Matayo 28 - I CILAGANE CIPYA 1991

U wuzuce wa Yesu

¹ Ilizuwa lye Sabato lyaza kupuluta, na lono lizuwa lyali behi no kusosomoka mwizuwa lye Jumapili, Malyamu Magadalena hamonga na Malyamu ayulya yunji, wakabita ku wugoza citenjelo.

² No wucicime we yisi wukaza kwa nhinicizo muno na Malayika wo Muwaha yakatima kuwulawa ku wulanga, yakaliwusa i libwe lililya, nayo yakalikalila mucanyha yayo.

³ No wulangwe wakwe, yejelaga yenha limuli, ne vivwalo vyakwe, vyali vizelu swe, kotya seluji.

⁴ Ne walindilizi we citenjelo wakacicima muno so woga wuwaha, sunga wakawa kotya nha wafwiye.

⁵ Ninga Malayika yuyulya yakawatya i wacekulu wawalya, “Anye, mulece kogopa! Ane manyile vyono anye mukumulondola Yesu, mono yatumbikwa mu musalaba.

⁶ Ninga alu, yali hasina ahano, hambi nha kazuka nha vyono yalonga mweneco. Ale muze muhawone ihanhu hono wali wamuwicile.

⁷ Holeka alu, mubite mbela mbela, mukawalonjele iwejizwa wakwe, vyono yazuka muli wafu, sunga na lulu, komulongolelenyi ku Galilaya, na kuko ko momuwonela. Ale, ane hodu nakondya kumulonjelenyi.”

⁸ I wacekulu wawo, nawo lono akuno wali wena no woga, hamonga ne nyemo mbaha, wakawuka mbela mbela ha citenjelo, wakamangha, wakabita wakawalonjela i wejizwa wakwe.

⁹ Lulo du baho Yesu yakawa kwitangʼanila nawo. Nayo yakawalamusa, yakawatya, “Lamucenyi.” Nawo i wacekulu wawo, wakamubitila, wakafugama hali mwene, wakayibata imigulu yakwe.

¹⁰ Nayo Yesu yakawalonjela yakawatya, “Ale, mulece kogopa! Ninga aluno mubite mukawalonjele wandugu zangu, vyono alu wabite ku Galilaya, nawo ko wombonela kuko.”

U wulolose wo mulindiliza i citenjelo

¹¹ Iwacekulu wawalya nawo lono wabitaga, i walindilizi we citenjelo wanji nawo, wakabita kwikaya, wakawaloloseza i wakohani wawaha, muli zose zono zijeye.

¹² Wakawa kwitangʼanila hamonga ne wanyamhala, nawo wali kukondya kulonga, hodu wakawa kuwapela wawalya wasilikale mapesa menji muno muno,

¹³ akuno wakuwatya, “Anye nhondo mutye nhavi, ‘Iwejizwa wakwe waza ne cilo ase lono cali cigonile, wawa kumuhiza.’

¹⁴ Na hono u muwaha we yisi yayimanye inghani yiyi, ase colongana nayo du, sunga cimanye vyono anye si motuga wugazwe.”

¹⁵ Nawo i walindilizi wawo wakazibocela i zipesa zizilya, nawo wakanoza nha vyono wafundwa. Ne nghani yiyo, yikatandala kuli Wayahudi sunga ne nzuwayi.

Yesu yakwilajila kuli wejizwa wakwe

¹⁶ Nawo wawalya iwejizwa we likumi na monga, wakabita ku Galilaya sunga ko kwitunda lililya lyono Yesu yawalajiliza.

¹⁷ Nawo waza kumuwona, wakamuhemba, hamba yiwe wanji muli wene, wali wena mahwele.

¹⁸ Nayo Yesu yakaza sunga behi nawo, yakawatya, “Ane mhegwa u wulajilize wose, wa ku wulanga, sunga na wa kononze.

¹⁹ Holeka, alu, mubite, mukawanoze i wanhu we makungugo gose, wawe watyatyi wangu, muwabaputizizaje mwitagwa lyo Sogo yo Munhu na lyo Mwana, na lyo Muhe Mono Yelile.

²⁰ Kanyhi, muwejizaje, webate i malajilizo gose gono namupelenyi. Nane nili hamonga nanye vilo vyose, heya, sunga ko kundumilizo ye vilo.”