Matayo 24 - I CILAGANE CIPYA 1991

Yesu yakulonga zo wongomezwe we Nyumba yo Mulungu

¹ Yesu yakalawila mu Nyumba yo Mulungu, na lono yabitaga, iwejizwa wakwe wakamuziza, wakamulajila imizenjele ye Nyumba yo Mulungu.

² Yesu nayo yakawatya, “Heya ho baho, mosuma kugawona gaga gose! Ninga mbeka nghumuyenyi, hasina ibwe hamba limonga lyono lilasigala baha, ibwe mucanyha ya ibwe liyagwe, langa i vinhu vyose vyologwiswa hasi.”

U wugaye ne magazo

³ Nayo Yesu lono yali yekaye mwitunda lye Mizeyituni, i wejizwa wakwe wakamuziza cinyele, wakamuwuza wakutya, “Ale ta, wucilonjelaje, i zinghani zizi mwene zolowa za nili? U wuze wako nawo, wololajilwa na citanjilo cono cinha wule? Baho ha ndumilizo ye yinze.”

⁴ Yesu yakawapitula yakatya, “Mwilanjililaje muno muno, ho mulece kukongwa na munhu wo wose.

⁵ Hambi nha wanhu wenji wono wolokuza, nawo walalitumamila litagwa lyangu wakutya, ‘Ane yo nene Kilisito nawo wolowajiliza wanhu wenji.’

⁶ Kanyhi molohulika muli zo wulugu, ne zinonga nonga zo wulugu, ninga anye mulece kwihwelela, hambi zizo, nha zinojeye zize, ninga ndumo yeneco yowa yikali si nawa.

⁷ Likungugo lyokwihoma ne likungugo liyagwe, no wutemi nawo wokwihoma no wutemi wuyagwe. Ne mazala nago gokuza ako na ako, sunga ne matulo ge yisi nago gokuza.

⁸ Na gaga gose gokwihwana nho wusungu du, wo kusawa mwana.

⁹ “Kanyhi nawo wolomulavyenyi ho mutamiswe no kuwulagwa. Ne makungugo gose kono galila, golomusulenyi anye, ku soko ye litagwa lyangu.

¹⁰ Na mu vilo vivyo, wanhu wenji wolowuleka u wihuwilo wawo wolokwigalucila weneco wose no kwisula.

¹¹ Kanyhi mu vilo vivyo, wololawila iwawizi wenji wo wulambi, nawo wolowa kuwajiliza wanhu wenji.

¹² Na vyono u wubi wowa kucila konjelezeka, ale nhavivyo no wendo we wanhu wenji wolopola.

¹³ Ninga u munhu wo wose mono kolokangalila sunga ko ku ndumo, yuyo langa yo kolopona.

¹⁴ Ninga i yinze yose yoganulilwa u Luganuzi Luswanu lo Wutemi wo Mulungu mu makungugo gose lono i ndumo yikali si naza, ho wuwe wuhomelezi kuli wene.

I magayo mawaha

¹⁵ “Kanyhi moliwona ‘lyono likucemwa.’ Iwifyo lyo wuhodanje, lililya lyono lyalongwa no muwizi Danyeli, lyolowa limile i hanhu hono helile.” (Ale baho, mono yakusoma, yezuce i nhunizo yayo.)

¹⁶ “Ale, mu vilo vivyo wono wali mu Yudiya, watizize mu matunda.

¹⁷ Nayo mono yali mucanyha ye litembe lye nyumba yakwe, yalece kutimila lukulu, ho yasole ivinhu vyakwe, vyono vili mu nyumba yakwe.

¹⁸ Na yulya mono yali ku mugunda yalece kuwuya ne nyuma, ho yasole icivwalo cakwe.

¹⁹ Woyi he, kuli we cidala wono wali magulu mazito, na wono wena iwana wagalika wono wakali kongha mu vilo vivyo.

²⁰ Holeka mulombe ho wutize wenyu wulece kuwa mu vilo vye mbeho ye cinyuli, hamba mwizuwa lye Sabato!

²¹ Hambi mu vilo vivyo nha vyolowa vyo wugaye wuwaha muno muno, wono wukali si nejela hamba hadodo kuwulawa ku mwamulizo we yinze sunga ne nzuwayi, hamba si yilejelela lukulu kanyhi.

²² Ne vilo vivyo hono vyali vilece kucepulwa, hali hawe hasina munhu wo wose mono yali yapone, ninga alu, ivilo vivyo vyocepulwa, ku soko ya awalya iwahagulwa.

²³ “Holeka mu vilo vivyo, hono munhu yaze yamulonjelenyi yawe kutya, ‘Kilisito yali ahano,’ hamba lunji yatye, ‘Kilisito yali ahalya,’ mbeka mulece kumwihuwila.

²⁴ Hambi nha wololawila walambi wenji, wono wokwicema weneco yo Kilisito, kanyhi ne wawizi wo wulambi. Nawo wawo wonoza mapoto mawaha, ne mezino gono gosuma kumwajilizenyi, na hono yisumice sunga ne wahagulwa wo Mulungu.

²⁵ Ta hulicizenyi, ane nimulonjelenyi zinghani zizi lono zikali si nawa.

