Wugubule 21 - I CILAGANE CIPYA 1991

U wulanga wupya ne yinze yimhya

¹ Hanyuma nghawona wulanga wupya ne yinze ʼmhya. U wulanga wu wulya wulongozi ne yinze yiyilya nongozi, vyali vyawuka, ne lilenga nalyo hamba si lyejela kanyhi.

² Nghaliwona likaya lyono lyelile, nalyo likutima kulawa kuli Mulungu kucanyha, nayo yo Yelusalemi ʼmhya. Nalyo lyali iwikanizize lukulu nha bibi halusi muhambwe viswanu, mono yawikanizwe so mulume wakwe.

³ Hanyuma kanyhi, nghahulika lizi yiwaha likalawilila heʼgoda lyo wutemi, likutya, “Lanje ta! U Mulungu kawunoza u wikalo wakwe muli wanhu. Nayo kokwikala muli wene, nawo wowa wanhu wakwe, nayo kowa Mulungu wawo.

⁴ U Mwene kogapatila lukulu mahozi gawo gose, mu meso gawo kowa kusina lifwa, hamba wukalale hamba cililo, hamba wusungu si vyolokwijela yaye, hambi zihuma nha zakondya kupuluta!”

⁵ Ayulya mono yali yekaye mwigoda lyo wutemi, nayo yakatya, “Lanje ta! Ane nghuzinoza zose ziwe ʼmhya.” Yakanonjela kanyhi yakutya, “Yandikaje yiyi, hambi i zinghani zizino nha zo huwilwa, kanyhi za mbeka!”

⁶ Hanyuma yakawa kunonjela yakutya, “Zose ʼlu, zakondya! Ane yo nene wo Mwamulizo na wo Mudumo. Nayo mono yakaluce, ane nomupela co kungʼwa bwete, kuwulawa mu mivwilo ye malenga go wumi.

⁷ Nayo munhu wo wose mono kosuma, yuyo kopegwa acino. Ane nowa Mulungu wakwe, nayo kowa mwanangu.

⁸ Ninga i wanhu woga, na wono si wehuwiye, na wono wena metumo ge cikomaza, ne wawulaji, ne wasenyha, ne wahawi, na wono wakuhemba vihwani, sunga ne walambi wose, awo wose lifungu lyawo mugati ye lilamba lyono likwaka moto ne cibiliti, alyo lyeʼfwa lye kejete.”

Yelusalemi yimhya

⁹ Hanyuma yunji wa muli wawalya wamalayika mupunghati wono wali wena agalya mabakuli mupunghati gono gali gamemile imagazo mupunghati go mudumo, yakanyiziza yakanyitya, “Nzoo kuno! Nane nokulajila bibi halusi u mugolece wo Mwana we ngholo!”

¹⁰ Ale, malayika yakanhegulila mu Muhe ko kwitunda liwaha, kanyhi itali yakandajila i likaya lyono lyelile, yo Yelusalemi, nalyo likutima kulawa kuli Mulungu ku wulanga,

¹¹ likungʼalala ku so lukumyo lo Mulungu. No wungʼalale walyo, wukawa nha wungʼalale weʼbwe yiwaha lyo wuguzi wukamu, lyono likulajilila nha cilole.

¹² I likaya lilyo lyali lina ijinji itali muno kanyhi igazi muno, nalyo lyali lina milango ikumi na myejete, nawo wamalayika walindilize milango ikumi na wejete. Ne matagwa ge zinghungugo ikumi na nyejete za Isilayeli, gali mandikwe hacanyha ye milango yiyo.

¹³ Na kwali koyili milango midatu midatu mbavu zose ze lijinji. Kulubavu lwa kucilima milango midatu, nako kusumuka milango midatu, nako kutakama, milango midatu, na kumwezi nako, milango midatu nha vivyo.

¹⁴ Ne majinji gose ge likaya lilyo, gali mazenje mu mabwe ikumi na mejete go musinji, na mucanyha ye mabwe gago, mwali mwandikwe i matagwa ge watumwa ikumi na wejete wo Mwana we ngholo.

¹⁵ Yuyulya malayika nayo mono yalongana nane, yali yena cibici ca zahabu co kupimila, ho yalipime likaya lilyo, hamonga ne milango yayo, ne majinji gayo.

¹⁶ Ne likaya nalyo lyali lya mhilimo ya nhuzi yine, nalyo u wutali walyo ne cipinga calyo vyali vilingʼaniye kose kose. Ale nayo malayika yakawa kulipima i likaya lilyo ne cibici cakwe, nalyo u wutali walyo ne cipinga calyo, no wima walyo, lyali nha kilometa elufu nyejete na magana mane.

¹⁷ Hanyuma yakawa kupima ne majinji gayo, nago gakawa meta makumi mutandatu mu cipimo ca cimunhu munhu cono yacitumamila malayika.

¹⁸ Ne lijinji lye likaya lilyo, lyali lizenjeywe mabwe madunghu go wuguzi wukamu, ne likaya lyeneco lyali yizenjelwe zahabu swanu muno, zono zikungʼalala nha cilole.

¹⁹ Ne mabwe gono wali wazenjeye musinji we lijinji lilyo, gali mahambwe muno ne mabwe ge mawala gose go wuguzi wukamu. Ilibwe lilongozi lyo musinji, lyali yibwe yidunghu lyo wuguzi wukamu, nalyo lye kejete lyali lyeʼwala lya sapifilo, lye kadatu kalikedoni, lye kane zamaladi,

²⁰ lye hano, salidoniki, lyo mutandatu, saludiyo, na lyo mupunghati Kilisolito, lyo munana, belulo, lye cenda, topazi, lye likumi, Kilisopalaso, lye kumi na monga yasinto, na lye likumi na nyejete, amesisito.

²¹ Nayo i milango yiyilya ikumi na myejete, zali lulu ikumi na nyejete, i milango yose yali yina mulango na lulu monga. Ne libalabala liwaha lye likaya, lyali yinozezwe zahabu swanu, yono yikungʼalala nha cilole.

²² Hamba si nawona wuhembelo mwikaya lilyo, hambi u Muwaha Mulungu u Mudaha vyose, hamonga na yuyulya u Mwana we ngholo, nha wo wuhembelo walyo.

²³ Ne likaya lilyo si likusaka izuwa, hamba mwezi vilimulicile, hambi u lukumyo lo Mulungu nha lolukuwa kulimulicila, ne zitala zalyo, yo yuyo u Mwana we ngholo.

²⁴ Ne wanhu we makungugo gose wojendela mu wuzelu walyo nawo watemi wa kononze woliletela lukumyo lwawo.

²⁵ Ne milango ye likaya lilyo si yowa kudindwa ku misi kanyhi hamba si yolodindilwa lukulu, hambi nha kowa kusina kanyhi cilo kuko.

²⁶ U lukumyo, hamonga no wugoli we wanhu we makungugo, wotegulwa mumo mugati ye likaya lilyo.

²⁷ Ninga hasina cisemunwa co cose cono colokwinjila mumo, hamba munhu wo wose mono ketumaga i makani ge cikomaza, hamba i makani go wulambi lambi, yuyo si kokwinjlia mumo. Langa wono wokwinjila mumo mugati, wo wawalya du wono wandikwe mu citabu co wumi co Mwana we ngholo.