Matayo 26 - I CILAGANE CIPYA 1991

U wihehe wo kumuwulaga Yesu

¹ Nayo Yesu yaza kukondya kuzilonga zizo zose, yakawalonjela iwejizwa wakwe, yakawatya,

² “Mumanyile vyono, vilawa vyeza kupuluta vilo vyejete cowa mwizuwa lye sikukuu ya Pasaka, no Mwana wo Munhu kolavywa ho yatumbikwe mu musalaba.”

³ Na mwipango lilyo i Wakohani wawaha hamonga ne wanyamhala we wanhu, waketangʼanila hamonga mwikumbo lya Kayafa, Mukohani Muwaha.

⁴ Wakalongana weneco wose wakulondola i nzila yo kumwibatila Yesu ko wusugu, ho wamuwulaje.

⁵ Ninga hamba nha vivyo, si wakasaka inghani yiyo ho yitumwe mwipango lye Sikukuu, ho halece kuwa wuma muli wanhu.

Yesu yakubakwa mafuta ku Betaniya

⁶ Nayo Yesu lono yali yali kuko ku Betaniya, mu nyumba ya Simoni mono kacemagwa Mukoma,

⁷ hakawa na mucekulu yunji mono yali yena supa ye mafuta ge mhunjile swanu muno go wuguzi wukamu muno, yakamuziza Yesu lono yali yekaye ha meza ha wulye we zindigwa, yakamujidila mu mutwe gago i mafuta maswanu.

⁸ Nawo i wejizwa wakwe waza kuziwona zizo, wakasimba muno wakatya, “Alu wambuce wose wuwu wa cici?”

⁹ Imafuta gaga, gali gasume kuguzwa ko wuguzi wuwaha, ne waciwa wapegwe izipesa zizo.

¹⁰ Yesu yakagamanya i mahweso gawo, holeka yakawatya, “Alu nhawule mukumugaza u mucekulu yuyu? Mwene kunyitumamila mulimo muswanu muno muno.

¹¹ Iwaciwa mwina nawo nhondo zose, ninga ane si nowa hamonga nanye nhondo zose.

¹² U mucekulu ayu, kanjidila mafuta, so wuwikanizwe we maziko gangu.

¹³ Nghumulonjelenyi mbeka, vyono ho hose mono yinze yiyino, hono lowa kuganulwa u Luganuzi Luswanu, ilitumo lilino lyono yetumile u mucekulu yuyuno, lyowa kulongwa so kumukumbucila mwene.”

Yuda yakulamula kumugaluka Yesu

¹⁴ Hanyuma ayulya Yuda Isikaliyota muyagwe na awalya we likumi na wejete, yakabita kuli Wakohani wawaha,

¹⁵ yakawawuza yakutya, “Alu momhela cinhuci ho nimukombolelenyi Yesu?” Nawo wakamuwalila pesa makumi madatu,

¹⁶ hodu mwene Yuda kulawa lulo baho, yakawa yakulondola icilejeho co kumugaluka.

Yesu yakunoza indigwa ye Pasaka hamonga ne wejizwa wakwe

¹⁷ Na mwizuwa lilongozi, lono lyali likali lizuwa lye sikukuu ye mikate yono siyisasize iwejizwa wakwe, wakamubitila Yesu, wakamuwuza wakutya, “Alo wukusaka cikutenjele hanhuci i sikukuu ye Pasaka?”

¹⁸ Nayo yakawapitula yakawatya, “Mubite mwinjile Mwikaya, ku kaya ya nhendu, mukamutye, Mwijizi yakutya, icipango cangu cafika, holeka ane hamonga ne wejizwa wangu, coyinozeza i sikukuu ye Pasaka mu kaya yako.”

¹⁹ Nawo i wejizwa wakwe, wakanoza nha vyono Yesu yawalajiliza, wakayitenga i ndigwa ye Pasaka.

²⁰ Na lono yali yeza kuwa cinyamihe, Yesu yakekala ha meza, hamonga ne wejizwa wakwe ikumi na wejete.

²¹ Na lono walizaga, Yesu yakawatya, “Ane nghumulonjelenyi mbeka, vyono u muyenyu yunji muli nyenye, kongaluka.”

