Wugubule 2 - I CILAGANE CIPYA 1991

I nghani ku so likanisa lya Efeso

¹ “Kuli malayika we likanisa lya Efeso, wandice nhavi, “Ayi yo nghani yono yikulawa kuli mwene mono yazibate i zinyelezi mupunghati mu muwoko wakwe wo kulume, mono kajendaga haciligati yo wuwiko we zitala mupunghati ze zahabu.

² Manyile i metumo gako gose, niwumanyile no wuhidimbazi wako, hamonga no wukangalizi wako wose. Kanyhi manyile nha vyono si wukusuma kuwakangalila wanhu wabi, kanyhi na vyono wakondya kuwamanya awalya wono wakwiyitya watumwa, nawo wo si wene, kumbe wakulonga wulambi.

³ Agwe wuli ngola, kanyhi wakangalila mu wugaye winji muno, ku soko ye litagwa lyangu, hamba kukatala yaye.

⁴ Ninga hamba nhavivyo, nina nghani monga du kuliʼgwe, vyono agwe alu si wunyendile kanyhi nha ha mwamulizo.

⁵ Ale, wukumbucile vyono wali winha ha mwamulizo, lono wali wukali sinagwa, naiu lono wakondya kugwa! Holeka alu wunene wubi wako, witume nha vyono wali kwituma ha mwamulizo. Na hono wulece kunena na kuwuleka wubi wako, ale nokuza kuligwe, nane nowuwusa u wuwiko wako we tala hanhu hayo.

⁶ Ninga hamba nha vivyo, nghukulumba ku soko ye cinhu cimonga du, vyono agwe wugasulile makani gono wakwituma Wanikolayi nha vyono na nene nigasulile.

⁷ “Mono yena makutu go kuhulicila, ale yazihulikaje zono u Muhe yakugalonjela i makanisa! “Nawo wono wosuma, ale, nowapela i lingʼani yo kulye mana go mubici wo wumi, wono wuli mu mugunda wo Mulungu.”

I nghani ku so likanisa lya Simulina

⁸ “Kuli malayika we likanisa lya Simulina, wandice nhavi, “Ayi yo nghani yono yikulawa kuli mwene mono wo Mwamulizo na wo Mudumo, mono yafwa no kuwumipa kanyhi.

⁹ Nigamanyile magayo gako, kanyhi sunga no wuciwa wako, ninga imbeka agwe ho wuli mugoli. Kanyhi niwumanyile no wutovulwe wono watovulwa na walya wono wakwiyitya Wayahudi, ninga ho si Wayahudi we mbeka, langa ipuga lye Setani.

¹⁰ Ninga agwe wulece kuzogopa azilya zono zokuziza no kukutajila sunga na mu wugaye. Wuhulicize! Setani yakuhila yamujelenyi ko kuwalajila wanji wayenyu mu jela, nanye motuga magayo mu vilo ikumi. Holeka, mwene muli wehuwilwa kuliʼne, sunga ko ku wufwe, nane nomupelenyi wumi, co cihumbilizwa cenyu co wusume wenyu.

¹¹ “Mono yena makutu go kuhulicila, ale yazihulikaje zono u Muhe yakugalonjela i makanisa! “Nawo wono wosuma, si wotamiswa ne lifwa lye kejete yaye.

I nghani ku so likanisa lya Peligamo

¹² “Kuli malayika we likanisa lya Peligamo, wandice nhavi, “Ayi yo nghani ya mono yena mumaje mukali kose kose, yakutya,

¹³ Manyile kono wikaye. Agwe wikaye ku wikalo wuwaha wa Setani! Ninga hamba nha vivyo, wukali wibatiliye litagwa lyangu, hamba si wunakana u wihuwilo wako wa kuliʼne, sunga na mu vilo vya Antipa, muhomelezi wangu mwihuwilwa, lonoyawulajilwa i hanhu hono kekalaga Setani.

