Walumi 3 - I CILAGANE CIPYA 1991

¹ Hambi Muyahudi yawacizize cici iwanhu wanji? Hamba kwalama kwina cambuzi ci?

² Heya, kocili cambuzi mbavu zose, inongozi, u Mulungu yawakoza i Wayahudi inghani yakwe.

³ Ninga ho yowa wule hono wanji wayawo si wali wehuwilwa? Hambi inghani yiyo yowuwusa u wihuwilwa wo Mulungu?

⁴ Aa, ngʼo! Hambi u Mulungu nha kekalaga mwihuwilwa cibitilila, hamba yiwe iwanhu wose walambi. Nha vyono gakulonga i Mandiko Gono Gelile, “Gwe go Mulungu, ho hose hono wukulonga, Zinghani zako zo ze lingʼani, Na mu ningʼaniza, agwe wukuwa kusuma.”

⁵ Ninga hono u wubi wetu wuwe wukuhomelela, vyono u Mulungu ketumaga kwe lingʼani, alu colonga cici kanyhi? Hambi cosuma kutya yasina lingʼani lono yakucifunda? (Aha nghulonga cimunhumunhu.)

⁶ Hamba hadodo! Yali yiwe yili nhavivyo, u Mulungu yali yasume nhawule kuyilingʼaniza yinze?

⁷ Na lunji kotya, “Hono u wula wihuwilwa ku lubavu lwangu, wo wukumulajila u Mulungu vyono yo mwihuwilwa muno, no kumupela lukumyo, holeka si nali nojeye ningʼanizwe nha nili muhodanji.”

⁸ Yili sawa na vyono watezaga, “Citume vibi ho cituje i ziswanu!” Nha vivyo vyo wanji wakucivila, no kucisonjeza, wakutya ati vyo cikwijiza. Ninga walekaje! wolingʼanizwa vyono yiwanojeye!

Hasina munhu wo wose mono yali lingʼani

⁹ Alu colonga cici kanyhi? Hambi ase co Wayahudi cili waswanu si nha wanji? Hamba hadodo! Hambi nha nakondya kulonga kuwulawa ha mwamulizo vyono, i Wayahudi ne wanhu we makungugo ganji, wose wali mu wubi.

¹⁰ Nha vyono gakulonga i Mandiko Gono Gelile. “Hasina we lingʼani hamba monga.

¹¹ Hasina munhu mono yakwizuka, hamba mono yakumulondola u Mulungu.

¹² Wose wapatuka, Wose wena vilema, Hasina mono yakwituma ziswanu, Hasina hamba monga.

¹³ Imimelo yawo yinha icitenjelo cono cili mwazi, Ne zinimi zawo zimemile wukonji, Na mu milomo yawo, mukulawa zinghani zono zina sumu kotya ya nzoka.

¹⁴ Mu milomo yawo mumemile malijito makali.

¹⁵ Imigulu yawo yili mu lumangho kuwite sakami,

¹⁶ na ho hose hono wobita, waletaga wuhodanji no wugaye.

¹⁷ Ne nzila yo mulamu, si wayimanyile,

¹⁸ hamba ne nghani yo kumogopa u Mulungu, yili musina muli wene.”

¹⁹ Cimanyile vyono, u Wulajilize wuli baho ku soko ya wono wali hasi yo Wulajilize wuwo, ho walece kuwa na cikojelo co cose. Ne yinze yose yili hasi yo wulingʼanizwe wo Mulungu.

²⁰ Hambi nha hasina munhu wo wose, mono kosuma kuvumilwa hali Mulungu so wibatoʼ lajilize, ku soko u mulimo wo Wulajilize, wene wukuwa kumulajila du munhu vyono yetumile wubi.

Kuvumilwa hali Mulungu ku so Wihuwilo

²¹ Ninga alu, inzila yo Mulungu yo kuwanoza iwanhu ho wavumilwe hali mwene, yakondya kwanzalikwa calinze, yo nzila yono si yikwitumbila u Wulajilize. Uwulajilize ne wawizi, vyose vikuyihomelela inghani yiyi.

²² U Mulungu yakuwanoza iwanhu, ho wavumilwe hali mwene mu nzila yo wihuwilo wawo, muli Yesu Kilisito: Nayo u Mulungu, ketumaga nha vivyo kuli wose wono wakwihuwila, hamba hasina wusiwanule wo wose.

²³ Iwanhu wose wetumile wubi no kucepucilwa no lukumyo lo Mulungu.

²⁴ Ninga so lihewa lyo Mulungu du, iwanhu wose wakunozwa wali lingʼani, no kuvumilwa hali mwene mu nzila ya Yesu Kilisito mono yawakomboza.

²⁵ U Mulungu yamulavya mwene, ku so sakami yakwe, yawe nzila yo kuwawusiza iwanhu u wubi wawo, so wihuwilo wawo wa kuli mwene. Yanoza nha vivyo, ho yelajile vyono u Mwene yo we lingʼani. Baho ikatali u Mulungu yakangalilaga hamba si yehwesaga zo wubi we wanhu,

²⁶ ninga alu, mwidaha lili yakwihoma no wubi we wanhu, ho yasume kulajila ze lingʼani yakwe. Na ku soko yiyo u Mulungu mweneco yakuwa kulajila vyono u mwene yo we lingʼani, na vyono yakumunoza munhu wo wose mono yamwihuwiye Yesu, ho yasume kuvumilwa nayo.

²⁷ Hambi cosuma kwilumbila ya hayi? Hasina! Ku soko ya hayi? Hamba vyono cikuwufisiliza u wulajilize? Aa, ngʼo, langa ku soko vyono cihuwiye.

²⁸ Hambi u munhu nha kanozagwa yavumilwe hali Mulungu so wihuwilo, du, hamba si so kufisiliza u wuhile wo wulajilize.

²⁹ Alu ma, u Mulungu yo Mulungu we Wayahudi du, hamba wa wanhu we makungugo ganji nha vivyo? Nakatuti yo we wanhu we makungugo ganji nha vivyo.

³⁰ Mulungu yo yumonga, nayo kowanoza i Wayahudi wavumilwe hali mwene so wihuwilo wawo, ne wanhu we makungugo ganji nawo, so wihuwilo wawo.

³¹ Alu cikuwitumamila u Wihuwilo ho ciwuwembule u Wulajilize? Aa, ngʼo, langa cikuwukamya u Wulajilize.