²² Iwejizwa wakakalala muno muno, hodu wakawa kwanza kuwuza yumonga yumonga wakutya “Ati, Muwaha, wukwihwesa yowa nene?”

²³ Ninga Yesu yakawapitula yakawatya, “Yuyo mono cililizane nhonje hamonga na nene mu ciya ce mboga, ale yo yuyo mono kongaluka.

²⁴ Heya u Mwana wo Munhu yakubita, nha vyono i Mandiko Gono Gelile gakulonga, ninga woyi he, kuli munhu yuyo yali yiwe yili ciba hono yali yalece kulelwa.”

²⁵ Ale, nayo Yuda yakamuwuza, yakutya, “Ati Mwijizi, alo wukwihwesa kowa nene?” Nayo Yesu yakamupitula yakamutya, “Agwe langa kulonga.”

I ndigwa yo Muwaha

²⁶ Na lono walizaga, Yesu yakawusola mukate, yakalumba, yakawubegula, yakawapela iwejizwa wakwe akuno yakutya, “Ale solenyi mulye, awu wo muwili wangu.”

²⁷ Hanyuma kanyhi, yakasola cikombe, yakamulumbo u Mulungu, yakawapela, akuno yakutya, “Ale, mungʼwe wose,

²⁸ hambi ayi nha yo sakami yangu yono yikukangaza i cilagane co Mulungu, isakami yono yikwitika ku soko yo kuwanenela i wanhu wubi wawo.

²⁹ Ane nghumulonjelenyi nha vyono si nongʼwela lukulu idivayi ye zizabibu, sunga mwizuwa alilya lyono nilangʼwela idivayi yimhya hamonga nanye mu Wutemi wa Baba.”

³⁰ Wali weza kukondya kwimba lwimbo, hodu wakawa kutuluka wakawa kubita kwitunda lye Mizeyituni.

Yesu yakulonga nha vyono Petelo komukana

³¹ Hanyuma Yesu yakawatya, “Icilo cici ce zuwalili, anye wose motiza mondeka nili wene, hambi i Mandiko Gono Gelile nha gakutya, ‘Nomutowa u mudimi, Nazo izingholo zokwiyagala.’

³² Ninga nila neza kuzuka, ale nomulongolelenyi ku Galilaya.”

³³ Petelo yakamutya Yesu, “Hamba wose wawe na mahwele ku soko yako, no kutiza, no kukuleka, ninga ane hamba si nokulecela lukulu.”

³⁴ Yesu yakamutya “Petelo, ane nghukulonjela mbeka, vyono i cilo ce zuwalili du, lono i nzongolo yikali si nalila, agwe kowa wanghana kali kadatu.”

³⁵ Nayo Petelo yakamutya, “Hamba hono yiwe yinojeye nifwe hamonga nagwe, ane langa, hamba si nokulecela lukulu.” Ne wejizwa awalya wanji wose, nawo wakalonga nha vivyo.

Yesu yakulomba mu busitani ya Getisemane

³⁶ Hanyuma Yesu yakawa kubita nawo sunga ku busitani ya Getisemane, yakawalonjela iwejizwa wakwe yakatya, “Ale mwikalaje bahano, nane mbite hamwande hadodo nghalombe.”

³⁷ Yakawasola wa Petelo hamonga ne wana wejete wa Zebedayo, yakawa kwanza kuwona wuzinguce hamonga no wugazice mu nhumbula yakwe.

³⁸ Yakawalonjela yakawatya, “Ane nina wukalale wuwaha mu nhumbula yangu, behi no kufwa. Holeka mwikalaje baha meso hamonga nane.”

³⁹ Hanyuma yakatela tela hamwande hadodo, yakagwa funama, yakalomba, yakutya, “Gwe Baba, hono yiwe yisumice, ale icikombe cicino co wusungu cimhulutaje, ninga yilece kuwa nha vyono nyendile nene ngʼo, langa yiwe nha vyono wendile du gwegwe.”

