Wafilipi 1 - I CILAGANE CIPYA 1991

¹ Yo nene Pawulo na Timoteyo, i wetumami wa Yesu Kilisito, cikumwandicilenyi anye nyo wanhu wo Mulungu kuko ku Filipi, mono mwalunzwa na Kilisito Yesu, hamonga nanye mo walongola ne watazi mu Kanisa.

² Ilihewa no mulamu vyono vikulawa kuli Mulungu Sogo yetu, na kulawa kuli Muwaha Yesu Kilisito.

U wulombe ku soko ye Wafilipi

³ Nghumulumba u Mulungu wangu kolo nghumukumbucilenyi ho hose,

⁴ na kolo nghumulombelenyi wose, nghulomba nina nyemo,

⁵ ku soko nha vyono mwanhaza mu mulimo wo Luganuzi Luswanu kuwulawilila mwizuwa alilya lilongozi sunga izuwali.

⁶ Holeka nitumbiye vyono, u Mulungu mono yawanza u mulimo wuwu muswanu muli nyenye, kowujendeleza sunga ko ku wukondelecele mwizuwa tilya lya Kilisito Yesu.

⁷ Na vyo yinojeye nimwihwesezenyi, hambi nha nghumukumbucilenyi nhondo zose mu nhumbula yangu. Hambi na nyenye wose, nha muhanjlie na nene, mwihewa lyono yamhela u Mulungu ho nilutetele no kulukangaza u Luganuzi Luswanu, mwidaha lili lono nili mujela, na kanyhi sunga na bahalya ha lulongozi lono nali nghali si ninawopwa mu jela.

⁸ U Mulungu yamanyile vyono nghulonga mbeka, lono nghukangaza vyono, so wendo wuwulya du wa Yesu Kilisito, nghuhila muno kumuwonenyi.

⁹ U wulombe wangu wowu, nghulomba u wendo wenyu wucile konjelezeka muno muno hamonga no wumanye we mbeka hamonga no wutanje wose,

¹⁰ ho musume kuhagula zinghani ziswanu. Baho ho mowa mwina nhumbula nzelu, kanyhi musina ilema sunga ko Kwizuwa lya Kilisito.

¹¹ I mikalile yenyu yomemywa zose zono zili mbeka na swanu, zono Yesu Kilisito mweneco kosuma kumupelenyi, ku soko yo lukumyo ne lilumbo lyo Mulungu.

U wumipe nha yo Kilisito

¹² Ale wandugu zangu, nghuhila mumanye vyono, zose zono zanyagana, zanhaza muno mu wujendeleza u Luganuzi Luswanu.

¹³ Hambi nha ku soko ya zizo, i walindilizi wose we likulu, hamonga na wanji wose wa baha, wamanyile vyono nili mu jela, ku soko vyono ane nghumwitumamila Kilisito.

¹⁴ Na wuwu wuwopwe wangu wawanoza we zindugu wenji wawe no wihuwilo muli Muwaha, sunga wakucila kuwa ne vilungo mu wuganula i nghani yo Mulungu wasina woga.

¹⁵ Yili mbeka, ho wali wayawo wanji wono wakumuganula Kilisito kusoko vyono wena wivu, kanyhi wo wanhu wono Wendile wugombane, ninga wanji wakumuganula Kilisito kwa mutima muzelu.

¹⁶ Awa wakituma nha vivyo ko wendo, hambi nha wamanyile vyono u Mulungu yo yamhelile u mulimo wuwu wo kulutetela u Luganuzi Luswanu.

¹⁷ Ninga wawo wanji wakumuganula Kilisito ko wisumanize hamba si kwa nhumbula nzelu, wakuganiciza nha vyono wonyonjelezeza i magayo mu wuwopwe wangu.

¹⁸ Ale du kanyhi, si nghani yaye, ninga ane nghusangalala vyono ceza cili wanhu mono cikumuganula Kilisito mu zinzila zose, hono yiwe mu mutima muswanu, hamba mu mutima mubi. Kanyhi nojendelela kusangalala.

¹⁹ Hambi nha manyile vyono, so wulombe wenyu na ku so wutazi wo Muhe wa Yesu Kilisito ane nokombozwa.

²⁰ U wuhile wangu no witumbilo wangu, ho ndece kulemwa mu wufisiliza u mulimo wangu, langa nojendelela kuwa na nhumbula yono yikamile mu mapango gose na ko muno mwipango lili, ho mu mikalile yangu yose, hono niwe nghali mumi hamba hono niwe nafwa, nimutujile Kilisito lilumbo.

²¹ Hambi wumi co cici? ane ku lubavu lwangu, ku wikala mumi nha Kilisito, na ku wufwe kukuleta cambuzi ciwaha.

²² Ninga hono mu wikala mumi nosuma kwituma u mulimo wono wina cambuzi ciwaha, baho nhondo cono nokwihaga co si manyile!

²³ Ninga ha mwande yangu ho zili nghani nyejete. Nghusulumila kuwuka mu wumi wuwu, ho nghekale hamonga na Kilisito, hambi nha yo nghani swanu muno,

²⁴ ninga hono njendelele kwikala mumi, yo nghani yono yina cambuzi muno kuli nyenye.

²⁵ Kanyhi nina witumbilo so nghani yiyi, manyile vyono nojendelela kwikala mumi hamonga na nyenye wose, ho sume kuwonjeleza u wujendelele wenyu ne nyemo mu wihuwilo.

²⁶ Ale nilaza kuwa hamonga nanye kanyhi, ho mowa mwina soko yo kwilumbila muli nene mu wilunza na Kilisito Yesu.

²⁷ Ninga nghani mbaha yoyi, i mikalile yenyu yiweze yilunojeye u Luganuzi Luswanu lwa Kilisito, nane hono sume kuza kwenyu, hamba ndece kusuma kuza, hulice vyono mwimile mukamile mwina nhumbula monga, na vyono mukwihoma no wulugu muli hamonga, kanyhi mwina no mutima wumoga ku soko yo wihuwilo wo Luganuzi Luswanu.

²⁸ Mulece kuwogopa walugu wenyu, langa mweze muli vilungo nhondo zose, na yiyo yo yomukangazizenyi vyono wene wosumwa, anye mosuma, hambi u Mulungu mweneco nha yo yakumupelenyi u wusume.

²⁹ Hambi anye nha mwapegwa cipegwa co kumwitumamila Kilisito, si so kumwihuwila du, langa na so kugazwa ku soko yakwe nha vivilya.

³⁰ Alu mudahile kuwa hamonga nane mu wihomi wo wulugu. U wulugu wuwuno, wo wulugu wuwulya wono mwawuwona cikwihoma nawo bahalya ha mwamulizo, na nghali kwihoma nawo sunga na lulu nha vyono mukuhulika.