Walumi 11 - I CILAGANE CIPYA 1991

Ulusungu lo Mulungu kuli Waisilayeli

¹ Alu nghuwuza nghutya, u Mulungu yawakumhila kutali iwanhu wakwe? Aa, ngʼo. Hambi na nene nha nili Muisilayeli, we mbeyu ya Abulahamu, we nghungugo ya Benyamini.

² U Mulungu si yawakumhila kutali iwanhu wakwe wono yali yawasiwanuye kulawa na katali. Mukumbuciye mwene za Eliya, vyono gakulonga i Mandiko Gono Gelile, mwipango lyono yamungʼungʼulicilaga u Mulungu, ku soko ya Waisilayeli.

³ “Gwe Muwaha, wawawulaga iwawizi wako, wawumwagula no wukumbicilo wako. Nane nasigala nili wene du, nawo wakusaka kunibulaga?”

⁴ U Mulungu yamupitula Eliya yakamutya nhawule? Yamutya nhavi, “Nisigazize wanhu elufu mupunghati wono wakali si namuhemba baali.”

⁵ Nha vivyo vyo yinha, sunga mwidaha lili, wali baho wono u Mulungu yawasiwanula ku so lihewa lyakwe.

⁶ U wuhagule wakwe wukulawilila mwihewa lyakwe, hamba si ku soko ye metumo gawo. Hambi hono u wuhagulwe wakwe wali wuwe wuli mu wulanga imetumo ge wanhu, kwaco ilihewa lyakwe si lyali liwe yihewa lya mbeka.

⁷ Alu ma? Iwana wa Isilayeli si wacituga cono walondolaga, langa iwahagulwa wo wacituga. Wanji wakanozwa kuwa wakamu.

⁸ Nha vyono gakutya i Mandiko Gono Gelile. “U Mulungu yazinoza izinhumbula zawo ziwe nghamu, Sunga ne nzuwayi, si wakusuma kuwona kwe meso gawo. Hamba kuhulika kwe makutu gawo.”

⁹ Nayo Dawudi yakutya, “U wulilo wawo wuweze mutego wo kuwagwiza weneco, Wagwe no kulipicizwa.

¹⁰ Ne meso gawo gatukuwazwe, Walece kuwona. No kuwaleka weyinamizye mu wugaye nhondo zose!”

¹¹ Nane nghuwuza nghutya, alu i Wayahudi wekobala ho, sunga wakajilila lukulu wose? Aa, ngʼo, vyo si vinha! Langa ku soko yo wugwe wawo, imhonelo yiwaziza i wanhu we makungugo ganji, i Wayahudi ho wawawonele wivu.

¹² Holeka hono u wugwe wawo, wuwaletela we yinze wugoli wo wumoteswe wuwaha, ale nha vivyo wuwe wawo wo kuwa wasina i mikalile miswanu ye cimuhe, wuwaletela wumoteswe wuwaha iwanhu we makungugo ganji. Holeka yili calinze muno, vyono wukwilanicile wawo, woleta uwumoteswe winji muno.

U wukombozwe we wanhu we makungugo ganji

¹³ Ninga nghumulonjelenyi anye mo we makungugo ganji, Vyono ane naweza nili mutumwa kuli wanhu we makungugo ganji, nghwiyilumbila u witumami wangu,

¹⁴ ho sume kuwanoza i Wayahudi wayangu, wamuwonelenyi nyenye wivu, nane ho sume kuwaponya wayawo wanji.

¹⁵ Hambi hono yiwe u wulemwe wawo wukayiletela iyinze u wilamule no Mulungu, alu ho yowa wule mu cipango cono wovumililwa no Mulungu? Iwafu wolozuka!

¹⁶ Hono i cibegulwa cilongozi co mukate ciwe casiwanulwa, hodu no mukate wose wasiwanulwa wakondya; nayo imilela yo mubici hono yiwe miswanu, ne manhambi gayo gawezaga maswanu nha vivilya.

¹⁷ Heya, ninga imanhambi ganji go muzeyituni wa mu mugunda gadumulwa, ne hanhu hayo, ilinhambi lyo muzeyituni wa mu mbago likalumbicizwa. Nanye mo wanhu we makungugo ganji, yo nyenye mono lyo linhambi lilyo lyo muzeyituni wa mu mbago, aluno mukuhanga ivilungo ne mele, vyo muzeyituni wa mu mugunda.

