Maluko 9 - I CILAGANE CIPYA 1991

¹ Yesu yakajendelela kuwalonjela yakutya, “Mbeka nghumulonjelenyi, vyono ho wali wanji wono wali bahano, wono si wolofwa, lono wakali si nawuwona wutemi wo Mulungu wukuziza mu vilungo.”

Yesu yakupituka futa yakwe

² Vyaza puluta vilo mutandatu, Yesu yakawasola Petelo, na Yakobo na Yohana, yakawategula kwitunda itali wali wene. Na kuko lono wali wamulanjile, Yesu yakapituka futa yakwe,

³ ne vivwalo vyakwe vikangʼalala, vikawa vizelu swe, hamba musina munhu wo wose mononze yose mono yali yasumile kuvyeza viwe vizelu swe nha vivilya.

⁴ Ale, Eliya na Musa nawo wakaza wakalongana na Yesu.

⁵ Nayo Petelo yakamutya Yesu, “Mwijizi, nha viswanu muno muno vyono cili baha. Holeka ciba cizenje vibanda vidatu, cimonga cako, cimonga ca Musa na cimonga ca Eliya.”

⁶ Umwene ne wayagwe wakogopa muno, sunga yikamunoza Petelo yalece kumanya na cono yakulonga.

⁷ Ale, likaza ivunde likawagubika, ne lizi likahulikwa likulawa mwivunde lilyo, likutya, “Ayu yo Mwanangu mwendece wangu, mweze kumuhulika.”

⁸ Lo lulolulo iwejizwa wakalanga kanyhi, ninga siwawona munhu yunji, langa Yesu du yali wene, hamonga na weneco hodu.

⁹ Na lono watimaga hasi ye litunda, Yesu yakawakongʼonheza, walece kumulonjela munhu wo wose zono waziwene, sunga u Mwana wo Munhu kolo yakuzuka muli wafu.

¹⁰ Ale, wakebata lilajilizo lilyo, akuno wakwiwuza wuza weneco wose i nhunizo yo wuzuce muli wafu co cici.

¹¹ Nawo wakamuwuza Yesu, wakutya, “Alu iwejizi wo Wulajilize nha watezaga vyono yinojeye Eliya yamule kuza?”

¹² Nayo yakawatya, “Heya, Eliya kokwamula kuza kuviwikaniza vyose. Ninga hamba nha vivyo, nhawule, lu, yandicigwe mu Mandiko Gono Gelile, vyono u Mwana wo Munhu kotuga magazo menji no kobedegalwa?

¹³ Ninga nghumutyenyi, vyono Eliya nha yakondya kuza, nawo wakamutendela vyose vyono wahilaga, nha vyono yali yandiciywe mwene.”

Yesu yakumuponya umwana mono yena icisi

¹⁴ Nawo wali weza kuwagana awalya iwejizwa wanji, wakawona lipuga yiwaha lye wanhu baho. Na wanji wa mu wejizi wo Wulajilize, wewuzaga nawo.

¹⁵ Lo lulolulo ilipuga lililya lye wanhu lyaza kumuwona Yesu, wose wakezina muno, wakamumanyhilila wamulamuse.

¹⁶ Nayo Yesu yakawawuza yakutya, “Alu mukwiwuza cici nawo?”

¹⁷ Baho munhu yunji wa mwipuga lililya lye wanhu yakapitula, yakutya, “Go Mwijizi, ndeta mwanangu kuli ʼgwe, yena icisi lyono likamunoza yawe cibwibwi.

¹⁸ Na nhondo zose kolo lyeza kumwibata, limugwisaga hasi, no kumunoza yalavye cifulo mu mulomo, akuno yakugwezula ne meno gakwe, kanyhi yakuganda muwili wose. Nane nghawalomba iwejizwa wako walilavye licisi lilyo, ninga hamba siwalisuma ngʼo.”

¹⁹ Nayo Yesu yakapitula, yakutya, “Nye nyo lulelo lono lusina wihuwilo! alu cokwikalana nanye sunga nili? Alu nomukangalilenyi sunga nili? Ale ta, mundetelaje yuyo muzelelo.”

²⁰ Wakamuleta kuli mwene. Lo lulolulo licisi lilyo lyeza kumuwona Yesu, likamuzuganga umwana yuyo, nayo mwana yuyo yakagwa hasi, yakegalagaza no kulavya cifulo mu mulomo wakwe. Yesu yakamuwuza usogwe yo mwana yuyo, yakutya.

²¹ “Alu zizino zamwijelela ku wulawa nili?” Nayo yakapitula, yakatya, “Kulawa wudodo wakwe.

²² Na kali kenji licisi lilyo, limugwisizaga mu moto na mu malenga, ho limongomezeze lukulu. Ale, holeka hono wusume, wuciwonele lusungu no kucitaza.”

²³ Yesu yakamutya, “Ati hono kosuma! Zose nha zisumice kuli munhu mono yena wihuwilo.”

²⁴ Baho, usogo yo mwana yakalila neʼzi iwaha, yakutya, “Nihuwiye! Ninga uwihuwilo wangu wanjiye, wunhazaje.”