²⁶ Holeka hono wamulonjelenyi wawe kutya, ‘Lanjenyi ta yali ku nyika,’ anye mulecele lukulu kubita kuko, na lunji womutyenyi, ‘Lanjenyi ta, yehundice kugati,’ ale mulecele lukulu kwihuwila,

²⁷ hambi u wuze wo Mwana wo Munhu, nha wokwihwana nha vyono i limuli likuwa kumulika kulubavu lwa kucilima sunga ko ku lubavu lwa kumwezi.

²⁸ Na kanyhi kuko kono kowuli u muvimba, ale ne zindi ko zokwikongholela.

U wuze wakwe u Mwana wo Munhu

²⁹ “Ninga u wugaye kolo wapuluta, lulo baho du ilizuwa lyolotukuwazwa, no mwezi nawo si wolosana ngʼo, ne zinyelezi nazo zologwa ku wulawa kucanyha, ne vilungo vyo wulanga, vyolosinjiswa.

³⁰ Ale baho langa, icitanjilo co Mwana wo Munhu, ho cilejelela ku wulanga, we makungugo gose ga kononze baho ho wololilila, nawo wolomuwona u Mwana wo Munhu, yakuziza mu mavunde mucanyha, akuno yena ne vilungo vinji hamonga no lukumyo luwaha.

³¹ Ne lizi yiwaha lye ndulele, lyolohulikwa, nayo kolowatuma i wamalayika wakwe, nawo wolowakonghola i wahagulwa wakwe ku wulawa ku zimbavu zose vyono yine ze yinze, kulawilila ku mudumo awu wo wulanga, sunga ko ku mudumo muyagwe.

I cihwanicizo co mukuyu

³² “Ale ta, mwiyijizizaje mu cihwanicizo co mukuyu, vyono lono mukugawona du manhambi gayo geza kutula no kulavya i mahamha gayo, ho baho ho mumanyilaga vyono i lifuku lyeza lili behi.

³³ Ale, holeka na nyenye nanye kolo mukuziwona zizi zikwitumwa, mumanye vyono u Mwana wo Munhu yeza yali behi muno muno.

³⁴ Ane nghumulonjelenyi mbeka, vyono u lulelo lulu si lopuluta yaye, lono zizi zose zikali nejela.

³⁵ U wulanga ne yinze, heya vyopuluta, ninga i zinghani zangu, si zolopulutila lukulu.

Hasina u munhu mono yalimanyile ilizuwa hamba cipango

³⁶ “Ninga muli ze lizuwa hambe cipango, zizo langa, hasina u munhu wo wose mono yamanyile vyono yowa nili, sunga hamba ne wamalayika wa ku wulanga, sunga hamba no Mwana wo Munhu mweneco du, siyamanyile, langa yo Baba yaliwene du mono yamanyile.

³⁷ Langa yene, yolowa nha mu vilo vya Noha.

³⁸ Ku soko mu vilo vivyo, lono lihwazi lye malenga lyali likali si naza iwanhu nha walizaga, kanyhi wangʼwezaga, watolaga no kutolwa, sunga lono Noha yenjilila mwigalawa.

³⁹ Nawo hamba si wamanya cono cokwijela ci cici, sunga mwizuwa lyono lyaziza ilihwazi lye malenga, likawasola wose. Ale, nhavivyo vyo yolowa, mwizuwa lyono yalaziza u Mwana wo Munhu.

⁴⁰ Mwidaha lilyo, wanhu wejete wolowa ku mugunda, monga kolosolwa, na yunji kololekwa.

⁴¹ We ciyaya wejete wolowa wakusaga wuhemba he sajilo limonga, monga kolosolwa, na we kejete, kololekwa.

⁴² Holeka munojeye mwikalaje meso, hambi nha simumanyile ilizuwa lyono kokuziza u Muwaha wenyu.

⁴³ Ninga mweze kuyikumbucila ne nghani yiyi, vyono hono munya kaya, yali yawe yamanyile ilipango lyono u muhizi kokuziza, mbeka yali yekale meso, hamba si yali yayileceleze ikaya yakwe yibenwe.

⁴⁴ Holeka nanye nhavivyo, mweze mwiwikanizize lukulu, hambi Mwana wo Munhu nha kokuziza mwipango lyono anye si mwihwesize yaye.”

U mwitumami mwihuwilwa, no mwitumami mono si mwihuwilwa

⁴⁵ Nayo Yesu, yakajendelela kulonga yakutya, “Alu nani mbi u mwitumami mwihuwilwa, kanyhi we mahala, mono muwaha wakwe komuwika, ho yawapele zindigwa iwanhu wakwe mucipango cono cinojeye?

⁴⁶ Mbeka u mwitumami yuyo kowa mumoti, hono u muwaha wakwe kolo yakuza, yamwagane yakunoza nhavivyo.

⁴⁷ Mbeka nghumutyenyi, vyono komuwika u mwitumami yuyo, yawe mulanjilizi we sawo yakwe yose.

⁴⁸ Ninga hono yawe mwitumami mubi, nayo ho yatye mu nhumbula yakwe nhavi, ‘U Muwaha wangu nha yacela ku wuwuye,’

⁴⁹ hanyuma ho yanze kuwatowanga i wetumami wayagwe kanyhi akuno yawe kulya no kungʼwezana ne wagala wujimbi,

⁵⁰ ninga u muwaha wakwe, kokuziza mwizuwa lyono siyalanjiliye yaye, hamba mucipango cono si yamanyile.

⁵¹ Nayo kolo yakuza, kolomusanha yamulavye hejete, hanyuma komuwika mwipuga limonga ne wakoci. Na kuko kolowa cililo no wugwezula meno.