Yohana 20 - I CILAGANE CIPYA 1991

I citenjelo cili bwete

¹ Mwizuwa lye jumapili, hakali mitondo muno muno, lono kwali kukali kutitu titu, Malyamu Magadalena yakabita ku citenjelo, nayo yakawona libwe yiwuse mu mulango we citenjelo.

² Nayo yakawa kubita lumangho sunga kwa Simoni Petelo, no mwijizwa muyagwe mono yali yendigwe na Yesu, yakawatya, “Wamuwusa Muwaha mu citenjelo, hamba si cimanyile hono wamuwicile.”

³ Petelo hamonga na yuyulya mwijizwa muyagwe, wakalawila, wakabita ku citenjelo.

⁴ Wabita lumangho wose vyono wejete, ninga u mwijizwa we kejete, yakamutiga Petelo, yakalongola kufika ku citenjelo.

⁵ Nayo yaza kwinama no kusunjilila mugati ye citenjelo, yakawona sanda du, ninga si yenjila mu citenjelo mugati.

⁶ Nayo Simoni Petelo yakaza, yakumutyatya munyuma, yakenjila mu citenjelo mugati, nayo yakayiwona sanda hamonga,

⁷ ne citambala cono cali ciwopwe mu mutwe wa Yesu. Ne citambala cico si cali ciwikwe hamonga ne sanda, langa cali cipetye, ciwicigwe hanji cili wene.

⁸ Nayo u mwijizwa muyagwe mono yalongola kufika, nayo ho yakawa kwinjila, yakawona, yakehuwila. (

⁹ Wali wakali si nagezuka i Mandiko Gono Gelile, gono galonga gakutya, “Yali yimunojeye yazuce muli wafu.”)

¹⁰ Iwejizwa wawo wakawa kuwuya kwawo kanyhi.

Yesu yakwilajila kuli Malyamu Magadalena

¹¹ Ninga Malyamu yali yemile ha citenjelo hanze yakulila, na lono yalilaga, yakenama, yakasunjilila mu citenjelo,

¹² yakawawona wamalayika wejete wavwalile vivwalo vizelu, wekaye bahalya hono muwili wa Yesu wali wuwicigwe, yumonga ku mitwe, no muyagwe ku magulu.

¹³ Wamalayika wawo, wakamuwuza wakutya, “Alu yaya wukulilila cici?” Mwene yakatya, “Wamuwusa Muwaha wangu, hamba simanyile hono wamuwicile!”

¹⁴ Yaza kukondya kulonga zizi, yakelenga kunyuma, yakamuwona Yesu yemile, hamba si yamanya vyono yo mwene Yesu.

¹⁵ Yesu yakamuwuza “Alu yaya wukulilila cici?” “Wukumulondola nani?” Nayo Malyamu, yatezaga lunji kowa yo mulindiliza busitani, yakamutya, “Muwaha, hono yo gwegwe wumusolile, wunonjele hono wumuwicile, nane nomusola.”

¹⁶ Yesu yakamutya, “Malyamu!” Nayo Malyamu yakapituka, yakamutya, “Laboni!” ku nonga ye Cihebelaniya, (nhunizo yayo “Mwijizi.”)

¹⁷ Yesu yakamutya “Wulece kungʼangʼanila, hambi nha nghali sininabita kucanyha kwa Baba. Langa wubite wukawalonjele wandugu zangu, vyono ane nghubita kuli Baba, mono nanye yo Sogo yenyu, na kuli Mulungu wangu, mono nanye yo Mulungu wenyu.”

¹⁸ Nayo Malyamu Magadalena yakabita, yakawalonjela wa walya iwejizwa nha vyono kamuwona Muwaha, na vyono yamulonjeye zizo.

Yesu yakwilajila kuli wejizwa wakwe

¹⁹ Mwizuwa lilyo lye jumapili cinyamihe, iwejizwa wali wehangulize hamonga mu nyumba mugati, ne milango yikawa midinde, kusoko vyono wawogopaga iwalongola we Wayahudi. Nayo Yesu yakaza, yakema haciligati yawo, yakawatya, “Mulamu wuweze muli nyenye.”

²⁰ Nayo yaza kukondya kulonga zizi, yakawalajila imiwoko yakwe, no lubavu lwakwe. Nawo iwejizwa wakasangalala waza kumuwona u Muwaha.

²¹ Nayo Yesu yakawatya kanyhi. “Mulamu wuweze muli nyenye. Nha vyono ane Baba yanhuma, nane vyo nghumutumenyi nanye nhavivyo.”

²² Yaza kukondya kulonga zizi, yakawahulila, yakawatya, “Mubocele u Muhe Mono Yelile.

²³ Hono muwanenele wanhu wubi wawo, wowa wanenelwa, na hono mulece kuwanenela, si wonenelwa.”

Yesu na Tomaso

²⁴ Ninga Tomaso, muyagwe na walya yo we likumi na wejete. (Mono yacemagwa we Matundu,) si yali yali baho hamonga ne wayagwe lono yaziza Yesu.

²⁵ Holeka iwejizwa wayagwe wakamulonjela wakatya, “Cimuwona Muwaha.” Ninga Tomaso yakawatya. “Hono ndece kuziwona zinghomele ze misumali mu maganza ge miwoko yakwe, no kucitajila icidole cangu mu zinghomele zizo, no kuwulajila umuwoko wangu ha lubavu lwakwe, si nosuma kwihuwila.”

²⁶ Vyaza kupuluta vilo munana, iwejizwa wawo wakawa kanyhi mumulya mugati, hamonga na Tomaso. Ne milango yali midindwe, ninga Yesu yakaza, yakema ha ciligati yawo, yakawatya, “Mulamu wuweze muli nyenye.”

²⁷ Hanyuma yakamutya Tomaso “Lete kuno cidole cako, wulanje maganza ge miwoko yangu, wulete no muwoko wako, uwinjize mu lubavu lwangu. Ho wulece kuwa na mahwele, langa wihuwile!”

²⁸ Tomaso yakapitula yakamutya, “Muwaha wangu no Mulungu wangu!”

²⁹ Yesu yakamutya, “Alu ho wehuwila vyono wambona? Ninga wamoti wono wehuwiye, lono wakali si nawona.”

I soko ye Citabu cicino

³⁰ Yesu yavinoza vitanjilo vinji hali wejizwa wakwe, vyono si vyandikwa mu citabu cicino.

³¹ Ninga azino zandikwa, ho mwihuwile vyono Yesu yo Kilisito, u Mwana wo Mulungu, na mu wihuwilo wenyu wuwo ho mutuje wumi muli mwene.