⁴⁰ Yakawabitila i wejizwa wakwe, kumbe, yakawagana wagona. Yesu yakawa kumutya Petelo, “Alu hongo si musumile kwikala meso hamonga nane hamba saa monga du bwete?

⁴¹ Ale mwikalaje meso akuno mukulomba ho mulece kwinjila mu wujelwe. Mbeka nhumbula yendile ninga muwili wusoceye.”

⁴² Yakabita kanyhi lwe kejete yakalomba yakutya, “Baba hono yiwe si yisumice icikombe cicino co wusungu cimhulute ndece kucigʼwa, ale, hodu, u wuhile wako witumwe.”

⁴³ Yakawabitila iwejizwa wakwe, yakawagana kanyhi wagona, hambi i meso gawo nha gali gebatwe na nhongo.

⁴⁴ Hodu, yakawa kuwaleka, yakabita kanyhi, kulomba lwe kadatu, yakulonga izinghani zizilya du.

⁴⁵ Hanyuma yakawabitila wawalya wejizwa yakawatya, “Wulenyi, alu mukali mugonile du no kuceha? Lanjenyi ta! Alu icipango ceneco langa ho cafika, no Mwana wo Munhu kolavywa kuli i wanhu wanyo wubi.

⁴⁶ Holeka alu mwinukaje cibite. Lanjenyi ta, ayulya mono kongaluka yalawila.”

Yesu yakwibatwa

⁴⁷ Nayo Yesu lono yali yakali kulonga nawo, hobaho nayo Yuda yakawa kuza u muyagwe na awalya we likumi na wejete. Wakaza wanhu wenji wali hamonga nayo, nawo wali wena, ne mimaje ne zinhumbi, wono watumwa kulawa kuli wakohani wawaha ne wanyamhala we wanhu.

⁴⁸ Nayo yuyo mono yasakaga kumugaluka Yesu, yali yakondya kuwapela icitanjilo yakutya, “Yuyo mono nomunonela, ale, yo yuyo, yo mumwibataje.”

⁴⁹ Hobaho Yuda yakamusejelela Yesu, yakamutya, “Lamucenyi, Mwijizi!” Hanyuma yakawa kumunonela.

⁵⁰ Nayo Yesu yakamuya, “Gwe muyangu, witumaje du cono wuzize kwituma.” Baho i wanhu wawalya nawo, wakawa kuza wakawa kumwibata Yesu.

⁵¹ Yumonga naʼwalya wono wali wali hamonga na Yesu, yakagolola muwoko wakwe, yakawusomola mumaje wakwe, yakamutowa u mwitumami wo Mukohani Muwaha yakamubuha likutu.

⁵² Baho Yesu yakamulonjela yakutya, “Leka ta, wugomolaje u mumaje hanhu hayo, hambi muli wose mono yakwitumamila mumaje nha kolofwa nayo na mumaje.

⁵³ Wulenyi, si mumanyile vyono ndahile kumulomba Baba, nayo kosuma kundetela lwa kamonga, mapuga ikumi na mejete ge wamalayika?

⁵⁴ Ninga alu, ho goficilicila nhawule i Mandiko Gono Gelile, gono gakutya, nha vivyo vyo yinojeye yiwe?”

⁵⁵ Lo lulo lulo, Yesu yakawa kulilonjela ilipuga lye wanhu wono wazaga ho wamwibate, yakawatya, “Alu mwene ho muza kunyibata akuno mwina ne mimaje ne zinhumbi, kotya ane nha nili muhizi? Alu ane, nha nhondo zose nali kuwezaga hamonga nanye mu Nyumba yo Mulungu nghwijiza, nanye kumbe hamba si mwanyibata!

⁵⁶ Ninga azi zose ziwa nha vivi, ho i Mandiko ge wawizi gaficilicile.” Hanyuma iwejizwa wakwe wose wakamuleka wakatiza.

Yesu yali he balaza

⁵⁷ Hodu, iwanhu wawalya wono wamwibata Yesu, wakamutegula sunga ku kaya ya Kayafa, Mukohani Muwaha, kuko kono wali wekongholeye i wejizi wo Wulajilize ne Wanyamhala.

