Yohana 14 - I CILAGANE CIPYA 1991

Yesu yo nzila yo kubitila kuli Baba

¹ Yesu yakawalonjela, yakatya, “Mulece kugazika mu zinhumbula zenyu, Mumwihuwiye Mulungu, ale munyihuwile na nene.

² Ku kaya ya Baba kowuli wikalo winji, mhali si nhavivyo, nali nimulonjelenyi. Alu nghubita kumuwikanizizenyi wikalo.

³ Na hono mbite, nghamuwikanizizenyi wikalo, nolowuya, ho nimucemelenyi kwangu, nanye ho mwikale hono ho nili ane.

⁴ Nanye muyimanyile nzila yo kubitila kuko kono nghubita.”

⁵ Tomaso yakamutya, “Muwaha, ase si cimanyile kono wukubita, alu cosuma nhawule kuyimanya yiyo nzila?”

⁶ Yesu yakamutya, “Ane nha yo nene nzila, ne mbeka, no wumi. Hasina mono kosuma kubita kuli Baba, langa sunga yakolele muli nene.

⁷ Mhali mumanye ane, ho mwali mumumanye na Baba. Alu na lulu mumumanyile, kanyhi mwakondya kumuwona.”

⁸ Filipo yakamutya, “Muwaha, ucilajlie u Sogo yo munhu, nase cokwiguta.”

⁹ Yesu yakamutya, “Alo Filipo, i vilo vyose vivi vyono nikalane nanye, hongo wukali sinamanya? Mono yakondya kumbona ane, yamuwona na Baba. Alu kosuma nhawule kutya, ‘Wucilajile u Sogo yo Munhu.’

¹⁰ Alo si wihuwiye vyono ane nili muli Baba, nayo Baba yali muli nene? Zinghani zono nimulonjelenyi, nha singhulonga no mweneco du, langa Baba mono yekaye muli nene, yo ketumaga imetumo gakwe.

¹¹ Yinojeye anye, munyihuwile vyono nghutya ane nili muli Baba, nayo Baba yali muli nene, hamba lunji, munyihuwile so metumo geneco gono nghugetuma.

¹² Mbeka nghumutyenyi: Mono yanyihuwiye, imetumo gono nitumaga, nayo kogetuma, kanyhi kosuma kwituma sunga ne mawaha gono gacizize gaga. Vyono ane nghubita kwa Baba.

¹³ Na yo yose yono molomba mwitagwa lyangu, nokwituma, ho Sogo yo Munhu yakumizywe muli mwanagwe.

¹⁴ Hono mulombe cinji mwitagwa lyangu, vyo nonoza.

U wihuwizo wo Muhe Mono Yelile

¹⁵ “Hono munyende, mokwibata i malajilizo gangu.

¹⁶ Nane nomulomba Baba, nayo komupelenyi mutazi yunji, yawezane nanye myaka ne cibitilila.

¹⁷ U mwene yo Muhe we mbeka, mono we yinze si wosuma kumubocela, hambi nha si wosuma kumuwona, hamba kumumanya kose. Ninga anye mumumanyile, hambi nha mwikalaga nayo, nayo yali muli nyenye.

¹⁸ “Si nomulecenyi anye nha muli wana walekwa, ninga nomuzizenyi kanyhi.

¹⁹ Hakali hadodo we yinze, si wowa kumbona kanyhi, anye langa mombona, na vyono ane nili mumi, na nyenye nanye mowa womi.

²⁰ Mwizuwa lilyo, anye ho molomanya vyono ane nili muli Baba, nanye muli muli nene, nane nili muli nyenye.

²¹ Mono yena malajilizo gangu no kugebata, yuyo yo yanyendile, nayo mono yanyendile kokwendwa na Baba, nane nomwenda, kanyhi nokwilajila kuli mwene.”

²² Yuda (yo siyulya mwana wa Musikaliyota ninga yunji) yakamutya, “Muwaha, yowa wule agwe wilajile vyono winha kuli ase, hamba si kuli we yinze?”

²³ Yesu yakamupitula, yakamutya, “Munhu hono yanyende, yuyo kokwibata inghani yangu, na Baba komwenda, nase cokuza kuli mwene, no kwikalana nayo.

²⁴ Nayo mono siyanyendile, si yakwibata zinghani zangu. Ne nghani yono mwayihulika si yangu langa ya Baba mono yanhuma.

²⁵ “Nimulonjelenyi nghani zizi, lono nghali nili hamonga nanye.

²⁶ Ninga u mutazi, Muhe Mono Yelile, mono Baba komutuma mwitagwa lyangu, ko mwijizenyi zose no kumukumbucizenyi zose zono nomulonjelenyi.

²⁷ “Mulamu nghumulecelenyi, mulamu wangu nghumupeleyi, si nghumupelenyi anye kotya nha vyono yinze yilavyaga. Mulece kugazika mu nhumbula, hamba mulece kwihwelela.

²⁸ Mwakondya kuhulika nghumulonjelenyi, vyono, ‘Nghubita ninga nomuwuyilenyi kanyhi.’ Mhali munyendile, mwali musangalale, vyono nghubita kwa Baba; hambi mwene nha yo Muwaha yanyhizize ane.

²⁹ Na lulu nimulonjelenyi zizi, lono zikali si nawa, ho mwihuwile kolo zikwijela.

³⁰ Si nomulonjelenyi muno kanyhi, hambi u muwaha we yinze yiyi nha yakuza, nayo hamba si kosuma cinji kuliʼne.

³¹ Ninga we yinze yiwanojeye wamanye vyono ane nimwendile Baba, holeka nghuzituma zose nha vyono Baba yandajiliza nitume. Inucenyi ciwuce baha!