Wakolosayi 2 - I CILAGANE CIPYA 1991

¹ Hambi nha nghusaka mumanye vyono netuma mulimo ko uhidimbazi ku soko yenyu, ku soko ya wanya Lawodikeya, na ku soko ya wose wono wakali si nambona wusu wangu.

² Nghunoza nha vivi, i zinhumbula zawo ho zitule, no kulunzizwa hamonga mu wendo, ho wamemywe mbeka yono yikuletwa no wumanye we mbeka. Na mu nzila yiyo, ho woyimanyila ne nghani yo Mulungu yono yihundikwe, hambi nha yo Kilisito mweneco.

³ Muli mwene mo wuhundikwe u winji wose we mahala no wumanye.

⁴ Holeka nghumulonjelenyi vyono, munhu wo wose yalece kumukonjenyi na nghani za wulambi, hamba ziwe nha swanu muno.

⁵ Hambi ane hamba niwe nili kutali nanye ku muwili, ninga ku cimuhe nili hamonga nanye, kanyhi nghusangalala kuwona u wusikame wenyu wono mwimiye hamonga, mu wihuwilo wenyu muli Kilisito.

I mikalile yono yikwilaniciye muli Kilisito

⁶ Alu vyono anye mwakondya kumuvumila Kilisito Yesu yawe Muwaha, ale mwikalilaje lukulu muli mwene.

⁷ Kanyhi munojeye muhomele milela muli mwene no kwizenga muli mwene kanyhi musikame mu wihuwilo wenyu nha vyono mwejizwa. Muweze ne lilumbo iwaha.

⁸ Mulanjilile, munhu yunji yalece kumwajilizenyi ko wusugu no wukoci we wanhu wono wusina cambuzi, wono wukulawilila mu mejizo ge zisimo ze wanhu, na mu myuhe yono yitemile, hamba si Kilisito mweneco!

⁹ Ku soko muli mwene Kilisito mu hwani yo munhu, mo mowuli wukwilanicile wose wo Mulungu.

¹⁰ Nanye mwapegwa wumi wono wukwilaniciye mu wilunza hamonga nayo. U Mwene yo Muwaha kuli myuhe yose yono yitemile sunga na kuli wawaha wose.

¹¹ Na mu wilunza hamonga na Kilisito, anye mwakondya kwalama, ninga si walame wono wukunozwa ne wanhu, langa u walame wono wukunozwa na Kilisito mweneco, u walame wa mu wukombozwe mu wuwe wo wubi.

¹² Hambi lono mwabaputizizwa, nha mwazikanwa hamonga na Kilisito, na kanyhi mumo mu wubaputizo nha mwazukulanwa hamonga nayo mu nzila yo wihuwilo wenyu mu vilungo vyo Mulungu mono yamuzukula muli wafu.

¹³ Mu mapango ganji, anye mwali mufwiye ku soko ye masutya genyu, na ku soko vyono mwali muli wanhu we makungugo ganji. Ninga u Mulungu yamupelenyi anye wumi hamonga na Kilisito. U Mulungu yakondya kucinenela u wubi wetu wose,

¹⁴ yakapatila lukulu u lwandiko lono lwacizijilaga lono lwali lucidomile, hamonga no wulajilize lwayo, yakaluwusiza lukulu, yakalukomanhila mu musalaba.

¹⁵ Kuko Kilisito, ko yavisumila i vilungo vyose vya yiyo i myuhe yono yitemile, hamonga ne vilungo vye wawaha, yakawanoza kuwa cinhu ca cevu, cagalanze, ko kuwakwejenha kotya ngaluzi mu wujendelele wo wusume wakwe.

¹⁶ Holeka mulece kuvumila munhu wo wose yamuwicilenyi wulajilize wo wose muli vyono mukulya hamba kungʼwa, hamba mu wuwala i mazuwa mawaha, hamba zi sikukuu zo mwezi mupya, hamba Sabato.

¹⁷ I zinghani zizo nha muzizi du wa zono zolowa, ninga i mbeka yeneco, yo Kilisito.

¹⁸ Kanyhi mulece kuvumila kulingʼanizwa na munhu yunji, mono yakwinoza nha munhu we lilumbo ku soko yo wuwona wupumulilwe wakwe, na kwisacila u winenenyhezi wo wulambi, no wuhembi wo kuhemba wamalayika. U munhu mono yenha nha vivyo yalelepeye mu mahala go wulele ge ciyinze yinze.

¹⁹ Kanyhi yetemanuye na Kilisito mono wo mutwe wo muwili wuwo. Muli Kilisito, u muwili wose wukuliswa no kulunzwa hamonga i vilunzwa ne zinghwali zayo, nawo wuwilukaga nha vyono u Mulungu yendile.

²⁰ Anye mwafwizana hamonga na Kilisito no kukombozwa mu vilungo vye myuhe yono yitemile ya mononze. Alu nhawule kanyhi mwikaye mu mikalile ya kotya muli we yinze yiyi? Na so cici muwicilwe wulajilize,

²¹ “Mulece kwibata aci!” “Mulece kujeza acilya, hamba Mulece kupamiza acilya!”

²² I zinghani zizo zose zili mu vinhu avilya vyono vihodanjikaga kamonga du lono vikwitumamilwa, ago nha malajilizo ne mafundo ge ci munhu munhu du.

²³ I mbeka, malajilizo gago gakwijela galawiliye mu mahala ga mu wuhembi wo kwisacila weneco, no winenenyhezi wo wulambi, no kuwugaza u muwili, ninga mbeka si gakwiliye hamba nhavi ku wimila u wusulumizi wo muwili.