Yakobo 2 - I CILAGANE CIPYA 1991

U wubi wo wuwaguzi

¹ Wandugu zangu, hono muwe mumwihuwiye u Muwaha Yesu Kilisito, u Muwaha wo lukumyo, mulecele lukulu kuwawagula wanhu.

² Lunji cilonje citye, munhu yunji mono yavwalile nyamwidole ye zahabu ne vivwalo vitambule hono yenjile mu mukungʼano wenyu, na baho kanyhi yenjile no munhu muciwa mono yavwalile vivwalo vitipiye.

³ Hono mumupele lilumbo lyono licizize hawaha yuyulya mono yavwalile vivwalo vyono vikungʼalala, no kumutya, “Agwe wikale ahano haswanu,” no kumutya yuyulya muciwa, “Agwe nagwe wime ahalya,” hamba “Wikale ahano hasi hono magulu gangu,”

⁴ wulenyi ma, wuwo si wuwaguzi muli nyenye? Ma, na wuwo wulamuzi wenyu ma, si wukulawilila mu mahweso mabi?

⁵ Wandugu zangu, wendece, hulicizenyi ta! u Mulungu yakondya kuwahagula iwanhu wono waciwa wa mu yinze yiyi, ho wawe wagoli wo wihuwilo kanyhi wawubocelega wutemi wono yawatemezeza wa walya wono wamwendile.

⁶ Ninga nye mukuwabedegala wanhu waciwa! Ninga iwagoli wo wawo wono wakumugazenyi no kumutegulenyi kuli Mahakama?

⁷ Wulenyi, si wowa wo wono walitovulaga litagwa lyenyu liswanu lyono mucemeywe?

⁸ Na hono muwe mukuwufisiliza u wulajilize wulya wo Wutemi nha vyono yandicigwe mu Mandiko Gono Gelile: “Umwendaje munhu muyago nha vyono wiyendile gwegwe go mweneco,” ale mowa mukunoza viswanu muno muno.

⁹ Ninga hono muwawagule wanhu, ale, mukwituma wubi, nawo Wulajilize nha wukumuhosenyi myenye vyono mwina wusutye.

¹⁰ Na mono yakubena lilajilizo limonga du lya mu Wulajilize, kowa wuhoswe wo kuwuhodanga Wulajilize wose.

¹¹ Hambi yu yulya mono yakatya, “Wulece kusenyha,” nha yo yatya kanyhi “Ulece kuwulaga.” Holeka hamba wuwe siwukuwa kusenyha, ninga wukuwulaga, agwe wakondya kuwubeno wulajilize.

¹² Ale, holeka mweze kulonga no kwituma nhe wanhu wono wololingʼanizwa no Wulajilize wono wuletaga welecele.

¹³ Hambi, u Mulungu nha kolowa yasina lusungu kolo yakumulingʼaniza munhu mono yasina lusungu. Ninga lusungu lucizize wulingʼanizi.

U wihuwilo ne metumo

¹⁴ Nye wandugu zangu, alu kocili cambuzici, hono munhu yatye yena wihuwilo, ninga kuno ho siyakulajila imetumo gayo? Alu wuwo wihuwilo wosuma kumuponya wule?

¹⁵ Citye lunji, ndugu we cilume hamba we cicekulu yawe yasina mwenda hamba ndigwa.

¹⁶ Cowa cambuzici kuli nye co kuwatya wawo, “Bitenyi mupolile mukote moto, mwigute,” hamba simukuwapela visakwa vyawo vyono wakuhila mu mikalile yawo?

¹⁷ Ale nha vivyo no wihuwilo weneco du wuli wene wono wusina metumo, wufwiye.

¹⁸ Ninga munhu yadahile kutya, “Agwe wina wihuwilo, ane nina metumo!” Ale! Undajile ta vyono munhu kowa yena wihuwilo wono wusina metumo, nane nokulajila wihuwilo wangu mu metumo gangu.

¹⁹ Ma, agwe ukwihuwila vyono Mulungu yo yumonga? Viswanu! Ninga hamba ne macisi nago gehuwiye nha vivyo, na kuno gakucicima so woga.

²⁰ Go mulele gwe ma, wukusaka kulajilwa vyono u wihuwilo wono wusina metumo wufwiye?

²¹ Ma, usetu Abulahamu yanoza wule sunga yakavumilwa no Mulungu? Yavumililwa mu metumo gakwe, lono yamulavizya mwanagwe Isaka mu cikumbicilo.

²² Ale, wona ta, vyono wihuwilo wakwe wetumana ne metumo gakwe, u wihuwilo wakwe wukakwilanicizwa mu metumo gakwe.

²³ Holeka gakafisilizwa gagalye i Mandiko Gono Gelile gono gatezaga: “Abulahamu yakamwihuwilo Mulungu, na mu wihuwilo wakwe, yakavumilwa yawe munhu we lingʼani, holeka Abulahamu yakacemwa mwendece wo Mulungu.”

²⁴ Ale, mukuwona ta, vyono munhu kavumilagwa no Mulungu mu metumo gakwe hamba si mu wihuwilo wuli wene du. yavumilwa yawe we lingʼani ku soko vyono yawabocela wa walya i wapelelezi, no kuwatanga wakole nzila yinji.

²⁶ Ale, nha vyono umuwili wezaga wufwiye hono wusina muhe, ale nha vivyo no wihuwilo nawo, wezaga wufwiye hono wusina metumo.