Yohana 3 - I CILAGANE CIPYA 1991

Yesu na Nikodemo

¹ Kwali na munhu monga Muyahudi, mulongola we cipuga ce Wafalisayo, itagwa lyakwe Nikodemo.

² Yuyo yamubitila Yesu mwizuwa linji ne cilo, yakamutya, “Labi, cimanyile vyono wuli mwijizi mono watumwa no Mulungu. Hambi nha hasina munhu, mono kosuma kunoza vitanjilo vinha vivi vyono wukunoza agwe, hono Mulungu yalece kuwa hamonga nayo.”

³ Yesu yapitula yakamutya, “Ane nghukulonjela mbeka, vyono hono munhu yalece kulelwa wupya, si kosuma kuwuwona wutemi wo Mulungu.”

⁴ Nikodemo yakamuwuza yakatya, “Alu munhu hono yaza munhu mututu, kosuma kulelwa kanyhi? Si kosuma kwinjila muʼnda yo nyina ho yalelwe lwe kejete kanyhi.”

⁵ Yesu yakamutya, “Mbeka nghukulonjela, munhu hono yalece kulelwa kwe malenga no Muhe, sikokwinjilila lukulu mu wutemi wo Mulungu.

⁶ U munhu mu muwili, kalelagwa no sogwe no nyina, ninga mu cimuhe kalelagwa no muhe.

⁷ Wulece kwizina, vyono nghulonjeye, yinojeye kulelwa wupya.

⁸ I mbeho yiputilaga no kubita kono yendile, ne lizi lyayo wukulihulika, ninga si wumanyile kwihi kono yikulawa, hamba kwihi kono yikubita. Ale, nhavivyo vyo yenha munhu mono yaleligwe ko Muhe.”

⁹ Nikodemo yakamuwuza, yakatya, “Alu zosuma kuwa wule zizo?”

¹⁰ Nayo Yesu yamupitula yakamutya, “Alu, nha yo gwegwe mwijizi wa Isilayeli, hamba si wuzimanyile zizo?”

¹¹ Mbeka nghukulonjela, ase cilongaga zono cizimanyile, no kuhomelela zono caziwona, nanye si mukuwuvumila uwuhomelezi wetu.

¹² Ane nimulonjelenyi za kononze, nanye si munyihuwiye, alu ho mokwihuwila nhawule, hono nimulonjelenyi za ku wulanga?

¹³ “Hasina munhu mono yabita ku wulanga, langa hono si u Mwana wo Munhu, yo yatima kulawa ku wulanga.”

¹⁴ “Nha vyono Musa yatumbika lizoka lye shaba ku nyika, ale nha vivyo no Mwana wo Munhu, si koleka kutumbikwa,

¹⁵ muli wose mono yakumwihuwila, ho yawe no wumi we cibitilila.

¹⁶ Ku soko u Mulungu yayenda yinze nha vivi, sunga yakamulavyo Mwanagwe we ciwene, na muli wose mono yakumwihuwila, yalece kwajilila, langa yawe no wumi we cibitilila.

¹⁷ Hambi u Mulungu, nha si yamutuma Mwanagwe kononze, ho yayilingʼanize iyinze, langa ho yayikomboze.”

¹⁸ “Mono yamwihuwiye mwana si yakulingʼanizwa, mono si yamwihuwiye yakondya kulingʼanizwa, vyono si yamwihuwiye u Mwana we ciwene wo Mulungu.

¹⁹ Ne ningʼaniza yeneco nha yoyi, uwuzelu waza kononze, ninga wanhu wakenda wutitu si nho wuzelu, vyono metumo gawo mabi.

²⁰ U munhu wo wose mono ketumaga i metumo mabi, yuyo kawusulaga wuzelu, hamba si kazaga kono wuzelu, hambi nha si yendile i metumo gakwe mabi gamanyice.

²¹ Ninga mono ketumaga ze mbeka, yo kazaga kono wuzelu, ho metumo gakwe gejele vyono getumilwa mu cihuliko co kumuhulika u Mulungu.”

Yesu na Yohana u Mubaputizi

²² Hanyuma ya zizi, Yesu hamonga ne wejizwa wakwe, wakabita ku yisi ya Yudiya, yakekala nawo kuko, yakawa kubaputiza i wanhu.

²³ Yohana nayo yabaputizaga mu Ayinoni behi na Salimu, vyono kwali na malenga menji kuko, wanhu wakamubitila, nayo yakawabaputiza. (

²⁴ Hambi Yohana nha yali yakali si natajilwa mu jela.)

²⁵ Wukejela wiwanganile hagati ya wejizwa wanji wa Yohana, no Muyahudi yunji, kuli ze myoto yo kwizuguza.

²⁶ I wejizwa wawo wakamubitila Yohana, wakamutya, “Mwijizi, yuyulya mono mwali nayo ku nhumbi nzagwe ya Yoludani, mono wamuhomelela zakwe, alu mwene nayo yakubaputiza, ne wanhu wose wakumuziza.”

²⁷ Yohana yakapitula yakatya, “Munhu si kosuma kuwa na cinji, hono yalece kupegwa no Mulungu.

²⁸ Nyenye nyo weneco muli wahomelezi wa vyono nalonga ‘Ane yo si nene Kilisito, langa natumwa ho nimulongolele u mwene.’

²⁹ Bibi halusi yo wa bwana halusi, ninga mwendece wa bwana halusi, mono yemile yakuhuliciza, yakuwa na nyemo mbaha muno muno, lono yakumuhulika bwana halusi yakulonga. Ne nyemo yangu vyo yifisilizwe.

³⁰ Yinojeye Mwene yalawilicile, nane ndodomhe.”

Mono yakuza kuwulawa ku wulanga

³¹ Mono yakulawa ku wulanga, yalawiliciye muli wose, nayo mono yakulawa mononʼze, yo we yinze, nayo kalongaga zinghani ze ciyinzeyinze. Ninga mono yakuza kulawa ku wulanga, yo yalawiliciye muli wose.

³² Zono yaziwona na zono yazihulika zo yakuzihomelela, ninga hasina mono yakumubocela wuhomelezi wakwe.

³³ Ninga munhu wo wose mono yakuwubocela wuhomelezi wakwe, yakukangaza vyono, Mulungu yo we mbeka.

³⁴ Hambi mono yatumwa no Mulungu, nha yo kalongaga zinghani zo Mulungu, hambi u Mulungu nha yakumupela munhu yuyo Muhe wakwe wusina cipimo.

³⁵ U Sogo yo munhu yamwendile Mwana, Nayo yamupelile vinhu vyose.

³⁶ Mono yamwihuwiye u Mwana wo Mulungu, yena wumi we cibitilila; ninga mono si yakumuhulika u Mwana wo Mulungu, si kowa no wumi, langa; wulipicizwe wo Mulungu wo kwikala muli mwene.