Maluko 13 - I CILAGANE CIPYA 1991

Yesu yakulonga zo wuhodanjice we Nyumba yo Mulungu

¹ Na lono Yesu yalawilaga kunze ye Nyumba yo Mulungu, yunji wa muli wejizwa wakwe yakamutya, “Mwijizi, langa ta imabwe gaga, ne mazengo gaga vyono ga wizine.”

² Nayo Yesu yakamutya, “Ma, wukugawona mazengo gaga mawaha? Hasina hamba ibwe limonga lyono lyolosigala mucanyha ye libwe liyagwe, hambi gose nha golokumulwa.”

U mwamulizo wo wugaye ne magazo

³ Na lono Yesu yali yekaye mucanyha ye Litunda lye Mizeyituni vidomile ne Nyumba yo Mulungu, Petelo na Yakobo na Yohana na Andeleya wakamuwuza cinyele, wakutya,

⁴ “Ucilonjelaje ta zinghani zizi zolowa za nili? Ne citanjlioci cono colajila vyono zinghani zizi zili behi kufisilizwa?”

⁵ Yesu yakanza kuwalonjela yakutya, “Musuguce ho mulece kukongwa na munhu.

⁶ Hambi wenji nha wolokuza nawo wolokwitumamila i litagwa lyangu, wakutya, ‘Ane yo nene!’ nawo wolowajiliza wanhu wenji.

⁷ Nanye kolo mukuhulika zo wulugu ne zinganuzi zo wulugu, mulece kogopa. Hambi zinghani zizi nha sizoleka kuza, ninga indumilizo yeneco yikali sinaza.

⁸ Ne likungugo linji lyolokwihoma ne likungugo liyagwe, no wutemi wunji wolokwihoma no wutemi wuyagwe, ne hanhu hose, holowa ne matulo ne mazala. Ne zinghani zizi, wowa kotya nha wo mwamulizo wo wusungu wo kulelela mwana.

⁹ “Ninga nye musuguce. Hambi iwanhu nha wolomutegulenyi kuli mahakama, no kumutowenyi mu matangʼanilo go wuhembelo. Molotegulwa ha mwande ye walongola ne watemi ku soko yangu, ho muhomelele kuli wene.

¹⁰ Ninga yinojeye u Luganuzi Luswanu lwamule kuganulwa kuli makungugo gose.

¹¹ Nawo kolo wakumwibatenyi, no kumutegulenyi kuli mahakama, mulece kutuga mahwele vyono molongaci, ninga i lipango lilyo kolo lyafika, ale mulonje co cose cono molopegwa, hambi nha si nyenye mono mololonga, langa yo Muhe Mono Yelile.

¹² No munhu kolomukombola unduguye yawulagwe, nayo usogo yo munhu, kolomukombola umwanagwe, iwana nawo wolowatowanga iwalezi wawo no kuwawulaga.

¹³ Ne wanhu wose wolomusulenyiʼnye, ku soko ye litagwa lyangu. Ninga mono kolokangalila sunga ko ku ndumo, ale, yuyo yo kolopona.

Iiwifyo liwaha

¹⁴ “Molowona Iwifyo lyo wuhodanjice limile hono si hanhu halyo. (Mono yakusoma yezuce nhunizo yayo!) Na baho iwanhu wono wali mu Yudiya, wamanyhile mu matunda.

¹⁵ No munhu mono yali kucanyha ye litembe yalece kutima hasi no kwinjila mu kaya yakwe ho yasole cinji.

¹⁶ Na mono yali ku mugunda, yalece kuwuya kusola civwalo cakwe.

¹⁷ Ninga woyi he nye kuli wawo wono wena mida na wono wakosa mu vilo vivyo!

¹⁸ Mulombe i zinghani zizi ho zilece kwijela mu vilo vye mbeho nghali.

¹⁹ Hambi mwipango lilyo nha kolowa no wugazwe wono wukali sinejela kuwulawa vyono u Mulungu yayiwumba yinze sunga nalu, hamba siwulejela kanyhi.

²⁰ Na hono u Muwaha yali yalece kuvicepula i vilo vivyo, hasina hamba munhu mono yali yapone. Ninga ku soko ye wahagulwa wakwe, holeka Muwaha yavicepula i vilo vivyo.”

²¹ “Holeka hono munhu yamutyenyi, ‘Lanjenyi ta, Kilisito ayu hano!’ hamba lunji yatye, ‘Mulanje yali ahalya’, mulece kumwihuwila.

²² Hambi nha wolokwijela wanhu wo wulambi lambi wono wokwiyitya weneco yo Kilisito, ne wawizi wo wulambi lambi, nawo wolonoza vitanjilo ne mezino, ho wajilize i wahagulwa wo Mulungu, hono yisumice.

²³ Ninga anye musuguce. Hambi ane nha nimulonjelenyi zinghani zizi zose lono zikali sizinejela yaye.

U wuze wo Mwana wo Munhu

²⁴ “Ale, mu vilo vivyo, wulaza kuwa wapuluta u wugaye wuwo, ilizuwa lyolotukuwala no mwezi siwolosana ngʼo.

²⁵ Ne zinyelezi zologwa kuwulawa ku wulanga, ne vilungo vya ku wulanga vyolosinjiswa.

²⁶ Ale baho ho wolomuwona u Mwana wo Munhu yakuziza mu mavunde kwe vilungo viwaha ne nhojo.

²⁷ Hanyuma yayo kolowatuma wamalayika wakwe, kolowakonghola iwahagulwa wakwe kulawa ku zimbavu zose yine za kononze, kuwulawa ku mwamulizo we yinze, sunga ko ku ndumo nyagwe ye yinze.”

I lifundo lyo Mukuyu

²⁸ “Alu mwiyijizizaje ta mu mukuyu i cihwanicizo aci, I manhambi gayo lono gakwamula du kutula i mahamha, anye mukumanya vyono lifuku lyasejelela.

²⁹ Ale nha vivyo na nyenye, kolo mukuwona zinghani zizo zeza kuwa nha vivyo, ale mumanye vyono u Mwana wo Munhu yaza yali behi muno muno.

³⁰ Nane nghumulonjelenyi mbeka, vyono ululelo lulu silopuluta ngʼo sunga zinghani zizi zose ziwe zakondya kufisilizwa.

³¹ Uwulanga neʼnze zolopuluta, ninga zinghani zangu sizolopuluta ngʼo.”

Kusina mono yamanyile i lizuwa hamba cipango

³² “Ninga kusina munhu wo wose mono yamanyile lizuwa hamba cipango cico vyono cokuza nili, hambe wamalayika wa ku wulanga, hambo mwana wo munhu, langa Baba yali wene du, yo yamanyile.

³³ Musuguce, mwikalaje meso, hambi nha simumanyile cipango cico hono cokuza nili.

³⁴ Yolowa nha munhu mono yakuwuka mu kaya yakwe yakubita ku muhinzo, nakuno kunji yakuwalecela i wetumami wakwe wulajilize, munhu no mulimo wakwe, yakamulonjela no mulindiliza mulango yekale meso.

³⁵ Ale, mwikalaje meso, hambi nha simumanyile munya kaya kolokuza nili, na lunji yolowa mu cinyamihe, mu cilo mugati, mu nzogolo hamba hakali mitondo.

³⁶ Mwikalaje meso hono yaze nhinicizo ho yalece kumwaganenyi mugonile.

³⁷ Na zono nghumulonjelenyi nyenye, nghuwalonjela na wose, nghutya, Mwikalaje meso!”