Wahebelaniya 1 - I CILAGANE CIPYA 1991

U Mulungu yakulonga mu nzila yo Mwanagwe

¹ I katali u Mulungu yalonga ne wasetu kali kenji, na mu nzila nyinji mu nzila ye wawizi,

² ninga mu vilo avi vyo mudumo, kalongana nase mu nzila yo Mwanagwe. Na muli mwene, u Mulungu mo yayiwumbila yinze, kanyhi yakamuwika ho yaviteme vinhu vyose.

³ U mwene wo wubulile wo lukumyo lo Mulungu, kanyhi yo hwani ye mbeka yo Mulungu mweneco, nayo yakuyisikamizya yinze mu nghani yakwe ye vilungo. Lono yali yakondya kuwanenela wanhu u wubi wawo, yakekala ku wulanga ku lubavu lo kulume lo Mulungu u Muwaha.

U wuwaha wo Mwana wo Mulungu

⁴ U Mwana yo muwaha yacizize wa Malayika, nha vyono i litagwa lyono yapegwa no Mulungu, yiwaha muno si nha ilitagwa lyawo.

⁵ Hambi u Mulungu nha si yamulonjela hamba hadodo malayika wakwe yunji yatye; “Agwe wuli Mwanangu, Ane neza nili sogo zuwali?”

⁶ Ninga u Mulungu lono yamutumila kononze u Mwanagwe mulelwa mulongozi, yatya nhavi, “Ne wamalayika wose wo Mulungu, yiwanojeye wamuhembe.”

⁷ Na kuli ze wamalayika, u Mulungu yakutya, “U Mulungu yakuwanoza wamalayika wakwe kuwa myuhe, Ne wetumami wakwe kuwa ilambi lya moto.”

⁸ Ninga kuli zo Mwana, u Mulungu yakutya, “U wutemi wako agwe go Mulungu, Wikalaga cibitilila ne cibitilila Nagwe kuwadimaga i wanhu wako kwe lingʼani.

⁹ Agwe wendile u wilingʼano, Wukazisula i zimbi. Na ku soko yiyo holeka u Mulungu, u Mulungu wako yakuhagula, Kanyhi yakakupela nyemo mbaha muno muno kuciza i wayago.”

¹⁰ Kanyhi yakutya, “Muwaha, agwe yo gwegwe mono wayiwumba yinze baho ha mwamulizo, no wulanga wo mulimo wo muwoko wako,

¹¹ Azo zomalika, ninga agwe kokwikala cibitilila, Na zose zosakala kotya mwenda,

¹² Nagwe kozipetya nha civwalo Nazo zokawanizwa nha mwenda, Ninga agwe, yo gwegwe du cibitilila, Ne myaka yako si yiladuma yaye.”

¹³ Kanyhi u Mulungu si yamulonjela hamba hadodo yunji wa muli wamalayika wakwe yatye, “Wikalaje ku muwoko wangu wo kulume sunga kolo nakondya kuwanoza i walugu wako wawe nha wukanyago we magulu gako.”

¹⁴ I Wamalayika, yo myuhe du yono yikumwitumamila u Mulungu, nayo u Mulungu kawatumaga ho wawataze wawalya wono wowubocela u wukombozwe.