⁵⁸ Nayo Petelo yakawa yamutyatyizye Yesu kwa kutali, sunga vikenjilana mwikumbo lyo Mukohani Muwaha, nayo yakenjliana hamonga ne walindilizi, ho yasume kuziwona zose vyono zowa zinha.

⁵⁹ Hodu i Wakohani wawaha ne libalaza lyose, wakalondola wuhomelezi wo wulambi kuli Yesu, ho wamuwulaje,

⁶⁰ ninga hamba nha vivyo, si wasuma kuwutuga wuhomelezi wo wose, hamba yiwe wakaza wahomelezi wenji wo wulambi. Ha ndumilizo wakawa kuza wahomelezi wejete,

⁶¹ wono watya, “U munhu ayu, yalonga yakatya, ati, ‘Ane nosuma kuyimwagula i Nyumba yo Mulungu, no kuyizenga kanyhi mu vilo vidatu du.’ ”

⁶² Hobaho u Mukohani Muwaha yakema yakamuwuza Yesu yakutya, “Ati gwe, si wukupitula hamba nghani hongo? Alu i wanhu wawa wakuhomelela nghanici kuliʼgwe?”

⁶³ Ninga Yesu yakanyamala twii du. Nayo u Mukohani Muwaha yakamutya, “Nghukwilahiza kuli u Mulungu mumi, wucilonjelaje hono yo gwegwe Kilisito u Mwana wo Mulungu!”

⁶⁴ Yesu yakamutya, “Nha kulonga gwegwe! Ninga nghumulonjelenyi mbeka, vyono kulawa lulu momuwona u Mwana wo Munhu yekaye ku lubavu lo kulume lo Mulungu u Mudaha vyose, yakuziza mu mavunde go wulanga.”

⁶⁵ Baho nayo Mukohani Muwaha yakavidemulanga i vivwalo vyakwe akuno yakutya, “Katovula! Alu cina sokoci kanyhi yo kusaka wahomelezi? Nha muhulika nyo weneco i zinhovu zakwe.

⁶⁶ Alu anye, mukuwona nhawule?”

⁶⁷ Iwene wakapitula wakatya, “Yimunojeye yafwe!”

⁶⁸ Hanyuma wakawa kumufunyila mate mu wusu wakwe, kanyhi wakamutowa ne makofi. Na wanji wamutowaga makofi, akuno wakulonga wakutya, “Ale ta wucitambulilaje, agwe nha wuli muwizi, agwe Kilisito, mono yakutowile lu nani?”

Petelo yakumukana Yesu

⁶⁹ Nayo Petelo yali yekaye hadeha mwikumbo. Hobaho u mwitumami yunji we cicekulu, yakamubitila, yakamutya, “Agwe nagwe wali wuli hamonga na Yesu wa ku Galilaya.”

⁷⁰ Nayo Petelo yakakana hamwande ya wose yakutya, “Ane si niyimanyile hamba hadodo yono wukuyilonga.”

⁷¹ Nayo Petelo lono yalawilaga ha mulango, u mwitumami yunji kanyhi we cicekulu yakamuwona, nayo yakawalonjela awalya wono wali wali baho, yakawatya, “U munhu ayu nye, yali yali hamonga na Yesu wa ku Nazaleti.”

⁷² Nayo Petelo yakakana kanyhi, akuno yakwilahiza, yakutya, “Ane si nimumanyile u munhu yuyu ye!”

⁷³ Hanyuma kanyhi hadodo iwanhu wono wali wali baho, wakamubitila Petelo, wakamutya, “Ninga mbeka nagwe wuli muyagwe na wawo, ku soko imilonjele yako yikukulajila.”

⁷⁴ Ale baho nhondo, Petelo yakanza kwilijita no kwilahiza, yakutya, “Ane si nimumanyile u munhu yuyo ye.” Hobaho nayo inzogolo nhondo yikawakulila.

⁷⁵ Nayo Petelo, hobaho yakazikumbucila izinghani zono yalonjelwa na Yesu yakumutya, “Lono inzogolo yikali si yinalila, agwe Petelo kowa wakondya kunghana kali kadatu.” Hobaho yakalawila kunze yakalila muno muno.