Yohana 6 - I CILAGANE CIPYA 1991

Yesu yakuwalisa ndigwa wanhu Elufu yihano

¹ Hanyuma ya zizi, Yesu yakabita ku nhumbi nzagwe ye lilamba lya Galilaya, lyo lye Tibeliya.

² Ne mhuga mbaha ye wanhu wakamutyatya kuko, hambi iwanhu wawo nha wali waziwona ivitanjilo vyono yanozaga vyo kuwaponya i watamwa.

³ Yesu yakabita mwitunda mucanyha, yakekala ne wejizwa wakwe.

⁴ I Pasaka, sikukuu ye Wayahudi yali yasejelela.

⁵ Nayo Yesu yaza kulanga, yakawona mhuga ye wanhu wakumuziza, yakamutya Filipo, “Alo cogula hayi ndigwa wanhu wawa walye?” (

⁶ Yalongaga zizo yakumujela Filipo, hambi nha yali yamanyile mwene yono kokwituma.)

⁷ Filipo yakamupitula yakatya, “Mikate ya dinali magana mejete, si yowakwila wanhu wawa, hamba munhu yasole cidodo munhu cidodo.”

⁸ Yumonga muyagwe ne wejizwa wakwe, mono yacemagwa Andeleya, u mwanakwawe wa Simoni Petelo, yakamutya.

⁹ “Yali bahano mudodo yumonga, mono yena mikate mihano ya Sayili ne zisomba nyejete; ninga vivi vyokwila cici kuli wanhu wenji nha wawa?”

¹⁰ Yesu yakatya, “Muwekazaje wanhu.” Kuko kwali na mahanze menji. Ale, wanhu wakekala hasi, nawo wali waficile liwalo lyawo, wanhu walume nha Elufu yihano.

¹¹ Baho Yesu yakayisola i mikate yiyilya, yakamulumbo Mulungu, yakawagawila wanhu wono wali wekaye, ne zisomba nhavivyo, na wose wakatuga munhu ha nghango yakwe.

¹² I wanhu waza kwiguta, yakawalonjela i Wejizwa wakwe, “Alu mutondoleze ivibegulwa vyono visigaye, cinji cilece kwajilila.”

¹³ Wakatondoleza ivibegulwa vye mikate mihano ye sayili vyono wasigaza wanhu wono walya, wakamemya nhoto ikumi na nyejete.

¹⁴ Iwanhu wawo waza kuciwona citanjilo cono Yesu yanozize, wakatya, “Ayu he yo muwizi mbeka, mono yakuza kononze.”

¹⁵ Yesu yaza manya vyono wanhu wasakaga kumusola wamunoze yawe mutemi, yakawuka kanyhi, yakawa kubita kwitunda, yali wene.

Yesu yakujenda mucanyha ye malenga

¹⁶ Yaza kuwa cinyamihe, wejizwa wakwe wakatenenhuka sunga kwilamba,

¹⁷ wakenjila mu ngalawa, wakawa kulowoka wakubita ku Kapelanawumi. Kukawa kwatukuwala, nayo Yesu yali yakali nawaziza.

¹⁸ Imalenga nago gakawa kwamula kutunhuma, so mbeho mbaha yono yaputaga.

¹⁹ Iwejizwa lono wali wajenda kotya nha kilometa yihano lunji mutandatu, nhavi, wakamuwona Yesu yakujendela mucanyha ye malenga, yakusejelela ha ngalawa, nawo wakawa kogopa muno.

²⁰ Ninga Yesu yakawatya, “Yo nene, mulece kogopa.”

²¹ Wakasaka kumudinghula Yesu mu ngalawa, ninga lo lulo lulo, ingalawa yikawa yafika ku yisi nghavu; hanhu hono wabitaga.

I wanhu wakumulondola Yesu

²² I mitondo yaco, i mhuga ye wanhu wawalya wono wasigala ku nhumbi nzagwe ye lilamba, wakamanya vyono hali hoyili ngalawa monga du baho, na vyono Yesu si yenjila mu ngalawa hamonga ne wejizwa wakwe, langa i wejizwa wawuka wali wene,

²³ zingalawa zinji zikalawa ku Tibeliya, zikafika behi na baho hono wanhu walile mikate mu cipango cono Muwaha yamulumbilo Mulungu.

²⁴ Holeka i wanhu wawo waza kumanya vyono Yesu ne wejizwa wakwe wali hasina baho, wakenjila mu ngalawa, wakaza ku Kapelanawumi wakumulondola.

