Yohana 8 - I CILAGANE CIPYA 1991

U mucekulu mono yebatwa yakusenyha

¹ Wose wakeyagala munhu kwakwe munhu kwakwe, ninga Yesu yakabita ku kwitunda lye Mizeyituni.

² Waza kwela hakali mitondo, yakaza kanyhi mu Nyumba yo Mulungu. Wanhu wose wakamuziza, nayo Yesu yakekala yakawa kuwejiza.

³ Iwejizi wo Wulajilize ne Wafalisayo, wakamuleta mucekulu yunji mono yaganizwa mu wusenyha. Wakamuwika haciligati yawo.

⁴ Wakamuwuza Yesu wakutya, “Mwijizi! U mucekulu yuyu yebatwa yakusenyha.

⁵ Na mu Wulajilize wetu, Musa yacilajiliza vyono ciwatowaje ne mabwe i wacekulu wono wenha yuyu. Alu agwe ma wukutya wule?”

⁶ Wazilonga zinghani zizi wakumujela, ho watuje nzila yo kumusonjezeza. Ninga Yesu yakenama hasi, yakandika mu muhangha ne cidole.

⁷ Waza kucila kumuwuza, Yesu yakenuka yakawatya, “U munhu mono yasina wubi muli nyenye yo yaweze mulongozi kumugumilila libwe.”

⁸ Kanyhi yakenama yakajendelela kwandika mu muhangha ne cidole.

⁹ Waza hulika nhavivyo, wakawa kwamula kulawila yumonga yumonga, wakamula i wakombi. Yesu yakasigala yali wene, nayo mucekulu yuyulya yakekala yemile bahalya du.

¹⁰ Yesu yaza kwinuka, yakamuwuza mucekulu yuyo yakutya, “Alu gwe go yaya, iwanhu walya wali hayi? Alu hasina hamba yumonga mono kakulingʼaniza?”

¹¹ Nayo u mucekulu yuyo yakapitula yakatya, “Hasina hamba yumonga Muwaha!” Nayo Yesu yakamutya, “Hamba na nene si nghukulingʼaniza. Ubite, ninga vyono kulawa lulu, wulece kwituma kanyhi wubi.”]

Yesu wuzelu we yinze

¹² Yesu lono yaduwaga ne Wafalisayo kanyhi, yakawalonjela, yakutya, “Ane yo nene wuzelu we yinze. Mono yakunhyatya nene, si kojendela lukulu mu wutitu, langa kowa no wuzelu wo wumi.”

¹³ Holeka Wafalisayo wakamutya, “Agwe ukwihomelela go mweneco, holeka wuhomelezi wako si wa mbeka.”

¹⁴ Yesu yapitula yakawatya, “Ninga ane hamba niyihomelele no mweneco, wuhomelezi wangu wa mbeka, hambi nha manyile kono nalawa, na kono nghubita. Ninga anye si mumanyile kono nalawa, hamba kono nghubita.

¹⁵ Anye mukuwa kutyatya mahweso ge cimunhumunhu mu ningʼaniza zenyu, ninga ane si nghuwa kumulingʼaniza munhu.

¹⁶ Hamba niwe nghulingʼaniza, ningʼaniza yangu nha ya mbeka, hambi ane nha si nili wene, langa cina na Baba mono yanhuma.

¹⁷ Na mu Wulajilize wenyu yandikwa vyono, wuhomelezi wa wanhu wejete wo we mbeka.

¹⁸ Ane nghwiyihomelela no mweneco, na Baba mono yanhuma nayo yakuhomelela zangu.”

¹⁹ Baho nawo wakamutya, “U Sogo yali hayi?” Yesu yakawatya, “Anye vyono si mumanyile ane, yo yikuleka si mumumanyile na Baba. Ninga hono mwali mumanye ane, mwali mumumanye na Baba nha vivyo.”

