Walumi 2 - I CILAGANE CIPYA 1991

Iningʼaniza yo Mulungu

¹ Holeka go munhu, wusina cikojelo, mono wukuwalingʼaniza iwayago, hamba wuwe vyono winha. Hambi hono wukuwalingʼaniza i wanji, nha wukwilijita go mweneco, ku soko vyono na gwegwe go mweneco nha wukwituma zizo zono wukuwalingʼaniza iwayago.

² Nase cimanyile vyono i ningʼaniza yo Mulungu yo ye mbeka mbeka kuli wono wakwituma makani ge nha vivyo.

³ Holeka agwe go muyangu mono wukuwalinʼaniza wono wakwituma imakani gaga, akuno kanyhi na gwegwe go mweneco go wukwituma, wukwihwesa alu kolokwilega ku ningʼaniza yo Mulungu?

⁴ Hamba lunji wukuwubedegala u wuswanu wakwe, ne ngola yakwe, no wukangalile wakwe, hamba si wukumanya vyono u wuswanu wuwo wo Mulungu, wukukutonga ho wusume kunena?

⁵ Ninga so wukamu ne cibede ca munhumbula yako, wukwiwicila go mweneco ilikuwo, kwizuwa alilya lyono ilikuwo lyo Mulungu lyono lina i ningʼaniza ye lingʼani lyologubulwa.

⁶ Mwizuwa lilyo, u Mulungu, kolomulipa munhu wo wose nha vyono genha imetumo gakwe.

⁷ Awalya wono wakulondola u lukumyo ne lilumbo vyo Mulungu no wusangalale, no kuwulondola uwumi, wawo wotuga u wumi wecibitilila.

⁸ Ninga awalya wanji wono wakulema izinghani ze mbeka, langa wakutyatya izimbi, u Mulungu kolowamwajila ilikuwo no wukali wakwe.

⁹ U munhu wo wose mono yakwituma izimbi, kotuga magazo no wusungu. Lulongozi gowatuga Wayahudi, hanyuma sunga ne wanhu we makungugo ganji nha vivilya.

¹⁰ Ninga u Mulungu kowapela u lukumyo ne lilumbo no mulamu, awalya wono wakwituma iziswanu, lulongozi Wayahudi, hanyuma sunga ne wanhu we makungugo ganji nha vivilya.

¹¹ Hambi u Mulungu nha yasina wusiwanule kuli munhu wo wose.

¹² Hambi wose wono wakwituma wubi akuno si wawumanyile u Wulajilize wa Musa, nha wolokwajilila du, hamba wawe si wawumanyile u Wulajilize. Nawo wono wakwituma wubi kuno ho wawumanyile no Wulajilize, nawo wololingʼanizwa mu Wulajilize.

¹³ U munhu, si kosuma kuvumilwa hali Mulungu, so kuwuhulika bwete du Wulajilize, langa mono yakuwituma Wulajilize.

¹⁴ Nha cinji, iwanhu we makungugo ganji, wasina u Wulajilize wa Musa, ninga lono wakwituma zono zili mu Wulajilize, nha vyono wakutongwa ne viselinji vyawo, ale weneco waweza cipimo co Wulajilize, hamba wawe si wawumanyile u Wulajilize.

¹⁵ Imijendele yawo weneco, yikulajila vyono u mulimo wo Wulajilize, wandicigwe mu zinhumbula zawo. Ne viselinji vyawo, vikuyihomelela inghani yiyi nha vivyo, vyono hanji imahweso gawo gakuwahosa, na hanji gakuwatetela.

¹⁶ Holeka nha vyono lwinha u Luganuzi lulu Luswanu lono nghumuganulilenyi, nha vivyo vyo lyolowa ilizuwa lyono u Mulungu kolozilingʼaniza zose ze cinyele ze wanhu, muli Yesu Kilisito.

I Wayahudi no wulajilize wawo

¹⁷ Alu nagwe ma, Agwe go mweneco wukwiyitya wuli Muyahudi, kanyhi uwitumbiye u Wulajilize, no kwiwona nha vyono agwe wuli wo Mulungu,

¹⁸ na mu Wulajilize mo wukumanyila u wuhile wo Mulungu, nagwe kosuma kuhagula iziswanu,

¹⁹ kanyhi wukwiwona nha wuli mutonji we wabofu, no wuzelu kuli wono wali mu citi,

²⁰ wukwiwona nha wuli mulanjilizi we walele, na mwijizi wa walya wono wakali si nakangala. Na mu Wulajilize, wina wumanye wose we mejizo ne mbeka.

²¹ Alu agwe wukuwejiza wanji, nha wule alu si wukwiyijiza nagwe go mweneco? Wukuwaganulila wanji walece kuhiza, ninga kumbe gwegwe go mweneco wukuhiza.

²² Wukulonga wukutya, “Mulece kusenyha.” Na akuno gwegwe go mweneco wukusenyha, si wuvyendile vihwani vye milungu, ninga go mweneco wukwiwikaniza kuhiza mu zinyumba ze milungu.

²³ Akuno wukwiyitya ati wina u Wulajilize wo Mulungu, alu si wukuwona vyono, so wubena lilajilizo, wukumubedegala u Mulungu?

²⁴ Nha vyono i Mandiko Gono Gelile gakulonga, “I wanhu we makungugo ganji wakulitovula ilitagwa lyo Mulungu ku soko yenyu nyenye mo Wayahudi!”

²⁵ Ninga u walame wako wowa wina cambuzi, hono uwitume u wulajilize. Ninga hono wukuwubena u wulajilize, yali yiwe yili ciba, hono wali wikale si walame.

²⁶ Hono munhu we makungugo ganji mono si yalame, hono yetume u wuhile wo Wulajilize, imbeka kowa nha mono yalame.

²⁷ Iwanhu we makungugo ganji, wokulingʼaniza agwe go Muyahudi kotya nha wuli mubena Wulajilize, hamba wuwe wina imandiko go Wulajilize, na kanyhi walame, na kumbe wene ho wakwituma zo Wulajilize, hamba wawe si walame yaye.

²⁸ Nha cinji wo wutya, si vyono Muyahudi wo wose, yaweza Muyahudi wa mbeka, hambi munhu nha si kawezaga Muyahudi wa mbeka, ati kusoko vyono yalame mu muwili.

²⁹ U Muyahudi wa mbeka, yo yulya u Muyahudi wa mugati, yuyulya mono yalame mu nhumbula. Ne nghani yiyi, yo nghani ya Muhe, hamba si nghani ya mandiko go Wulajilize. No munhu we liwala lilyo, yakutuga lilumbo, si muli wanhu, langa muli Mulungu.