Wakolosayi 4 - I CILAGANE CIPYA 1991

¹ Nanye mo wawaha, muwatendelaje kwe lingʼani ne mbeka i wetumami wenyu, akuno mukukumbucila vyono nanye nha vivyo mwina u Muwaha wenyu ku wulanga.

I malajilizo

² Mweze kulomba nhondo zose, kanyhi mweze kulanjliila lono mukulomba, akuno mukumulumba u Mulungu.

³ Mucilombelaje na sese nha vivyo, u Mulungu ho yacipele i cilejeho co kuyiganulila i nghani yakwe Kilisito yono hundikwe. Alu ane nili mu jela ku soko ya yiyo.

⁴ Holeka munombelaje ho sume kulonga nha vyono yinojeye, mu nghango yono yosuma kuyanzalika i nghani yiyo.

⁵ Mwikalaje nawo kwa mahala wono si wehuwiye, kanyhi mwitumamilaje viswanu i cilejeho cono mwina naco.

⁶ No wulonje wenyu nhondo zose weze wuswanu, wono wukwendeza, kanyhi mumanye vyono yimunojelenyi kuwapitula viswanu i wanhu wose.

⁷ U ndugu yetu mwendece, Tukiko, u mwitumami mwihuwilwa, no mwitumami muyetu mu mulimo wo Muwaha, yo komulonjelenyi zose.

⁸ Yo yilecile nghumutuma, ho yamusindamicenyi zinhumbula zenyu kolo mwahulika i zetu.

⁹ Nayo yakuza yena na Onesimo u ndugu yetu mwendece kanyhi mwihuwilwa, u munyawusi muyenyu. Nawo womulonjelenyi zose zono zikwitumwa baha.

¹⁰ Na Alisitaliko mono yali mu jela hamonga na nene, yakumulamusenyi, sunga na Maluko u mwihwawe wa Balanaba, nayo nha vivyo, (Mono mwalajizizwa, vyono hono yaze kwenyu mumubocelaje.)

¹¹ Nha vivilya na Yoshuwa mono kacemagwa Yusito, nayo yakumulamusenyi. Na muli wanji Wayahudi wono wabocela u wihuwilo, wo wawa du wali wene wono cikwitumana nane mulimo ku soko yo wutemi wo Mulungu, na kanyhi wo wakunhaza muno muno.

¹² Na Epafala nayo u munyawusi muyenyu, kanyhi u mwitumami wa Kilisito Yesu, nayo yakumulamusenyi. Kanyhi yakumulombelenyi nyenye nhondo zose ko wupiligazi, ho mwime mukamile, mukangale, mulece kusinjisika muli zose zono yakuzisaka u Mulungu.

¹³ Ndahile kumuhomelela vyono yakwituma yahidimbaye ku soko yenyu na ku soko ye wanhu wanya Lawodikeya, na wanya Hiyelapoli.

¹⁴ Luka, u muganga wetu mwendece, hamonga na Dema, wose wakumulamusenyi.

¹⁵ Muwalamusaje i wandugu zetu wose wa kuko ku Lawodikeya, mumulamusaje no lumbu lyetu Nimufa, hamonga na wono wehuwiye wose wono wetangʼanililaga mu nyumba yakwe.

¹⁶ Kolo mwakondya kuyisoma i baluwa yiyi, nhondo yisomwe ne Wakilisito wa ku Lawodikeya, nanye nhondo muyisomaje i baluwa yono wayituga wene.

¹⁷ Mumulonjelaje na Alikipo yawitumaje viswanu u mulimo wono yapegwa no Muwaha.

¹⁸ Nghwandika zizino ko muwoko wangu nene no mweneco, u Mulamu wono wukulawa kwangu nene Pawulo. Mweze kukumbucila vyono ane mbopigwe ne manyolo. Ilihewa lyo Mulungu lyeze na nyenye.