¹⁴ Ninga hamba nha vivyo, nina nghani zinji nyhefu kuliʼgwe, vyono wanji wa muli nyenye, muli watyatyi wa Balamu mono yamufunda Balaki, ho yawawicile cikobazo i wana wa Isilayeli ho walye zindigwa zono zali zikumbiciye vihwani, kanyhi wasenyhe.

¹⁵ Kanyhi kowali wanji wa muli nyenye, wanhu wono wakutyatya i mafundo ge Wanikolayi.

¹⁶ Holeka wunene wubi wuwo kanyhi wuwulece. Na hono wulece kunoza nha vivyo, ale nokuza kuliʼgwe mbela mbela, nane nokwihoma ne wanhu wawo ko mumaje wono wukulawa mu mulomo wangu.

¹⁷ “Mono yena makutu go kuhulicila, ale yazihulikaje zono u Muhe yakugalonjela i Makanisa! “Nawo wono wosuma, nowapela ayilya mana yono hundikwe. Kanyhi nowapela yibwe yidodo yizelu lyono lyandicigwe itagwa yipya, lyono munhu yunji sikosuma kulimanya, langa wawo du wono wolibocela.

I nghani ku so likanisa lya Tuwatila

¹⁸ “Kuli malayika we likanisa lya Tuwatila, wandice nhavi, “Ayi yo nghani yo Mwana wo Mulungu, mono i meso gakwe gakungʼalala nha moto, ne migulu yakwe yikungʼalala yinha cuma cizelu cono cikungʼalala.

¹⁹ Nigamanyile i metumo gako gose. Kanyhi manyile no wendo wako, no wihuwilo wako, u witumami wako, hamonga no wukangalizi wako. Agwe aluno wukwituma viswanu muno si nha hamwamulizo.

²⁰ Ninga nina nghani monga du kuliʼgwe, nayo yoyi, Agwe wukumukangalila ayulyo mucekulu mono yakucemwa Yezebeli, mono yakwiyitya mwene yo muwizi wo Mulungu. Mwene yuyo Yezebeli yakuwa kuwafunda, kanyhi yakuwasutizya i wetumami wangu wasenyhe no kulya zindigwa zono zikumbiciywe vihwani.

²¹ Nimuleceye cipango co kunena wubi wakwe, ningo mwene ho si yakusaka kwilega no wusenyha wakwe.

²² Alu, wuhulicize! Neza kumutaga mu citanda, i hanhu hono mwene hamonga na wose wono vyasenyhana nayo, wotuga magazo makali. Heya, ninga nonoza nha vivyo, hono walece kunena metumo gawo mabi gono vyetumana nayo.

²³ Kanyhi nowawulaga i watyatyi wakwe, i makanisa gose ho gamanye vyono yo nene du mono nizimanyile zinhumbula ne mahweso ge wanhu. Nane nomulipa munhu wo wose muli nyenye nha vyono genha i metumo gakwe.

²⁴ “Ninga anye mo wanji mono muli kuko ku Tuwatila, mono si mukugatyatye mafundo gakwe yuyo Yezebeli, na kanyhi mono si mweyijiza cico cono wakucicema wakutya, ‘Ze cinyele za Setani,’ nghumulonjelenyi vyono si nomutwicenyi mutegulo wunji.

²⁵ Ninga munojeye mukamisize lukulu cono mwina naco lulu, sunga kolo neza kuza.

²⁶ Wono wosuma no kukamisa sunga ko ku ndumo, hamonga no kwituma zo wuhile wangu, wawo nowapela wulajilize muli makungugo.

²⁷ Heya, nowapela i vilungo vi vilya vyono nane navibocela kulawa kuli Baba.

²⁸ Nawo wogatema makungugo no kugadimila nghome ya cuma, no kugatulanjiza nha ciya ce lilongo. Kanyhi nowapela i nyelezi yi mwacinghunghu.

²⁹ “Mono yena makutu go kuhulicila, ale yazihulikaje zono u Muhe yakugalonjela i makanisa!