²⁰ Yesu yazilonga zinghani zizi lono yejizaga mu Nyumba yo Mulungu, lono yali mu cinyumba cono cali wuwiko we cisanduku ce vilavya. Hamba munhu si yamwibata, hambi i cidaha cakwe nha cali cikali si cinafika.

Kono nghubita ane, anye si mosuma kuza

²¹ Yesu yakawalonjela kanyhi yakatya, “Ane nghubita, anye monondola, ninga molofwa no wubi wenyu. Kono ane nghubita, anye si mosuma kuza.”

²² Nawo walongola we Wayahudi wakatya, “Alo kokwiwulaga?” Hambi nha yakutya, “Kono ane nghubita, anye si mosuma kuza?”

²³ Yesu yakawatya, “Anye muli wa baha hono hasi, mono yinze yiyi, ninga ane nili wa ku wulanga, anye muli wenze yiyi, ane langa si nili wenze yiyi.”

²⁴ Holeka nimulonjelenyi vyono, molofwa no wubi wenyu. Kusoko hono mulece kwihuwila du vyono “Ane yo nene.” Molofwa no wubi wenyu.

²⁵ Nawo wakamuwuza wakatya, “Alo agwe yo gwegwe nani?” Yesu yakawatya, “Nha nimulonjelenyi kulawa mwamulizo!

²⁶ Nina nghani nyinji zo kulonga, no kulavya ningʼaniza mulinye. Ninga mono yanhuma yo we mbeka, nane nghuwalonjela iwanhu we yinze, zinghani zizo du, zono nazihulika kuli mwene.”

²⁷ Nawo hamba si wasuma kumanya, vyono Yesu yalongaga nawo muli zo Sogwe.

²⁸ Holeka Yesu yakawalonjela “Kolo mwakondya kumutumbika Mwana wo Munhu, baho ho molomanyila vyono ‘Ane yo Nene.’ Na kanyhi vyono si nghwitumila cinji co cose mu wulajilize wangu, langa nghulonga zizilya du zono nejizwa na Baba.

²⁹ Nayo mono yanhuma, yali hamonga nane. Nayo si yakuwa kundeka nili wene. Hambi ane nha nitumaga nhondo zose zono zikumwendeza.”

³⁰ Nayo yaza kukondya kulonga zinghani zizi, iwanhu wenji wakamwihuwila.

I mbeka yomupelenyi welecele

³¹ Yesu yakawalonjela Wayahudi wawalya wono wamwihuwila, yakatya, “Hono mwibate i mejizo gangu, mbeka mowa wejizwa wangu.

³² Nanye moyimanya i mbeka, nayo i mbeka yomuwicenyi welecele.”

³³ Nawo wakamupitula wakatya, “Ase cili mbeyu ya Abulahamu, nase cikali si cinawa wawanda wa munhu wo wose.” Alu wina sokoci yo kutya, “Mowa welecele?”

³⁴ Yesu yakawapitula yakuwatya, “Mbeka nghumutyenyi, munhu wo wose mono ketumaga wubi, yo muwanda wo wubi.

³⁵ No muwanda si kekalaga mu nyumba nhondo zose, u mwana langa yo kekalaga mu nyumba nhondo zose.

³⁶ Holeka u Mwana hono yamuwicenyi welecele, ho mowa welecele mbeka.

³⁷ Manyile vyono muli mbeyu ya Abulahamu. Ninga hamba nhavivyo, mukusaka kumbulaga, vyono si mukuyivumila i nghani yangu.

³⁸ Ane nghulonga zono nawona kwa Baba, nanye mukwituma zono mwahulika ko sogo yenyu.”

³⁹ Nawo wakamupitula wakutya, “Abulahamu, yo sogo yetu.” Yesu yakawatya, “Mhali anye mwali muwe muli wana wa Abulahamu, mwali mwitume vyono yetumaga Abulahamu.

⁴⁰ Ane nghumulonjelenyi imbeka yono nayihulika kuli Mulungu, hamba nhavivyo anye mukusaka kumbulaga. Abulahamu siyetuma nhavivyo.

