Wugubule 11 - I CILAGANE CIPYA 1991

I wahomelezi Wejete

¹ Hanyuma nghapegwa cidete cono cihwanile cibici ca kupimila, nghalonjelwa nhavi, “Ale winukaje wukawupime u wuhembelo wo Mulungu, hamonga no wukumbicilo wo kufusiza wuvumba kanyhi wuwawale ne wanhu wono wakuhembela mumo mu wuhembelo.

² Ninga wulece kulipima libululu lyono lili kunze yo wuhembelo, hambi libululu lilyo nha lyapegwa wanhu we makungugo ganji, wanhu wono wolikanyanjlia i likaya lyono lyelile mu myezi makumi mane na myejete.

³ Nane nowatuma wahomelezi wangu wejete, ho wayiganule i nghani yo Mulungu mu cipango cico ce vilo elufu monga na magana mejete na makumi mutandatu, akuno wowa wavwalile vivwalo vye magunila.”

⁴ Ne wahomelezi wawo wejete, yo mibici myejete ye mizeyituni, ne zitala zinyejete zono zimaga hali Muwaha we yinze.

⁵ Na hono munhu wo wose yejelele kuwatamisa, u moto wulawaga mu milomo yawo no kuwongomeza walugu wawo. Na munhu wo wose mono kokwijelela kuwatamisa, ale yuyo nayo kowulagwa nha vivyo.

⁶ Wawo wena vilungo vyo kuwudindila wulanga, ne mvula ho yilece kutonya mu cidaha cono wakuyiganula nghani yo Mulungu. Kanyhi wena vilungo vyo kuyipitula i mivwilo yose ye malenga yiwe sakami, sunga ne vilungo vyo kusuma kuleta magayo ge liwala lyo lyose mononze mwipango lyo lyose lyono weneco wendile.

⁷ Ninga kolo weza wakondya kuyiganula nghani yiyo yo Mulungu, nimu yono yolawila mwikombo lyo wuninyina, yokwihoma nawo, nayo yowasumiza no kuwawulaga.

⁸ Ne mivimba yawo yokwikala mu zibalabala ze likaya liwaha, ihanhu hono u Muwaha wawo yatumbicilwa mu musalaba, i litagwa lye colecezo ce likaya lilyo, yo Sodoma hamba Misili.

⁹ Ne wanhu we zimbeyu zose, na we zinonga zose, na we makungugo gose, sunga na we mawala gose, wojendelela kuyilange mivimba yiyo sunga vilo vidatu ne pinga, hamba siwoyikombola mivimba yiyo ho yizikwe.

¹⁰ Ne wanhu wose wono wekaye mononze, wowusecelela wufwe wa wawo wanhu wejete. Nawo wonoza sikukuu, no kwipela vipe gwa munhu na muyagwe, vyono wawa wawizi wejete wali wawagaza muno, i wanhu wa mononze.

¹¹ Ninga vyaza kuwa vyapuluta vilo vivyo vidatu ne pinga, u muhe wo wumi wukalawa kuli Mulungu wukawenjila wawo wawizi wejete, nawo wakenuka wakema wima, na wose wono wawawona, wakenjilwa na woga wuwaha.

¹² Hanyuma, ya zizo, wawo wawizi wejete wakahulike lizi yiwaha likulawa ku wulanga, likuwalonjela likutya, “Nzonyi akuno kono canyha!” Nawo wakawa kubitila mwivunde kucanyha ku wulanga, akuno ne walugu wawo wakuwalanjilila du.

¹³ Na mwidaha lilyo likaza itulo yiwaha lyeʼsi, ne libimha lye likumi lye likaya likagwa. Ne wanhu elufu mupunghati wakawulagwa ku soko ye litulo lilyo lye yisi. Ne wanhu wono wasigala wakawa kogopa muno, wakamukumyo Mulungu wa ku wulanga.

¹⁴ I magazo ge kejete gapuluta, ninga langa ta! I magazo ge kadatu gokuza musunho.

I ndulele yo mupunghati

¹⁵ Hanyuma, nayo malayika wo mupunghati yakayitowa ndulele yakwe. Ne mazi mawaha gakahulikwa ku wulanga gakutya, “Alu u wutemi wa mononze, weza wo Muwaha wetu na Kilisito wakwe. Nayo kotema cibitilila ne cibitilila.”

¹⁶ Nawo i wawaha wa walya makumi mejete na wane, wono wali wekaye hali Mulungu, mu magoda gawo go wutemi, wakagwa funama, wakamuhembo Mulungu, wakutya,

¹⁷ “Muwaha Mulungu Mudaha vyose mono wuli ho yuli, na mono wali wuli baho! Cikukulumba, vyono kwitumamila vilungo vyako viwaha wukamula kutema!

¹⁸ Wanhu we makungugo wakakolwa ikuwo, vyono lidaha lye likuwo lyako lyakondya kuza, lyo kuwalingʼaniza i wafu. Naco co cipango co kuwapelela ligawo lyawo wetumami wako wawizi wanhu wako, na wose wono walikumyaga, litagwa lyako, wawaha ne wadodo. Kanyhi co cipango co kuwongomeza wono wakuyongomeza yinze.”

¹⁹ I Nyumba yo Mulungu ku wulanga yikadigulwa, ne lisanduku lye cilagane cakwe likejela mumo mu wuhembelo wakwe. Hanyuma vikawa kuza limuli, ne lizi, mabalalusi, ne mafulo ge yisi, hamonga ne mvula mbaha ye mabwe.