Yohana 13 - I CILAGANE CIPYA 1991

Yesu yakuzuguza i migulu ye wejizwa wakwe

¹ Isikukuu ye Pasaka, lono yali yikali nafika, Yesu yakamanya vyono cidaha cakwe cafika, co kuwuka mono yinze yiyi, yabite kuli Sogwe. Nayo yakawendela lukulu iwanhu wakwe, wono wali mononze sunga ko ku ndumo.

² Na ha ndigwa ze cinyamihe, lono Yesu yali yekaye hamonga ne wejizwa wakwe, Setani yali yakondya kumufunda Yuda Musikaliyota u mwana wa Simoni, ho yamugaluce Yesu.

³ Nayo Yesu yali yamanyile vyono Sogwe yamupeye vyose mu mawoko gakwe, na vyono yalawa kuli Mulungu, na kanyhi yakuwuya kuli Mulungu.

⁴ Hobaho yakalecelela kulya, yakenuka, yakawuwika hamhelo u mwenda wakwe wa mucanyha, yakasola citema yaketunga mu ciwino.

⁵ Yakawa kutajila i malenga mu ciya, yakawa kwanza kuwazuguza iwejizwa wakwe imigulu, no kuyipata ne citema cono yali yetunjlie.

⁶ Yakafika hali Simoni Petelo: Nayo Petelo yakatya, “Muwaha, alo gwegwe wunzuguze magulu gangu?”

⁷ Yesu yakamulonjela, yakamutya, “Yono nghunoza alu, agwe si wuzimanyile, ninga koloyimanya hanyuma.”

⁸ Petelo yakamutya, “Agwe si ko nzuguziza lukulu imigulu yangu.” Yesu nayo yakamutya, “Hono ndece kukuzuguza, hodu, si kosuma kuwa mwijizwa wangu kanyhi.”

⁹ Simoni Petelo yakamutya, “Muwaha, nzuguzaje, ninga si migulu yangu du, langa sunga ne miwoko yangu no mutwe nha vivilya.”

¹⁰ Nayo Yesu yakamutya, “Mono yakondya kwihovuga, si kosaka kanyhi kwihovuga, langa magulu, hambi nha yakondya kwela u muwili wose. Ale, nanye mwelile, ninga si wose.” (

¹¹ Hambi nha yali yamanyile mono komugaluka, kusoko yiyo, holeka yatya, “Si mwelile wose.”)

¹² Nayo yaza kukondya kuwazuguza imigulu, no kuvwala civwalo cakwe, yakekala kanyhi, yakawatya, “Wulenyi mwamanya vyono nimutendelenyi?

¹³ Anye mukuwa kunyitya, Mwijizi, kanyhi Muwaha, mulongaga mbeka, hambi nha yo nene.

¹⁴ Holeka hono ane no Muwaha, kanyhi no Mwijizi, nimuzuguzenyi imigulu yenyu, nanye cinojele muwe kwiyizuguza imigulu munhu na muyagwe.

¹⁵ Hambi nha nimupelenyi luzu, nanye ho muwe kunoza nha vyono nimutendelenyi nyenye.

¹⁶ Mbeka nghumutyenyi, u mwitumami si yamucizize u muwaha wakwe, hamba mono yatumwa, si yamucizize mono yamutumile.

¹⁷ Holeka hono muwe mwayimanya i mbeka yiyi, mowa wamoti hono muyitume.

¹⁸ “Zizi si nghumulonjelenyi wose. Niwamanyile wono nawahagula. Ninga yinojeye i Mandiko Gono Gelile gafisilizwe gono gakutya, ‘Yuyulya mono cikuhanga nayo zindigwa zangu, kapituka no kungaluka.’

¹⁹ Ane nghumulonjelenyi zizi, lono zikali si nawa kwijela, na kolo zikuwa, ho mwihuwile vyono Yo Nene.

²⁰ Mbeka nghumutyenyi, Mono yakumubocela mono yanhuma, yakumbocela nene, nayo mono yakumbocela nene, yakumubocela mono yanhuma.”

Yesu yakuwila vyono kogalukwa

²¹ Yesu yaza kukondya kulonga zizi, yakagazika muno mu nhumbula, yakawa kulonga yakatya, “Mbeka nghumutyenyi, muyenyu yumonga, kongaluka.”

²² Iwejizwa wakelangalanga, hamba si wasuma kumanya mono Yesu yakumulonga.

²³ Yumonga muyagwe ne wejizwa, mono Yesu yali yamwendile muno, yali yekaye behi na Yesu.

²⁴ Simoni Petelo yakamukonyeza yuyo no muwoko, yakamutya, “Muwuzaje ta, yakulonga nani?”

²⁵ U mwijizwa yuyo, yakasejelela behi muno na Yesu, yakamuwuza yakutya, “Ati Muwaha, alo nani mwene?”

²⁶ Nayo Yesu yakamupitula yakatya, “Mono nomulilizize nhonje nimupele, yo mwene.” Nayo yaza kulilize nhonje, yakamupela Yuda, mwana wa Simoni Musikaliyota.

²⁷ Nayo Yuda yaza kuyibocela inhonje yiyo, yakenjilwa na Setani. Nayo Yesu yakamutya, “Yono wukwituma, ale, witume mbela.”

²⁸ Hamba hasina yunji mono yali yekaye ha wulilo, mono yamanya ku sokoci, holeka Yesu yamulonjeye zizo.

²⁹ Ninga kusoko vyono Yuda yo yatunzaga u mufuko we zipesa, holeka wanji wakehwesa vyono, kowa Yesu yamulonjelaga yakagule vyono yikusakwa so sikukuu, hamba lunji yamulonjelaga yalavye cinji kuli waciwa.

³⁰ Nayo Yuda yaza kuyibocela nhonje yiyo, hobaho yakalawila kunze, naco cali cilo.

I lilajilizo lipya

³¹ Yaza kuwa Yuda yalawila kunze, Yesu yakatya, “Alu u Mwana wo Munhu kakumywa, no Mulungu kakumizywa muli mweneco.

³² Na hono lukumyo lo Mulungu lwanzalicilwa muli mwana. Nayo Mulungu kolwanzalicila u lukumyo lo Mwana muli mweneco, nayo konoza nhavivyo kamonga.

³³ “Wanangu, cowezana nanye hadodo vivi du. Monondola, Ninga nalu nghumulonjelenyi nha vyono nawalonjela iwalongola we Wayahudi, ‘Ane kono nghubita, anye si mosuma kuza.’

³⁴ Nghumupelenyi ilajilizo yipya, mwiyendaje, nha vyono nimwendilenyi anye, nanye vyo mwiyendaje.

³⁵ Hono mwiyende, iwanhu wose womanya vyono yo nyenye wejizwa wangu.”

Yesu yakuwila vyono Petelo komukana

³⁶ Simoni Petelo yakamutya, “Alu Muwaha, wukubita hayi?” Yesu yakatya, “Kono nghubita alu baha, si kosuma kunhyatya, ninga kolonhyatya hanyuma langa.”

³⁷ Petelo yakamutya, “Muwaha kusokoci si nosuma kukutyatya lulu baha? Ane niwikanize hamba kufwa kusoko yako.”

³⁸ Yesu yakatya, “Wule, wiwikanize mbeka kufwa kusoko yangu? Mbeka nghukulonjela Petelo, Nzogolo yowa yikali sinalila, nagwe kowa wanghana kali kadatu, wukutya vyono si wumanyileʼne.”