Wakolosayi 3 - I CILAGANE CIPYA 1991

¹ Holeka hono muwe mwazukulanwa hamonga na Kilisito, muhidimbale kulondola za kucanyha, kono ko yuli Kilisito, yekaye ku lubavu lo kulume lo Mulungu.

² Mwibataje mukamise zinghani za ku wulanga, ninga si zono zili mononze.

³ Hambi anye nha mwafwa, no wumi wenyu wuhundikanwe hamonga na Kilisito muli Mulungu.

⁴ Na Kilisito wo wumi wenyu we mbeka, yalaza kwijela, ale, anye nanye baho ho molokwijela hamonga nayo mu lukumyo.

I mikalile ye katali ne mikalile mipya

⁵ Holeka muwuwulajilaje lukulu u wusulumizi wa mononze wono wukali wuli muli nyenye, nha kotya, wusenyha, wavu, wumala-nyinji, wuhile wubi, wusulumizi, wo wuhemba vihwani.

⁶ Na ku soko ye makani gago, holeka i likuwo lyo Mulungu likuwa kuwaziza wose wono wasina cihuliko kuli mwene.

⁷ Mu mapango ganji, nanye mwekalaga mu mikalile ya muli gago lono mwali mukali mutemigwe nago.

⁸ Ninga alu yiwanojeye mugalecele lukulu gago gose, ikuwo, wusungu, simbili maligo, hamba i zinghani zono si zinojeye ze cevu, zilece kulonjelwa lukulu mu milomo yenyu.

⁹ Mulece kwiyilambila nyenye wose, vyono anye mwakondya kuwuvula u wunhu wuhuma hamonga ne metumo gayo gose,

¹⁰ no kuwuvwala u wunhu wupya. Wono wukujendelela kunozelezwa no Mulungu mono yawuwumba, nha vyono yinhe hwani yakwe, ho mumumanye u Mulungu mu wukwilanicile wose.

¹¹ Na mu wuwe wuwo, musina kanyhi wisimajile kuli Mugiliki no Muyahudi, kuli mono yalame na mono si yalame, u musomi na mono si yasomile, u muwanda no munhu mwelecele. Langa vyose vili muli Kilisito du, nayo Kilisito yali muli vyose.

¹² Anye muli wanhu wo Mulungu, u mwene yamwendenyi anye kanyhi yakamuhagulenyi. Holeka nanye muvwale i nhumbula yo lusungu, wuswanu, winenenyhezi, wupolo, no wukangalizi.

¹³ Mwikangalilaje no kwinenela nyenye wose hono yunji yawe yena nghani kuli muyagwe, yiwanojeye mweze kwiyinenela nyenye wose nha vyono u Muwaha yamunenelenyi anye, nanye vyo mweze kunoza.

¹⁴ Ne mbaha yono yicizize zose, mwikalanaje mu wiyendi nyenye wose. Hambi u wendo nha wo wukuwa kuvilunziza i vinhu vyose mu wumonga wono wukwilaniciye.

¹⁵ No mulamu wa Kilisito wuteme mu zinhumbula zenyu, hambi ku soko yiyo, nanye nha mwacemwa ho muwe muwili wuwo wumonga. Kanyhi muwe mwina lilumbo!

¹⁶ I nghani ya Kilisito yikalaje muli nyenye, hamonga no wugoli wayo wose. Mwiyijizaje nyenye wose munhu na muyagwe, akuno mukwiyilanjiziza mu mahala gose. Mwimbaje Zabuli, na nyimbo, no wimbe we cinya Muhe, mumwimbilaje u Mulungu mu zinhumbula zenyu kwelilumbo.

¹⁷ Na zose zono mukwituma, mu wulonje, hamba mu witume, mwitumilaje zose mwitagwa lyo Muwaha Yesu, akuno mukumulumbila u Mulungu Baba muli mwene.

Zono ziwanojeye wanhu mu mikalile mipya

¹⁸ Anye mo wagolece, muwahulice walume zenyu, hambi nha vyo yendile u Muwaha.

¹⁹ Nanye mo walume, muwendaje wagolece zenyu, kanyhi mulece kuwa wakali kuli wene.

²⁰ Nanye mo wana muwahulice walezi wenyu nhondo zose, hambi nha vyo yinojeye muli Muwaha.

²¹ Anye nanye mo walezi, mulece kuwakalaza i wana wenyu ho walece kuyitukuwika i mitima yawo.

²² Nanye mo wetumami, muwahulikaje i wawaha wenyu wa mononze muli zose, si mwipango lono muli hamwande yawo du ho mwiyendeze kuli wene, langa mwitumaje kwe mitima yenyu yose, akuno mukumogopa u Muwaha.

²³ Na zose zono mowa kwituma, muzitumaje kwe mitima yenyu yose, ku soko yo Muwaha hamba si ku soko ya munhu.

²⁴ Akuno mukumanya vyono u Mulungu kolomupelenyi i mafungu go wuhazi gono yawawiciye i wanhu wakwe. Mumwitumamilaje Kilisito u Muwaha!

²⁵ Mono yakwituma i zimbi, nha kololipwa nha vyono genha i metumo gakwe i mabi. Hambi u Mulungu nha yasina wuwaguzi.