Wugubule 19 - I CILAGANE CIPYA 1991

¹ Hanyuma ya zizo, nghahulika cinhu, kotya lizi yiwaha lye mapuga ge wanhu wenji ku wulanga, likutya, “Muwaha yalumbwe! I mhono no lukumyo, ne vilungo, nha vyo Mulungu wetu!

² Hambi iningʼaniza yakwe nha ye mbeka kanyhi ye lingʼani. Hambi nha kamulingʼaniza u musenyha muwaha, mono yali yakondya kuyajiliza yinze ku so wusenyha wakwe. U Mulungu kamulingʼaniza yuyo Babiloni likaya liwaha vyono lyawawulaga i wetumami wakwe!”

³ Nawo wakazoza kanyhi wakutya, “Muwaha yalumbwe! Hambi i lyosi lyo moto wono woliticimiza likaya lilyo, nha lyowa kwikala likufungha cibitilila ne cibitilila!”

⁴ Nawo i wawaha wawalya makumi mejete na wane, hamonga ne viwumbwa vine vyumi, wakagwa hasi, wakamuhembo Mulungu mono yekaye mwigoda lyo wutemi, akuno wakutya, “Heya! Mulungu yalumbwe!”

I zindigwa ze halusi yo Mwana we ngholo

⁵ Hanyuma lizi likalawa mwigoda lyo wutemi, likutya, “Mumulumbo Mulungu anye nyo wetumami wakwe wose, na wose mono mumogopile, i wadodo ne wawaha.”

⁶ Hanyuma kanyhi nghahulika lizi yiwaha lye lipuga yiwaha lye wanhu, na lye malenga menji, na lye mabalalusi mawaha, nalyo lizi lilyo likutya, “U Mulungu yalumbwe! Hambi u Muwaha u Mulungu wetu u Mudaha vyose nha yo Mutemi!

⁷ Ale cisecelele kanyhi cisangalale, cimukumye, hambi i cipango ce halusi yo Mwana we ngholo nha cafika, bibi halusi nayo nha yewikaniza yakondya.

⁸ Nayo yavwalile mwenda we bafuta swanu…, kanyhi yikungʼalala!” (U mwenda wuwo we bafuta swanu go metumo maswanu ge wanhu wo Mulungu.)

⁹ Nayo malayika yakanonjela yakutya, “Wuzandikaje azino, Wamoti wono wacemeywe ku zindigwa ze halusi yo Mwana we ngholo!” Yakanonjela kanyhi yakutya, “Zizo zo nghani ze mbeka yo Mulungu.”

¹⁰ Ale, nane nghagwa hasi funama ha magulu gakwe nghuhila nimuhembe. Ninga mwene yakanonjela yakutya, “Leka! Ane nane nili mwitumami du nha gwegwe hamonga ne wanduguzo, ase wose mono ciyikamisaga i mbeka yiyilya yono Yesu yayigubula. Muhembo Mulungu!” Hambi i mbeka yono Yesu yayigubula, yo yikuwamulicila wawizi.

U mupanda fwalasi i nzelu

¹¹ Nghawona wulanga wugubuce, na kuko kukawa na fwalasi yinji nzelu swe, na mono yali yapandile mucanyha yayo, yacemagwa “Mwihuwilwa,” ne “Mbeka.” Yuyo mwene kehomaga ku soko ye lingʼani.

¹² I meso gakwe gali genha ilambi lyo moto, nayo yali yavwalile mikumbo minji mu mutwe wakwe. Nayo yali mwandice litagwa lyono yunji wo wose si kosuma kulimanya, langa mweneco du yali wene.

¹³ Kanyhi yali yavwalile civwalo cono cali cilowece mu sakami. Ne litagwa lyakwe yuyo yacemagwa, “I nghani yo Mulungu.”

¹⁴ Ne mapuga ga wa ku wulanga gakamutyatya akuno wali mucanyha ye zifwalasi zinzelu, nawo wali wavwalile vivwalo vye bafuta nzelu kanyhi yelile muno.

¹⁵ No mumaje mukali wukulawa mu mulomo wakwe, nayo kowasumila, we makungugo, u mumaje wuwo. Nayo yo mweneco mono kotema muli wene ne nghome ya cuma, akuno yakuminyila idivayi mu ciya co kuminyila zizabibu ze likuwo liwaha lyo Mulungu u Mudaha Vyose.

¹⁶ Na mu vivwalo vyakwe hamonga na mu mugulu wakwe, yali mwandikwe litagwa lya, “U Mutemi we watemi, no Muwaha we wawaha.”

¹⁷ Kanyhi nghawona malayika yunji yemile mwizuwa. Nayo yakalonga yazozize muno, yakucema i zindeje zose zono zikuguluka mu mwanya, yakuzitya, “Anye, nzonyi! Ale mwikongholelaje hamonga so ndigwa ye sikukuu yo Mulungu.

¹⁸ Ale, nzonyi muzilye zi nyama ze miwili ye watemi, na ze miwili ye wasilikale wawaha, ne ze miwili ye wanhu we vilungo, na ze miwili ye zifwalasi hamonga na wono wazipandaga, nzonyi mulye nyama ye miwili ye wanhu wose, i wanhu i welecele ne wawanda, i wadodo ne wawaha.”

¹⁹ Hanyuma nghawona lililya lilimu, hamonga ne watemi wa kononze, hamonga ne wasilikale wawo, wekonghoye hamonga ho wehome na mono yapandile fwalasi, hamonga ne wanhu wakwe.

²⁰ Ninga lilimu lilyo likasolwa mateka, hamonga no muwizi wo wulambi, mono yanozaga mapoto ha mwande yalyo. (Na ku so mapoto gago, yasuma kuwajiliza wenji wono wali wena i citanjilo ce lilimu lilyo, kanyhi na wono wacihemba ne cihwani calyo.) Ne lilimu lilyo hamonga no muwizi yuyo, wose vyono wejete wakagumilwa vyo womi du, mwilamba lyono lyakaga moto we cibiliti.

²¹ I wasilikale wawo, wakawulagwa ko mumaje wono walawa mu mulomo wa yuyo mono yali yapandile fwalasi. Ne zindeje zose zikalya zinyama ze miwili yawo sunga zikeguta.