Walumi 13 - I CILAGANE CIPYA 1991

I cihuliko kuli walongola we yisi

¹ Yimunojeye munhu wo wose, yaweze ne cihuliko kuli walongola wono wena u wulajilize mu Selekali, hambi u wulajilize wose nha wulawaga kuli Mulungu, nawo iwalongola wono wena uwulajilize, wawicigwe no Mulungu.

² Na mono yakwisumaniza no uwulajilize we walongola, yuyo yakupinga ililajilizo lyo Mulungu, nawo wono wakunoza nhavivyo, wakwiletela weneco wulingʼanizwe.

³ Hambi wono watemile, nha si wakuwa kuwogofya iwanhu waswanu, langa iwanhu wabi. Holeka hono wuwe wukusaka wulece kumogopa munhu mono yena u wulajilize? Ale witumaje iziswanu, nayo kokulumba,

⁴ hambi u mwene nha mwitumami wo Mulungu, mono yakwituma u mulimo so cambuzi cako go mweneco. Ninga hono witume vibi, ale wogope, hambi nha mbeka, yena uwulajilize wo kulavya wulipicize. U mwene yo mwitumami wo Mulungu, umwene kalifisilizaga i likuwo lyo Mulungu, kuli wose wono wakwituma izimbi.

⁵ Holeka yinojeye kuwahulika iwalongola, wono wena u wulajilize, ninga si so wogopa ilikuwo lyo Mulungu ngʼo, langa ku soko vyono ne ciselinji naco, cikusaka nha vivyo.

⁶ Holeka ku soko yiyo anye mulipaga kodi, ku soko vyono i walongola wawo, wamwitumamilaga u Mulungu, lono wawe wakufisiliza vyono yiwanojeye kwituma.

⁷ Mumupelaje munhu wo wose vye lingʼani yakwe, munhu we kodi mu mupelaje kodi yakwe, nayo munhu we lilumbo mumupelaje lilumbo lyakwe.

U wiyende we cidugu

⁸ Mulece kuzijliwa na yunji wo wose cinhu co cose, langa mweze kuzijilwa u mugawa wo kwiyenda nyenye wose. Hambi mono yamwendile u muyagwe, nha kafisiliza u wulajilize.

⁹ Hambi imalajilizo gaga, “Wulece kusenyha, wulece kuwulaga, Wulece kusulumila,” sunga na ganji gose, gali mwilajilizo limonga, “Umwendaje u muyago nha vyono wiyendile gwegwe go mweneco.”

¹⁰ Mono yamwendile u muyagwe, si kosuma kumunozeza vibi. Holeka mu wendo, mo wukufisilizizwa u wulajilize wose.

¹¹ Hamonga na zizo, anye mo weneco, mumanyile vyono cili mwidaha lya hayi, alu co cipango co kusinhuka mu zinhongo, heya, imhonelo yetu luno, yili behi muno si nha lono cehuwilila.

¹² Icilo ceza malika, no wusiku weza behi kwela, Holeka alu, cilecele lukulu kwituma imetumo ge citi, langa civwale ivitwalo vyo kwihomela mu wuzelu.

¹³ I mijendele yetu, yeze yina cogopo nha vyono yinojeye mu misi, cilece kuwa no wubugu no wugala wujimbi, si mwihede na mu wusenyha, si mu wugombane no wivu.

¹⁴ Langa u Muwaha Yesu Kilisito yaweze co civwalo cenyu, kanyhi mulece kwipiganziza u wusulumizi wenyu wo muwili, no kuwufisiliza.