Yakobo 3 - I CILAGANE CIPYA 1991

U lulimi

¹ Wandugu zangu, wenji wa muli nyenye, mulece kuwa wejizi. Hambi nha vyono mumanyile, sese co wejizi colotuga wulingʼanizwe wuwaha muno muno kuciza wanji.

² Hambi na sese wose nha cisutyaga kali kenji. Ninga hone munhu sikasutyaga mu wulonje wakwe, ale, munhu yuyo kowa yakwilaniciye, kanyhi kosuma kuwimila muwili wakwe wose.

³ Ase ciziwicilaga zifwalasi cendeseso mu milomo yazo ho zicihulice, na muwunoza nhavivyo mo cisumilaga kuzitegula ko kose kono cendile co weneco.

⁴ Ne zingalawa nago kanyhi, hamba ziwe mbaha muno, nha ziputagwa ne mabeho mawaha, ninga zipitulagwa ne cisukani cidodo vivi, ko kose kono mutonji yendile.

⁵ Ale nha vivyo no lulimi nalo, hamba luwe nha cilunza cidodo vivi co muwili, cikuwa kwiyikumya makani mawaha muno muno. Ne cinyesela cidodo vivi co moto citakamizaga mbago mbaha.

⁶ Ale nha vivyo no lulimi nalo, lwinho moto. Hambi nha lumemile wubi winji muno, nalo lwina cilejeho mu miwili yetu, kanyhi lutajilaga wubi mu miwili yetu yose. Wutakamizaga u wumi wetu wose nho moto wono wulawaga yose. Wutakamizaga u wumi wetu wose nho moto wono wulawaga ku Gehena yeneco.

⁷ No munhu nayo, nha kasumaga kugafuga malimu, kanyhi yakondya kusuma kuvifuga i viwumbwa vyose vye malimu ga mu mbago, ne zindeje, ne mazoka, ne malimu ga mwilenga.

⁸ Ninga hasina munhu mono yasuma kulufuga lulimi. Lulimi co cinhu cibi, cono sicimilagwa, kanyhi lumemile sumu mbulaji.

⁹ Ko lulimi, cimulumbago Muwaha no Sogo yetu. Na ko lulimi lulo kanyhi, ciwalijitaga wanhu, wanhu wono wawumbigwe mu hwani yo Mulungu.

¹⁰ Izinghani ze malijito na zo wulumbe, zose zilawaga mu mulomo monga. Nyo wandugu zangu, izinghani zizi sizinojeye ziwe nha vivi.

¹¹ Ma, cisima cimonga co muvwilo monga cisumaga mbi kuvwiza malenga mapolo ne malenga makali hamonga?

¹² Wandugu zangu, libici lyo mukuyu ma, lisumaga kulela zeyituni? Hamba muzabibu wusumaga kulela mukuyu? Hamba ne cisima co muvwilo we malenga ge cimwino mwino, sicisumaga kuvwiza malenga mapolo.

I mahala gono ga kulawa kucanyha ku wulanga

¹³ Ma, nani mono yena mahala no wizuce muli nyenye? Ale, yayilajliaje ta inghani yiyi mu mikalile yakwe miswanu, na mu metumo gakwe maswanu, gono ganozagwa mu winenenyhezi ne mahala.

¹⁴ Ninga hono zinhumbula zenyu ziwe zimemile wivu, simbili no wiyendezi, ale, mulece kwituma wubi mu mbeka, ku soko yowikumizya i mahala genyu.

¹⁵ Mahala gono genha nha vivi, sigalawaga kucanyha ku wulanga, langa imahala gago ga kononze, kanyhi ga ciyinze yinze, na kanyhi ga cisetani.

¹⁶ Hambi nha ho hose hono howuli wivu no wiyendezi, ale baho ho howuli no wuma ne mabi mabi gose.

¹⁷ Ninga imahala gono galawaga kucanyha ku wulanga, gene gelile, gendile mulamu no wupolo, kanyhi galulaga wanhu, gamemile lusungu kanyhi galelaga mikalo ye metumo maswanu, gasina wuwaguzi hamba wukoci.

¹⁸ No wilingʼano, yo mikalo ye zimbeyu za wono wendile mulamu wahadicilaga mu mulamu.