Yesu yo ndigwa yo Wumi

²⁵ Iwanhu wawalya waza kumwagana Yesu ku nhumbi nzagwe ye lilamba, wakamuwuza wakutya, “Mwijizi, alu waza nili baha?”

²⁶ Yesu yakawapitula, yakatya, “Mbeka, nghumulonjelenyi, mukunondola, si vyono mwawona vitanjilo, langa vyono mwalya imikate mukeguta.

²⁷ Mulece kuyipiligalila indigwa yono yihodanjikaga, langa muyipiligalilaje indigwa yono yikalaga sunga ku wumi we cibitilila. U Mwana wo Munhu mono u Sogwe yamuwicila i citanjilo, yo komupelenyi indigwa yiyo.”

²⁸ Nawo wakamuwuza wakutya, “Alu citende wule, ho citume u wuhile wo Mulungu?”

²⁹ Yesu yakawapitula yakawatya, “Awu wo wuhile wono u Mulungu yakuhila muwitume, mumwihuwile mono yatumwa no Mwene.”

³⁰ Baho wakamutya, “Alo konoza citanjilo ci, ciciwone, nase ho cikwihuwile?”

³¹ I wasetu walya i mana ku nyika, nha vyono gakulonga i Mandiko Gono Gelile, “Yawalisa ndigwa kulawa ku wulanga.”

³² Yesu yakawatya, “Ane nghumulonjelenyi mbeka, vyono Musa yo si yamupelenyi nyenye ndigwa yiyilya yono yalawaga ku wulanga, langa Baba yo yakumupelenyi nyenye, indigwa ye mbeka yono yikulawa ku wulanga.

³³ Hambi indigwa yo Mulungu nha yo yulya mono yakutima kulawa ku wulanga, no kuyipela iyinze wumi.”

³⁴ Nawo wakamutya, “Muwaha, ucipelaje ndigwa yiyo nhondo zose.”

³⁵ Yesu yakawatya, “Ane yo nene ndigwa yo wumi. Mono yakuza kwangu, si kodabucila lukulu. Na mono yakwihuwila kuli nene, si kokalucila lukulu.”

³⁶ Ninga namulonjelenyi vyono hamba yiwe mukumbona, si mukunyihuwila.

³⁷ Wose wono yakumhela Baba wokuza kwangu, nane si nomutaga kunze wo wose mono yakuza kwangu.

³⁸ Hambi nha natima kulawa ku wulanga, si vyono nitume wuhile wangu, langa ho fisilize u wuhile wa mono yanhuma.

³⁹ No wuhile wa mono yanhuma nha wowu, “Ndece kumwajiliza hamba yumonga muli wose wono napegwa nayo, langa niwazukule wose mwizuwa lya ku ndumo.”

⁴⁰ Hambi cono yakusaka Baba nha coci, muli wose mono yakumuwona Mwana, no kumwihuwila, yawe no wumi we cibitilila, nane nolowazukula Mwizuwa lya ku ndumo.

⁴¹ Nawo Wayahudi wakawa kwanza kungʼungʼulika kusoko vyono yatya, “Ane yo nene i ndigwa yono yatima kulawa ku wulanga.”

⁴² Wakatya, “Mwene yuyu si yo Yesu u mwana wa Yusufu? sunga u sogwe no nyina ciwamanyile! Alu kosuma wule kutya yatima kulawa ku wulanga?”

⁴³ Yesu yapitula yakawatya, “Mulece kwingʼungʼulicila nyenye kwa nyenye.

⁴⁴ Hasina munhu mono kosuma kuza kwangu hono Baba mono yanhuma yalece kumukwejela kuliʼne, nane nolomuzukula u munhu yuyo mwizuwa lya ku ndumo.

⁴⁵ Yandikwa ne wawizi, ‘Iwanhu wose wokwijizwa no Mulungu.’ Muli wose mono yakumuhulika Baba, no kwiyijiza muli Mwene, yuyo yo yakuza kwangu.

⁴⁶ Si vyono lunji hoyuli munhu mono yamuwona Baba, langa yuyo du mono yalawa kuli Mulungu, yo yamuwona Baba.

⁴⁷ Mbeka nghumulonjelenyi, vyono mono yakwihuwila, yena u wumi we cibitilila.

⁴⁸ Ane yo nene indigwa yo wumi.

