Yohana 16 - I CILAGANE CIPYA 1991

¹ “Zizi nimulonjelenyi, ho mulece kuwuleka wihuwilo wenyu.

² Wanhu wolowa kumuwinjenyi mu matangʼanilo gawo go wuhembelo. Kanyhi icidaha cikuza cono, muli wose mono kolomuwulajenyi anye, kowona nha yakumwitumamila u Mulungu.

³ Wolomunozezenyi nhavivyo, ku soko vyono si wamumanyile Baba, hamba na nene si wamanyile yaye.

⁴ Ninga nimulonjelenyi zizi, kolo cikuza cidaha cazo, ho mukumbucile zizo, vyono namulonjelenyi. “Si namulonjelenyi zizi ha mwamulizo, vyono nali nikaye nanye.

U mulimo wo Muhe Mono Yelile

⁵ Ninga alu nghumubitila mono yanhuma, hamba hasina muyenyu yunji muli nyenye mono yakumbuza, ‘Alo kono wukubita kwihi?’

⁶ Ninga vyono nimulonjelenyi zizi, zinhumbula zenyu zimemile wukalale.

⁷ Ninga nghumulonjelenyi mbeka, vyono, ho vyowa viswanu kuli nyenye hono mbite, kusoko ane hono ndece kubita, u Mutazi si komuzizenyi yaye. Ninga hono mbite, ale, nomutuma kuli nyenye.

⁸ Nayo kolo yakuza, kowakangaziza we yinze, vyono wasutizye, kuli zo wubi, na zo wilingʼano, na ze ningʼaniza yo Mulungu.

⁹ Wasutizye kuli zo wubi, ku soko vyono si wanyihuwiye nene,

¹⁰ wasutizye kuli zo wilingʼano, ku soko vyono ane nghubita kwa baba, nanye si mowa kumbona kanyhi,

¹¹ wasutizye kuli ze ningʼaniza yo Mulungu, ku soko vyono muwaha we yinze yiyi yalingʼanizwa yakondya.

¹² “Nina nyinji zo kumulonjelenyi kanyhi, ninga si mosuma kuzibocela lulu.

¹³ Langa kolo yakuza, u Muhe we Mbeka, yo komutonjenyi mu mbeka yose, hambi nha si kolonga zo wulajilize wakwe, langa kolomulonjelenyi zose zono kolohulika, nayo kolonga zono zikuza.

¹⁴ U mwene kolonghumya nene, hambi nha kolomulonjelenyi zono kozituga kulawa kwangu.

¹⁵ Vyose vyono yena navyo Baba, nha vyangu, na ku soko yiyo holeka nheye, yuyo u Muhe Mono Yelile, kolomulonjelenyi zono kozituga kulawa kwangu.

U wukalale ne Nyemo

¹⁶ “Mu cipango cidodo, si mombona hamba nhavi, na hanyuma hadodo, ho mombona kanyhi!”

¹⁷ Holeka, wanji wa muli wejizwa wakwe, wakanza kwiwuza weneco wose, “Alo co cici, hono yakucilonjela yakutya.” Mu cipango cidodo si mombona hamba nhavi, na hanyuma hadodo ho mombona kanyhi, na kanyhi yono yakutya, “Vyono nghubita kuli Baba.”

¹⁸ Wakawa wakiwuza du, “Alo co cici, lono yakutya, Mu cipango cidodo?” Ase sicimanyile yono yakulonga.

¹⁹ Nayo Yesu yakamanya vyono wasakaga kumuwuza, holeka yakawatya, “Alo mukwiwuza ze nghani yiyi vyono nheye, Mu cipango cidodo si mombona hamba nhavi?” Na hanyuma hadodo ho mombona kanyhi?

²⁰ Nghumulonjelenyi mbeka, vyono anye mowa kulila no kukalala, ninga we yinze, wowa kusecelela. Anye mokalala, ninga wukalale wenyu hanyuma wolowa nyemo.

²¹ U mucekulu, mwipango lyo kusawa, yakuwona wusungu, hambi cidaha cakwe co wusungu nha cafika. Ninga kolo mwana yalelwa, si yakukumbucila kanyhi u wusungu, so nyemo yo kulelwa munhu kononze.

²² Anye nanye mu cidaha cici, mwina wukalale, ninga nolomuwonenyi kanyhi, ne zinhumbula zenyu zolosecelela, ne nyemo yenyu, hasina mono yakumuwusizenyi.

²³ Mwizuwa lilyo si molosaka cinji kuliʼne, Mbeka nghumutyenyi, “Hono mumulombe Baba cinji mwitagwa lyangu, komupelenyi.

²⁴ Sunga na lulu, mukali si nalombela cinji mwitagwa lyangu. Lombenyi, nanye mopegwa, nyemo yenyu ho yikwilanicile.

Nakondya kuwasuma we yinze

²⁵ “Zizi nimulonjelenyi mu vihwanicizo. Ninga cidaha cikuza, lono si nomulonjelenyi kanyhi mu vihwanicizo, ninga nomulonjelenyi za Baba ciwonelela.

²⁶ Mwizuwa lilyo molombela mwitagwa lyangu, nane si nghumutyenyi vyono, nolomulombelenyi kuli Baba,

²⁷ hambi Baba nha yamwendilenyi mweneco, vyono nanye munyendile ane, mukehuwila vyono nalawa kuli Mulungu.

²⁸ Nalawilila kuli Mulungu, nghaza kononze, alu nghuyileka kanyhi yinze, nghubita kuli Baba.”

²⁹ Nawo wejizwa wakwe wakatya, “Alu wukulonga ciwonelela nhondo, hamba si mu vihwanicizo.

³⁰ Alu nhondo camanya he, vyono wuzimanyile zose, hamba si wukusaka munhu yakuwuze cinji, holeka cihuwiye vyono walawa kuli Mulungu.”

³¹ Yesu yakawapitula yakawatya, “Wulenyi, alu mwehuwila nhondo?

³² Lanjenyi ta, cidaha cikuza, sunga na lulu caza, hono mokwiyagalila munhu kwakwe, munhu kwakwe, na mondeka nene nili wene. Ninga kumbe hamba si niliwene ngʼo, hambi nha cina na Baba.

³³ Nimulonjelenyi zizi, ho muwe no mulamu, mu wilunze wenyu na nene. Mononze heya, motuga wugaye, ninga mwisindamice! Ane niwasumile we yinze.”