²⁵ Nayo Yesu yaza kuliwona lipuga lye wanhu lyeza kumwikongholela lumangho hamwande yakwe, yakalitacila lililya licisi lyavu yakulitya, “Agwe go licisi mono wukumunoza u mwana yuyu yawe cibwibwi kanyhi yawe ciziwi, nghukutya, ulawe muli mwana yuyu, hamba wulece kwinjila muli mwene kanyhi!”

²⁶ Baho licisi lilyo likazoza, likamugwisa umwana yuyo hasi, hanyuma ho likawa kulawila muli mwene. No mwana yakawa nha yafwiye, sunga na wanji wakatya, “Yakondya kufwa!”

²⁷ Ninga mwene Yesu yakamwibata muwoko wakwe, yakamwinula, nayo yakema.

²⁸ Nayo Yesu yaza kwinjila mu kaya, iwejizwa wakwe wakamuwuza cinyele wakutya, “Alu nhawule ase sicasuma kwilavya?”

²⁹ Nayo yakawatya, “Licisi lye liwala lili, silisumikaga kulavywa, langa ko wulombe du.”

Yesu yakulonga kanyhi zo wufwe wakwe

³⁰ Yesu ne wejizwa wakwe wakawuka baho, wakajendelela no muhinzo, wakakolela mu yisi ya Galilaya. Yesu siyenda iwanhu wakumanye kuko kono yali,

³¹ ku soko yawejizaga iwejizwa wakwe. Yakawatya, “Umwana wo Munhu kolavywa kuli wanhu wono womuwulaga, ninga kolo yawulagwa, hanyuma ye vilo vidatu kozuka kanyhi.”

³² Ninga i wejizwa hamba si wezuka ze nghani yiyo. Nawo wakogopa kumuwuza.

Nani muwaha

³³ Ale, wakafika ku Kapelanawumi. Na lono yali mu nyumba yakawawuza, yakutya, “Mwali kwiwanganilaci mu nzila?”

³⁴ Ninga wene wakanyamala, hambi mu nzila nha wewanganilaga weneco wose vyono nani ʼmbi muwaha muli wene.

³⁵ Yesu yakekala hasi, yakawacema wawalya we likumi na wejete, yakawatya, “Hono munhu yakuhila yawe mulongozi, yimunojeye yawe wa munyuma wa wose, na mwitumami wa wose.”

³⁶ Ale, yakamusola mwana mudodo, yakamuwika haciligati yawo, yakamukumbatila, hanyuma yakawatya,

³⁷ “Mono yakumubocela mwana mudodo mono yenha yuyu mwitagwa lyangu, yakumbocela nene, na mono yakumbocela nene, siyakumbocela nene du, langa yakumubocela yuyo mono yanhuma.”

Mono si cili suta nase yali kulubavu lwetu

³⁸ Yohana yakamutya, “Mwijizi, cimuwona munhu yunji yakwitumamila i litagwa lyako no kugalavya macisi, nase cajela kumulemeza vyono mwene si muyagwe na sese.”

³⁹ Ninga mwene Yesu yakawatya, “Mulece kumulemeza, hambi nha hasina munhu mono konoza ipoto mwitagwa lyangu, na kunji kanyhi ho yasume kulonga nghani ʼmbi muliʼne.

⁴⁰ Vyono, mono si yali suta nase, ale yuyo yo muyetu.

⁴¹ Munhu wo wose mono komupelenyi cikombe ce malenga go kungʼwa, vyono anye muli wanhu wakwe Kilisito, mbeka sikolokwanjila kutuga i cihumbilizwa cakwe.

I mewajizo

⁴² “Munhu wo wose mono komunoza yumonga wa mu wadodo wawa wono wanyihuwiye yetume wubi, yali yiwe yili ciba, u munhu yuyo yawopelezwe mu singo izala iwaha no kutagwa mwilenga.

⁴³ No muwoko wako hono wukwiwajize, ale wuwudumulaje! Hambi nha yili ciba kuliʼgwe winjile mu wumi, akuno wusina muwoko monga, si nho kuwa ne miwoko yose vyono myejete no kubita ku moto we Gehena. [

⁴⁴ Na mumo, i mangʼonyo gayo sigafwizaga, no moto wayo siwuzimaga yaye.]

⁴⁵ No mugulu wako hono wukwiwajize, ale wuwudumulaje! Hambi nha yili ciba kuliʼgwe kwinjila mu wumi akuno wusina mugulu monga, si nho kuwa ne migulu yose vyono myejete no kutagwa mu moto we Gehena. [

⁴⁶ Na mumo, i mangʼonyo gayo sigafwizaga, no moto wayo siwuzimaga yaye.]

⁴⁷ Ne liso lyako hono likwiwajize, ale wuliwusaje wulitaje, hambi nha yili ciba kuliʼgwe winjile mu wutemi wo Mulungu wina liso limonga du, si nho kuwa ne meso gako gose vyono mejete, no kutagwa mu moto we Gehena.

⁴⁸ Na mumo i mangʼonyo gayo sigafwizaga, no moto siwuzimaga yaye.

⁴⁹ Hambi wose nha wolopembelwa mu moto.

⁵⁰ Umwino nha muswanu, ninga hono wususulice, cinhuci kanyhi cono cogomoleza indaso yayo? Muweze no mwino muli nyenye nyo weneco, kanyhi mweze kwikala mwilamuye nyenye wose.”