Wugubule 20 - I CILAGANE CIPYA 1991

Myaka elufu monga

¹ Hanyuma kanyhi nghawona malayika yunji yakutima kulawa ku wulanga, akuno yena ne funguwo ya kwikombo lyo wuninyina, akuno kanyhi yadinghuye ne manyolo mu muwoko wakwe.

² Malayika yuyo yakalibata lizoka, alilya lizoka lye katali, yo Ibilisi, hamba Setani, yakawa kuliwopa myaka elufu monga.

³ Malayika yakawa kuligumila kwikombo lyo wuninyina, yakawa kuwudinda mulango wo kwinjilila kuko, kanyhi yakawunamatiza ne cinamatizo, ho lilece kugajiliza makungugo kanyhi, sunga kolo yakondya kupuluta i myaka yiyo elufu monga. Ninga kolo yikupuluta myaka yiyo ye elufu monga, yinojeye liwopolelwe kanyhi kwe cipango cidodo du.

⁴ Nghawona magoda ge citemi hamonga ne wanhu wono wali wagekaliye. I wanhu wawo, wakapegwa vilungo vyo kulingʼaniza. Nghawona kanyhi nha vivilya izinhumbula za wono wadumulwa mitwe yawo ku soko ya kumuganula Yesu, na ku soko yo kuyiganula nghani yo Mulungu. Wawano wo wawo wono si walihemba lilimu lililya hamonga ne cihwani calyo, kanyhi hamba si wawicilwa citanjilo mu mahanda go wusu wawo, hamba mu miwoko yawo. Wakawumipa kanyhi, no kutema hamonga na Kilisito myaka elufu monga.

⁵ (Na awalya wanji wono wali wafwa, hamba si wawumipa, sunga yimalice myaka elufu monga.) Awuno wo wuzuce wulongozi.

⁶ Wena nyemo, kanyhi wamotile muno, wawo wose wono wakuhanga mu wuzuce wuwuno wulongozi. Hambi i lifwa lye kejete nha lyowa lisina vilungo kanyhi muli wene, nawo wowa wakohani wo Mulungu na wa Kilisito, nawo wotemana hamonga nayo, myaka elufu monga.

U wongomezwe wa Setani

⁷ Ne myaka yiyo elufu monga kolo yikumalika, ale Setani nayo ho yalawopolelwa yalawile mu jela.

⁸ Nayo kolawila mu jela, kanyhi yamule kugakonga i makungugo gose gono geyagaye kononze kose, wo wutya, Gogu na Magogu. Setani kowakongholela hamonga ho wehome, wene wowa wenji wenha musawawa wa munyenje ye lilenga.

⁹ Wakeyagala muʼsi yose, wakayipilima nghambi ye wanhu wo Mulungu hamonga ne likaya lyo Mulungu, lyono Mulungu yalyendile. Ninga moto wukatima kulawa ku wulanga wukawaticimiza wose wose.

¹⁰ Na Setani mono yawakongaga, nayo yakagumilwa mwilamba lyono likwako moto we cibiliti, mumo mono molili alilya lilimu hamonga no muwizi wo wulambi, nawo wowa kugazwa misi ne cilo, cibitilila ne cibitilila.

U wulingʼanizwe we ndumilizo

¹¹ Hanyuma nghawona ligoda liwaha lyo wutemi, lizelu, na mono yekaye mwigoda lilyo. I yinze hamonga no wulanga, vikatiza ha mwande yo wusu wakwe, hamba si vyejelela lukulu kanyhi.

¹² Nane nghawona i wafu wawaha ne wadodo wemile heʼgoda lyo wutemi, ne vitabu vikagubulwa. Hanyuma citabu cinji, i citabu co wumi, naco nha vivyo cikagubulwa. Iwafu wakalingʼanizwa nha vyono genha metumo gawo, nha vyono yandikwe mu vitabu vivyo.

¹³ I lilenga nalyo, likawalavya kunze, i wafu wose wono wali wali mugati yalyo, i lifwa hamonga ne yinze ye wafu, vikawalavya kunze iwafu wose wono wali mumo. Na wose wakalingʼanizwa nha vyono genha metumo gawo.

¹⁴ Hanyuma ilifwa hamonga ne yinze ye wafu, vikatagwa mwilamba lyo moto. Ne lilamba lilino lyo moto, lyo lifwa lye kejete.

¹⁵ No munhu wo wose mono litagwa lyakwe si lyejela lyandikwe mu citabu co wumi, u munhu yuyo yagumilwa mwilamba lyo moto.