Yohana 7 - I CILAGANE CIPYA 1991

Yesu ne wanduguze

¹ Hanyuma ya zizi, Yesu yajendaga mu Galilaya, hamba si yendaga kujenda mu Yudiya, vyono i walongola we Wayahudi wahilaga kumuwulaga.

² Sikukuu ye Wayahudi ye vibanda yali yasejelela.

³ Baho i wanduguze wakamutya, “Uwuce bahano wubite ku Yudiya, iwejizwa wako ho wayiwone i milimo yono kwitumaga.

⁴ Hasina munhu mono ketumaga cinji cinyele hono yakuhila yamanyice ne wanhu. Holeka vyono ukwituma zizi, ale wilajilaje ho wumanyice mu yinze yose.” (

⁵ Sunga ne wanduguze, si wamwihuwila ngʼo.)

⁶ Yesu yakawalonjela yakutya, “Cidaha cangu cono cikwiliye cikali sinafika. Ninga kuli anye cidaha co cose cikwiliye.

⁷ Sunga na wanhu wa mononze, si wosuma kumusulenyi anye, langa ane wasulile, kusoko nghuwalonjela, vyono i metumo gawo mabi.

⁸ Anye mubite ku sikukuu yiyo, ninga ane si nghubita, kusoko i cipango cangu cono cikwiliye nha cikali sinafika.”

⁹ Yaza kuzilonga zizo, u mwene yakasigala kuko ku Galilaya.

Yesu ku sikukuu ye vibanda

¹⁰ Lono wanduguze wali wabita ku sikukuu, Yesu nayo ho yakawa kubita, ninga siyabita ciwonelela, langa yabita cinyele.

¹¹ I Walongola we Wayahudi wamulondolaga mu sikukuu yiyo, wakawuza wakutya, “Alu yali hayi mwene?”

¹² Kukawa na lupwepwe muli wanhu ku soko yakwe, wanji watezaga “Munhu muswanu.” Wanji wakatya, “Aa, ngʼo yakuwakonga wanhu.”

¹³ Hamba nha vivyo, hasina munhu mono yejelela kumulonga ciwonelela so kuwogopa i walongola we Wayahudi.

¹⁴ Lono sikukuu yali yikali yijendeleye, Yesu nayo yakenjila mu Nyumba yo Mulungu, yakawa kwanza kwijiza.

¹⁵ I Wayahudi wakezina muno, wakatya, “Munhu yuyu yamanyile nhawule ze mandiko, nayo si yejizwa?”

¹⁶ Nayo Yesu yakawapitula, yakawatya, “Imejizo gono nghwijiza, si gangu yaye, langa ga yuyo mono yanhuma.

¹⁷ Munhu mono yendile kwituma zono u Mulungu yendile, yo komanya hono mejizo gangu galawa kuli Mulungu, hamba nene nghwilonjela mu wulajilize wangu no mweneco du.

¹⁸ Ninga u munhu mono yakwilonjela mu wulajilize wakwe mweneco du, yakulondola u lukumyo lwakwe mweneco, ninga mono yakulondola u lukumyo lwa mono yamutuma, yuyo yaweza mwihuwilwa, na muli mwene musina wavu wo wose.

¹⁹ Alu Musa si yamupelenyi Wulajilize? Hamba nha vivyo, hasina yunji muyenyu mono kawibataga u Wulajilize. Alu ku sokoci mukusaka kumbulaga?”

²⁰ Iwanhu wakamupitula wakatya, “Alu mwene wina lukwale! Nani mono yakusaka kukuwulaga?”

²¹ Yesu yawapitula, yakawatya, “Hoyili nghani monga yono netuma, sunga nanye mukayizina.

²² Musa yakamupelenyi u moto we calamo, ninga si vyono u moto wuwo we calamo walawa kuli Musa, langa walawa kuli wasogo zetu. Nanye hamba mwizuwa lye Sabato muwategulaga wanhu ku calamo.

²³ Alu hono munhu yadahile kutegulwa ku calamo na mwizuwa lye Sabato, Wulajilize wa Musa si wukusuma kuhodanjika, ku soko yiyo, alu sokoci, anye mukumbonela ikuwo, vyono nimuponezye lukulu u munhu mwizuwa lye Sabato?

²⁴ Mulece kulingʼaniza so wulanga za munze du, langa mweze kulavya ningʼaniza ye mbeka.”

Wulenyi, yo yuyu Kilisito?

²⁵ Wanji wanya Yelusalemi wakatya, “Wulenyi, u munhu mono wakumulondola wamuwulaje, si yo yuyu?

²⁶ Na kumbe lanje, yakuwalonga ciwonelela, hamba hasina munhu mono yakumutya cinji. Alo yisumice walongola mbeka wowa wamumanya vyono yo mweneco Kilisito

²⁷ Ninga Kilisito kolo yakuza, hasina munhu mono komanya kono yalawile, ninga munhu ayu ase cimumanyile kono yalawile!”

