाम्केकु होय, जो दुनिया गा नजर गेन मूर्खा होय। एठा शक्तीशाली कुरकू के सेरोम दडा गा घल्जी परमेश्वर नी डी कुरकू के कलाम्केकु होय जो दुनिया गा नजर गेन कमजोर होय। 28 एठा गुणमिंकू कुरकू गा घमंड चुचारा गा घल्जी परमेश्वर नी डी कुरकू के कलामजेकु जो दुनिया गा नजर गेन निज होय, तुच्छा होय एठा जो चोच्काभी बाने होय। 29 देटे तुनिकाभी कोरो परमेश्वर गा सम्मान घमंड बाकी दडा। 30 डीका परमेश्वर गा वरदान टे आपे कुरकू यीशु मसीह गा अंगो आरोएन होय। एठा परमेश्वर नी मसीह के आलेगा घल्जी ज्ञान, धार्मिकता, पवित्रता एठा पापो टे आरा आरुकेमी होय। 31 इनिघल्जी जैसा कि पवित्र ग्रंथ गेन ओल्के होय, “अगर जेका घमंड दडा चाहतावा, मेटे डीच प्रभु लिंजेन घमंड डाए।” |
Gowli (गवली) Bible by The Love Fellowship is licensed under Creative Commons Attribution-ShareAlike 4.0 License.
Beyond Translation