Wugubule 13 - I CILAGANE CIPYA 1991

I vilimu vyejete

¹ Hanyuma nghawona yilimu linji likulawa kwilenga. Nalyo lyali lina mitwe mupunghati ne mahembe ikumi, ne mahembe gose limonga limonga lyali lina mukumbo. Ne litagwa lye nhovu kuli Mulungu, lyali lyandikwe mu mitwe yiyo.

² Ne lilimu lilyo lyono nawona, lyali lihwanile nha suwi, ne migulu yalyo yikawa yihwanile nhe migulu ye duhu, no mulomo wukawa nha we simba. I lizoka li lilya, likalipela lilyo lilimu vilungo vyalyo, ne ligoda lyalyo lyo wutemi, hamonga no wuwaha winji.

³ No mutwe wumonga we lilimu lilyo, wejelaga nha wali wina ikomele yiwaha muno, ninga i nghomele yiyo yali yakondya kunoga. Ne lilimu lilyo likawapela mezino mawaha muno, i wanhu wose wa mononze, sunga wose wakawa kulityatya.

⁴ Wanhu wose wakalihemba lilyo lizoka, vyono lyalipela lilimu lilyo vilungo vyalyo. Kanyhi wakalihemba na lilyo lilimu nha vivilya wakutya, “Alo naniʼmbi kanyhi mono kowa yenha ililimu lili? Hamba nani kanyhi mono kosuma kwihoma nalyo?”

⁵ Hanyuma yayo lilimu lilyo likakombolwa ho lilonje makani ge nhovu nha vyono lyendile, limutovule u Mulungu, kanyhi likakombolwa ho liwe no wulajilize kwa myezi makumi mane na myejete.

⁶ Hodu nalyo likawa kwamula kumuligango Mulungu, no kuliliga litagwa lyakwe, no wikalo wakwe, hamonga na wose wono wekaye ku wulanga.

⁷ Kanyhi lilimu lilyo likakombolwa ho vihome wulugu no kuwasumiza i wanhu wo Mulungu. Kanyhi likapegwa wulajilize muli wanhu we zimbeyu zose, na wose we ndelwa monga, na we zinonga zose, na we makungugo gose.

⁸ Na wose wono wekaye mononze wolihemba, ninga awalya wono matagwa gawo gandikwe mu citabu co wumi co Mwana we ngholo mono yawulagwa ku wulawo mwamulizo we yinze, wawo langa si wolihemba yaye.

⁹ “Holeka mono yene makutu go kuhulicila, ale yahulice!

¹⁰ Nawo wono wawicilwa ho wasolwe mateka, awo wolosolwa mateka du, nawo wono wawicilwa ho wawulagwe ko mumaje, awo nawo wolowulagwa, ko mumaje du. Holeka yiwanojeye i wanhu wo Mulungu wawe no wukangalile wuwaha hamonga no wuhuwilo.”

¹¹ Hanyuma kanyhi nghawona yilimu linji likulawila, likulawa kusi yeʼzi. Nalyo lyali lina mahembe mejete gono genha ge nyana ye ngholo, nalyo lyalongaga nhe lizoka.

¹² Nalyo lyali lina wulajilize wono wukwilaniciye kuwulawa kwilimu lililya lilongozi, nalyo likavitumamile vilungo vivyo baho du ha meso ge lilimu lilongozi. Kanyhi likawa kuyidindimiza yinze yose, hamonga na wose wono wali mumo, ho walihembe lilyo lilimu lilongozi lyono lyali lina ikomele yiwaha muno lyo wufwe, lyono lyali lyakondya kunoga.

¹³ Nalyo lilimu lilyo lye kejete likanoza mapoto mawaha gono sunga gasuma kuleta moto kuwulawa ku wulanga, wutime mono yinze hali meso ge wanhu.

¹⁴ Likawajiliza wanhu wenji wono wekaye mononze, ku so mapoto gago gono lyapegwa liganoze ha mwande ya alilya lilimu lilongozi. Nalyo lilimu lilyo likawalonjela wanhu wono wekaye mononze, wanoze cihwani so kulipela yilumbo lilyo lilimu lyono lyali lina likomele yiwaha muno lyono lyatemangwa no mumaje, ninga alu likuwumipa kanyhi.

¹⁵ I lilimu lye kejete, likapegwa kanyhi wusume wo kuliputilila muhe cihwani ce lilimu lililya lilongozi, naco cihwani cikasuma kulonga, no kuwawulaga wanhu wose wono si wacihemba cihwani cico cene.

¹⁶ I lilimu lilyo likawadindimiza wose, i wadodo ne wawaha, i wagoli ne waciwa, i welecele ne wawanda, wawicilwe citanjilo mu miwoko yawo yo kulume, hamba mu wusu wawo.

¹⁷ I lilimu lilyo likalemezeza lukulu munhu wo wose yalece kugula hamba kuguza cinhu co cose, langa munhu yuyo du mono yena citanjilo cico, ce litagwa lye lilyo lilimu, hamba liwalo lye litagwa lilyo.

¹⁸ Baho ho howuli wizuce! Mono yena mahala yo kosuma kuyimanya nhunizo ye liwalo lye lilimu lilyo, hambi nha liwalo lyono lina nhunizo yo munhu wo wutunga. Ne liwalo lilyo nha lyoli, magana mutandatu na makumi mutandatu na mutandatu.