²⁸ Holeka Yesu lono yejizaga mu Nyumba yo Mulungu, yakenula lizi lyakwe, yakatya, “Ati, mumanyile hongo, sunga na kono ndawile mukumanyile! Hamba yiwe nha vivyo, ane si neyiziza ko wulajilize wangu no mweneco, ninga u mwene mono yanhuma yo we mbeka, nanye si mumumanyile.

²⁹ Ninga ane nimumanyile, hambi nha nalawa kwakwe, nayo yo yanhuma.”

³⁰ Baho wanhu wakasaka kumwibata, ninga hasina hamba munhu mono yejelela kumwibata, vyono cidaha cakwe cali cikali nafika.

³¹ Wanhu wenji wa mwipuga lililya lye wanhu wakamwihuwila, wakatya, “Wulenyi ti, Kilisito kolo yakuza, konoza vitanjilo yicizize vyono yanozize yuyu?”

I wasilikale walindilizi wakutumwa wamwibate Yesu

³² Iwafalisayo wakahulika iwanhu wakupwepwa zizo za Yesu. Holeka Wafalisayo, hamonga ne wakohani wawaha, wakatuma wasilikale wamwibate Yesu.

³³ Yesu yakatya, “Nghali nili hamonga nanye kwa cipango cidodo, hanyuma nobita kuli mwene mono yanhuma.

³⁴ Monondola hamba si mombona, ku soko hono nowa, anye simosuma kuza.”

³⁵ Walongola we Wayahudi wakeyitya weneco wose, “Alo kobita hayi munhu yuyu, ase ho cilece kumuwona?” Alo kobita kuli Wayahudi wono weyagalila ku Wagiliki, no kuwejiza Wagiliki?

³⁶ Alo yena nhunizo ci, hono yakutya, “Monondola ninga si mombona, na hono nowa, anye si mudahile kuza?”

Makolongo ge malenga momi

³⁷ Mwizuwa lyo mumalilizo we sikukuu yiyo, lyali izuwa iwaha. Yesu yakema yakalonga yenuye lizi, yakutya, “Munhu wo wose, mono yakaluce, yaze kwangu yangʼwe.”

³⁸ Nha vyono gakutya i Mandiko Gono Gelile, “Mono yakunyihuwila nene, i makolongo ge malenga momi, gohuluma kulawa mu nhumbula yakwe.”

³⁹ (Yalonga zizo, yakulonga zo Muhe Mono wolomubocela wono wamwihuwiye mwene. Mu cipango cico u Muhe yali yakali si naza, vyono Yesu yali yakali si nakumywa.)

Witemanuce we wanhu muli za Yesu

⁴⁰ Wanji wa mwipuga lililya lye wanhu, wamuhulika yakulonga zinghani zizi, wakatya, “Mbeka munhu ayu yo muwizi.”

⁴¹ Iwanji wakatya, “Nha yo mwene Kilisito.” Ninga wanji wakatya, “Alu yosumika Kilisito yalawe ku Galilaya?”

⁴² I Mandiko Gono Gelile gakutya wule? Gakutya, “Kilisito kolawa mu mbeyu ya Dawudi na kolelelwa ku Betelehemu, mu kaya ya Dawudi.”

⁴³ Baho gakejela matemanuko mu mhuga ye wanhu ku soko ya Yesu.

⁴⁴ Iwanhu wanji wasakaga kumwibata, ninga hasina mono yakajela kumwibata.

I walongola we Wayahudi wasina wihuwilo

⁴⁵ Baho iwasilikale, wakawuya kuli wakohani wawaha ne Wafalisayo, nawo wakawawuza wakutya, “Alu nhawule si mumuletile?”

⁴⁶ Nawo Wasilikale wakawapitula wakatya, “Yakali nejela hamba nhavi munhu mono yalonga, nha vyono yakulonga yuyu.”

⁴⁷ Wafalisayo wakawapitula wakutya, “Alu sunga na nyenye wose mwakongwa?

⁴⁸ Wulenyi, mumuwene hamba yunji wa muli walongola we wanhu, hamba yunji wa mu Wafalisayo mono yamwihuwiye?

⁴⁹ Ninga ilipuga lili, si liwumanyile u Wulajilize wa Musa, ilijitwe.”

⁵⁰ Yunji muyawo yali yo Nikodemo yuyulya mono baho halulongozi yamuziza Yesu. U mwene yakawatya,

⁵¹ “Wulenyi ta, u Wulajilize wetu wukuwa kumulingʼaniza munhu lono yakali nahulicizwa, hamba kumanya cono yetumile?”

⁵² Nawo wakamupitula wakumutya, “Alu nagwe nhavivilya kulawa ku Galilaya? Ale wulondole, wulanje mu Mandiko Gono Gelile, nagwe kowona vyono, muwizi si kolawa ku Galilaya hamba nhavi.”