⁴⁹ I wasogo zenyu walizaga imana ku nyika, ninga wakafwa.

⁵⁰ Ayi yo ndigwa yono yikutima kulawa ku wulanga, indigwa yono mono yakuyilya si kofwa.

⁵¹ Ane yo nene indigwa yo wumi, yono yatima kulawa ku wulanga, munhu wo wose hono yalye indigwa yiyi, kokwikala mumi cibitilila, ne ndigwa yono nomupela, wo muwili wangu wono nghuwulavya so wumi we yinze.”

⁵² Holeka Wayahudi wakawa kwanza kwiwanganila weneco wose, wakutya, “Kosuma wule yuyu kucipela u muwili wakwe cilye?”

⁵³ Baho Yesu yakawatya, “Mbeka nghumulonjelenyi, Hono mulece kulya u muwili wo Mwana wo Munhu, no kuyingʼwa isakami yakwe, mowa musina wumi muli nyenye.

⁵⁴ Mono yakulya u muwili wangu no kuyingʼwa isakami yangu, yena wumi we cibitilila, nane nolomuzukula Mwizuwa lya ku ndumo.

⁵⁵ Hambi u muwili wangu nha yo ndigwa ye mbeka, ne sakami yangu co cingʼwegwa ce mbeka.

⁵⁶ Mono yakuwulya u muwili wangu no kuyingʼwa isakami yangu, yo kekalaga mugati mwangu, nane nghwikala mugati mwakwe.

⁵⁷ Baba u mumi yo yanhuma, nane nili mumi ku soko yo Mwene, yo nha vivyo nayo mono yakunyilya nene kowa mumi ku soko yangu.

⁵⁸ Ayi yo ndigwa yono yatima kulawa ku wulanga, si yinhe mana yono walizaga i wasogo zenyu, wakafwa. Mono yakulya ndigwa yiyo, kokwikala mumi cibitilila.”

⁵⁹ Yesu yazilonjela zizo mu nhangʼanilo yo wuhembelo, lono yejizaga ku Kapelanawumi.

I zinghani zono zikuleta u wumi we cibitilila

⁶⁰ Holeka wenji wa muli wejizwa wakwe, waza kuzihulika zizo wakatya, “He, azi nghani nghamu! Naniʼmbi mono kosuma kuzihulika?”

⁶¹ Ninga Yesu yakawamanya mweneco, hamba yunji si yamulonjela vyono wejizwa wakwe wakuyingʼungʼulicila inghani yiyo, yakawawuza yakutya, “Alo inghani yiyi yikumupelenyi mahwele hongo?

⁶² Yowa wule alu hono mumuwone u Mwana wo Munhu yakubita kuko ku wulanga kono yali ha lulongozi?

⁶³ U Muhe yo kaletago wumi, ninga munhu yali wene, sikosuma cinji. Izinghani zono nimulonjelenyi, wo Muhe wo Mulungu, kanyhi wo wumi.

⁶⁴ Ninga hamba nha vivyo ho wali wanji wa muli nyenye wono si wehuwiye.” (Yesu yalonga nha vivyo, hambi nha yali yamanyile kulawa mwamulizo vyono wa nani wono si wehuwiye, na kanyhi nani mono komugaluka.)

⁶⁵ Hanyuma yakatya, “Yo yilecile nghumulonjelenyi, vyono hasina mono kosuma kuza kwangu hono yalece kupegwa wusume na Baba.

⁶⁶ Ku soko ya zizo, wenji wa muli wejizwa wakwe Yesu wakawuya ne nyuma, hamba si wajendanaga nayo kanyhi.”

⁶⁷ Yesu yakawawuza wawalya we likumi na wejete, “Wulenyi nanye, mukuhila kubita?”

⁶⁸ Simoni Petelo yakamupitula yakatya, “Muwaha cobita kuli nani? Nha yo gwegwe mono wina zinghani zo wumi we cibitilila.

⁶⁹ Nase cihuwiye, kanyhi cimanyile, vyono yo gwegwe Mono Welile wo Mulungu.”

⁷⁰ Yesu yakawatya, “Alo si namuhagulenyi nyenye mo we likumi na wejete, hamba nha vivyo muyenyu monga muli nyenye yo setani!”

⁷¹ Yesu yamulongaga zizo Yuda u mwana wa Simoni Musikaliyota, ku soko yali yo yuyo mono komugaluka, hamba yawe yali yumonga wa wawalya we likumi na wejete.