¹⁸ Holeka mulece kuwabedegala awalya wono wadumuligwe nhe manhambi! Hamba muwe mwina inghani yo kwilumbila, ninga mweze kukumbucila vyono, yo si nyenye mo weneco, mono mukuyisikamya yiyo imilela, langa imilela yo yikumusikamyenyi anye.

¹⁹ Lunji kowa kutya, “I manhambi gapanyulwa, ane ho numbicizwe i hanhu hayo.”

²⁰ Sawa, gapanyulwa ku soko yo wula wihuwilo, ninga agwe wimile ku soko yo wihuwilo wako. Ninga wulece kwilumba, langa wogope.

²¹ Hambi hono u Mulungu yawe si yawawonela lusungu i Wayahudi, wono wenha lye nhambi linghalaco, alu wukwihwesa vyono kokuwonela lusungu agwe?

²² ale, weze kukumbucila vyono, u Mulungu muswanu kanyhi mukali. U mwene mukali kuli wono wagwa, ninga mwene muswanu kuli gwegwe, hono wujendelele mu wuswanu wakwe, hono si nha vivyo, nagwe kodumulwa.

²³ Ne Wayahudi nha vivyo, hono wawulece u wuwe wawo wo kuwa wasina wihuwilo, wolumbicizwa kanyhi. Hambi u Mulungu nha yena wusume wo kuwalumbiciza kanyhi.

²⁴ Nanye mo wanhu we makungugo ganji ku cihuma, mwinha linhambi lyo muzeyituni wa mu mbago, ninga mwawuswa kuko, no kulumbicizwa mu muzeyituni wa mu mugunda, i hanhu hono si henyu ku cihuma. Ninga i Wayahudi ku cihuma wo wenha u muzeyituni wa mu mugunda, na yowa nghani mhelu kuli wene, ku wulumbicizwe kanyhi mu mubici wuwo u wawo.

U wupituce we Waisilayeli

²⁵ Wandugu zangu, nghuhila muyimanye imbeka yiyi yono hundikwe, ho mulece kwiwona nha muli we mahala. I cibede ce Wayahudi, cali ca cipango cidodo du, sunga kolo iwanhu we makungugo ganji wamuziza u Mulungu.

²⁶ Baho nhondo ho lyopona ilikungugo lyose lya Isilayeli, nha vyono i Mandiko Gono Gelile gakulonga. “U Muponyi kololawa mu Sayuni Kolowuwusa u wubi wa Yakobo.

²⁷ Aci co cilagane cono nocinoza kuli wene Mu cipango cono nowuwusiza u wubi wawo.”

²⁸ Ninga i Wayahudi, vyono wakululema u Luganuzi Luswanu lo Mulungu, waweza vili sili no Mulungu, ninga so cambuzi cenyu anye mo wanhu we makungugo. Ninga vyono wahagulwa no Mulungu, holeka wakali vyo wendece wo Mulungu ku soko ye wasogo zawo.

²⁹ Hambi u Mulungu, nha si kawonaga vyono vibi, lono yakondya kuwapela iwanhu ivipegwa vyakwe no kuwasiwanula.

³⁰ Baho katali, nanye mwali mwamubeza u Mulungu, ninga aluno mwakondya kulufuga u lusungu lwakwe, ku soko ye cibede cawo.

³¹ Na nha vivyo kanyhi, ku soko yo lusungu lono mwapegwa anye, i Wayahudi aluno weza kumubeza u Mulungu, ho nawo walubocele u lusungu lo Mulungu nha vivilya.

³² Hambi u Mulungu nha yawadindila wose ku cibede cawo, ho yasume kuwawonela u lusungu wose.

U Mulungu yalumbwe

³³ O, lecenyi u wugoli ne mahala no wumanye wo Mulungu, si wakulonga! Ne ziningʼaniza zakwe si za kulonga! Sunga ne zinzila zakwe si zimanyikaga yaye. Nha vyono gakulonga i Mandiko Gono Gelile.

³⁴ “Hambi nani mono yasuma kulimanya i lihala lyo Muwaha? Hamba nani mono kosuma kuwa mulanjilizi wakwe?

³⁵ Hamba lunji nani mono yamula kumupela cinji, nayo ho yagomolelwe kanyhi cinhu cico?”

³⁶ Hambi i vinhu vyose nha vilawaga kwakwe, na vyose vikawa so vilungo vyakwe, na ku soko yakwe. U lukumyo lweze kuli mwene sunga cibitilila! Heya.