Maluko 11 - I CILAGANE CIPYA 1991

Yesu yakwinjila mu Yelusalemi kwa sasamo

¹ Na lono wali weza behi na Yelusalemi, wakafika ku Betifage na ku Betaniya, behi ne Litunda lye Mizeyituni. Baho yakawatuma wejete wa muli wejizwa wakwe,

² yakawatya, “Bitenyi ku citumbi cono cili kumwande yenyu. Na kolo mukwinjila mumo, mokwagana nyana ya ndogowe mbopwe, yono yikali sinetumamilwa na munhu. Ale, muyiwopolelaje muyilete.

³ Hono munhu yunji yamuwuzenyi, ‘Alu so cici mukunoza nhavivyo?’ Muteze, ‘Umuwaha yakuyisaka, ninga kanyhi koyigomola bahano musunho.’ ”

⁴ Ale nawo wakabita, wakayagana nyana monga ye ndogowe mu nzila mbopwe ha mulango. Nawo lono wayiwopolaga,

⁵ wanhu wanji wono wali wemile baho, wakawawuza wakutya, “Alu so cici mukuyiwopola nyana yiyo ye ndogowe?”

⁶ Nawo wejizwa wakapitula nha vyono wali walonjeywe na Yesu, nawo wakawaleka wabite.

⁷ Wakamutegulila Yesu yiyo nyana ye ndogowe. Wakatandika myenda yawo mucanyha ya yiyo nyana ye ndogowe, na Yesu yakekala mucanyha yayo.

⁸ Ne wanhu wenji wakatandika myenda yawo munzila, wanji nawo wakatandika manhambi ge mabici gono watema mu migunda.

⁹ Ne wanhu wose wono wali walongoleye na wawalya wono watyatyaga munyuma, wakazoza wakutya, “Yalumbwe Mulungu! Mumoti yuyo mono yakuziza mwitagwa lyo Muwaha!

¹⁰ Nha wumoteswe u wutemi wono wukuza wa Dawudi usogo yetu. Yalumbwe Mulungu kucanyha ku wulanga!”

¹¹ Na Yesu yali yeza kwinjila mwikaya lya Yelusalemi, yakabita monga kwa monga sunga ko ku Nyumba yo Mulungu, yakavilanga muno vinhu vyose. Ninga vyono cali ceza cinyamihe, yakabita ku Betaniya hamonga na wawalya we likumi na wejete.

Yesu yakuwulijita u Mukuyu

¹² Ne mitondo yaco, lono walawaga ku Betaniya, Yesu yakadabuka.

¹³ Ale, yakawuwonela cidaha u mukuyu wono wali wudedewaye mahamha menji. Yakawubitila ho yawone hono wuwe wina mikalo yo yose. Nayo yaza kuwuficila, yakawagana wusina hamba mukalo wo wose, langa mahamha gali wene du, hambi nha cali sicinaficila i cipango co mukuyu kulela mikalo.

¹⁴ Baho yakawutya mukuyu, “Hasina munhu mono kolya kanyhi mikalo yako sunga cibitilila.” Nawo iwejizwa wakwe wakazihulika i zinghani zizo.

Yesu yakwinjila mu Nyumba yo Mulungu

¹⁵ Ale, wakafika ku Yelusalemi. Yesu yakenjila mu Nyumba yo Mulungu, yakanza kuwawinjila kunze i wanhu wono waguzaga no kugula vinhu mumo. Yakazigwisanga izimeza za wawalya wono wakawaga zipesa, ne magoda ga wawalya wono waguzaga zinziwa.

¹⁶ Hamba si yamukombola munhu wo wose yakole mu Nyumba yo Mulungu yadinghuye cinji.

¹⁷ Hanyuma yakawejiza, yakutya, “Yandikwa, ‘Nyumba yangu yocemwa nyumba yo wulombelo kuli makungugo gose!’ Ninga ʼnye mwayinoza yawa nhe pango lya wahizi!”

¹⁸ Nawo Iwakohani wawaha ne wejizi wo Wulajilize wali weza kuhulika zizo, wakanza kulondola nzila yo kumongomezeza. Ninga hamba nha vivyo wamogopa, ku soko i lipuga lye wanhu likezina muno so mejizo gakwe.

¹⁹ Na lono yali yeza kuwa cinyamihe, Yesu ne wejizwa wakwe wakawuka mwikaya.

I lifundo lyo Mukuyu wono wanyala

²⁰ Nawo lono wapulutaga, hakali mitondo muno wakawuwona mukuyu wuwulya wanyala wose, sunga ne milela yayo.

²¹ Nayo Petelo yakawukumbucila, yakamutya Yesu, “Mwijizi, langa ta! Umukuyu wuwulya wono wawulijita, wanyala!”

²² Yesu yakawatya, “Mwihuwilenyi Mulungu.

²³ Nghumulonjelenyi mbeka vyono, hono munhu yalilonjele litunda lili yatye ‘Wukulice wutagwe mwilenga!’ Hono yalonje kuno yasina mahwele mu nhumbula yakwe, langa yehuwiye vyono zose zono yalonjile zonozeka, heya kotendelwa inghani yiyo.

²⁴ Holeka nghumutyenyi, lono mukulomba no kusaka cinji, mwihuwile du vyono mwakondya kupegwa, nanye mozituga.

²⁵ Kolo mukwima no kulomba, muwanenelaje wose wono wamusutizyenyi nghani yo yose, nayo u Sogo yenyu mono yali ku wulanga ho komunenelenyi nanye i masutya genyu. [

²⁶ Ninga hono mulece kuwanenela wanji i masutya gawo, hambo sogo yenyu mono yali ku wulanga sikomunenelenyi anye imasutya genyu yaye.]”

I nghani yo Wulajilize wa Yesu

²⁷ Wakafika kanyhi ku Yelusalemi. Na lono Yesu yajenda jendaga mu Nyumba yo Mulungu, Iwakohani wawaha, ne wejizi wo Wulajilize, ne wanyamhala wakamubitila,

²⁸ wakamuwuza, wakumutya, “Alu mwene wukuzinoza zinghani zizi ko wulajilizeci?” “Alo nani mono yakupelile u wulajilize wo kuzinoza zinghani zizi?”

²⁹ Ninga Yesu yakawatya, “Nane nomuwuzenyi nghani monga, hono mumhitule, ale nane ho nomulonjelenyi vyono ko wulajilizeci holeka nghuzinoza zinghani zizi.

³⁰ Wulenyi, ma u wulajilize wa Yohana wo kubaputiza walawa ku wulanga hamba kuli wanhu? Ta, mhitulenyi.”

³¹ Nawo wakanza kwiwanganila weneco wose, wakutya, “Hono citye, ‘Walawa ku wulanga’, nayo kociwuza yatye, ‘Alu so cici simwamwihuwila?’

³² Na hono citye, ‘Walawa kuli wanhu…’ ” Wakogopa i lipuga lye wanhu, hambi wose nha wali wehuwiye vyono Yohana yali muwizi mbeka.

³³ Holeka wakamupitula Yesu wakatya, “Ase sicimanyile.” Nayo Yesu yakawatya, “Alu hamba na nene kumbe sinomulonjelenyi vyono ko wulajilizeci holeka nghuzinoza i zinghani zizino.”