⁴¹ Anye mukwituma i metumo gagalya gono wetumaga wasogo zenyu.” Nawo wakamutya, “Ase si cili wana watumulwa, langa cina sogo yetu yumonga du, Mulungu.”

⁴² Yesu yakawatya, “Mhali Mulungu yo Sogo yenyu, mwali munyende ane, hambi ane nha nalawa kuli Mulungu nghaza baha. Hamba si neyiziza ko wulajilize wangu no mweneco, langa umwene yo yanhuma.

⁴³ Alu kusokoci si mukwizuka zono nghulonga? Kusoko vyono si mwendile kuyihuliciza inghani yangu.

⁴⁴ Anye muli wana wo sogo yenyu Setani, no wusulumizi wa yuyo sogo yenyu, wo mwendile kuwituma. Mwene yali muwulaji kulawa mwamulizo, hamba si kemaga mu mbeka, vyono muli mwene, imbeka yili musina. Hono yakulonga wulambi, kalongaga i zakwe mweneco, nha vyono yenha, hambi nha mulambi, kanyhi yo sogwe yo wulambi.

⁴⁵ Ninga ane nghulonga imbeka, holeka nanye si mukunyihuwila ngʼo.

⁴⁶ Hambi lu, nani wa muli nyenye mono kosuma kundajila zo wubi wangu? Alu hono nghulonga mbeka, nhawule si mukunyihuwila?

⁴⁷ Wo Mulungu nha kahulikaga zinghani zo Mulungu. Ninga anye si mukuhulika, vyono anye, si muli wanhu wo Mulungu.”

Lono Abulahamu yali yakali nalelwa Yesu yali yali baho

⁴⁸ Iwayahudi wakapitula wakamutya, “Alo si cikulonga mbeka vyono uli Musamaliya, na kanyhi wina macisi?”

⁴⁹ Yesu yakawatya, “Ane sina macisi, ninga ane, nimogopaga Baba. Ninga anye si mukunyogopa ane ngʼo.

⁵⁰ Ninga ane si niyilondolelaga lukumyo lwangu no mweneco, ko yuli yunji mono kalondolaga lukumyo lulo, nayo yo Mulingʼanizi.

⁵¹ Ane nghumulonjelenyi mbeka, munhu hono yebate inghani yangu, si kolofwila lukulu.”

⁵² Iwayahudi wakamutya, “Alu nhondo ho camanya mbeka, vyono wina macisi.” Abulahamu yafwa, ne wawizi wafwa, nagwe wukutya vyono, ati, “Munhu hono yebate nghani yangu si kolofwila lukulu!”

⁵³ Alo agwe, ukwinoza wuli muwaha wumucizize u sogo yetu Abulahamu mono yafwa? Sunga ne wawizi nha wafwa. Alo u kwinoza nha wuli nani gwegwe?

⁵⁴ Yesu yakawapitula, “Hono niyikumye no mweneco, ulukumyo lwangu lowa si cinji. Baba yo yakunghumya, mono nanye mumutezaga Mulungu wenyu.

⁵⁵ Nanye hamba si mumumanyile ngʼo, ane langa nimumanyile. Na hono nitye si nimumanyile, nowa mulambi nha nyenye. Ninga alu nimumanyile, ne nghani yakwe niyibataga.

⁵⁶ U sogo yenyu Abulahamu yasecelela, vyono koliwona lizuwa lyangu, nayo yakaliwona, yakasangalala.”

⁵⁷ Nawo Wayahudi wakamutya, “Waco gwe, nha wukali naficila hamba myaka makumi mahano bwete, nagwe hongo wamuwona Abulahamu?”

⁵⁸ Yesu yakawatya “Ane nghumulonjelenyi mbeka, vyono lono Abulahamu yali yakali si nalelwa, ane nali nili baho.”

⁵⁹ Holeka wakatondola mabwe wamugumilile ninga Yesu yakehundika, yakalawaniza mu Nyumba yo Mulungu.