Luka 6 - I CILAGANE CIPYA 1991

I Nghani ye lizuwa lye Sabato

¹ Mwizuwa linji lye Sabato, Yesu yakakola mu migunda yo wuhemba; Wejizwa wakwe wakabena maso go wuhemba, wakagafijiha ne miwoko, wakasola zimhece wakalya.

² Ninga Wafalisayo wanji wakawawuza, “Nhawulenyi mukwituma yono yili mwiko mwizuwa lye Sabato?”

³ Yesu yakapitula yakawatya, “Alo nghani yiyi si mwasoma, vyono yetuma Dawudi, mwene hamonga na wono yali yena nawo, mwipango linji lono wali wadabuka?

⁴ Vyono yenjila mu Nyumba yo Mulungu, yakalya i mikate yono yali cilavya kuli Mulungu, yakawapela ne wayagwe wono yali yena nawo; mikate yono yali mwiko kulya, langa Wakohani du waliwene?”

⁵ Yesu yakawatya, “U Mwana wo Munhu yo Muwaha we Sabato.”

U Munhu mono yali yena muwoko wono wudejepe

⁶ Kukawa mu Sabato yinji, Yesu yakenjila mu nhangʼanilo yo wuhembelo, yakejiza, na mumo mwali na munhu mono muwoko wakwe wo kulume wali wudejepe.

⁷ Wejizi wo Wulajilize ne Wafalisayo, wasakaga watuje nghani yo kumusonjezeza Yesu, holeka wakawa walindiye wawone hono komuponya munhu yuyo mwizuwa lye Sabato.

⁸ Ninga Yesu yakawamanya i mahweso gawo, yakamutya u munhu wo muwoko wono wudejepe “Winuce, wime haciligati.”

⁹ Yakenuka yakema haciligati. Yesu yakawatya, Nghumuwuzenyi, “Wulenyi mwiko lu kwituma viswanu mu Sabato, hamba kwituma vibi? Kuponya wumi, hamba kwajiliza?”

¹⁰ Yaza kuwalanga wawalya wose wono wali wali baho, yakamutya yuyulya munhu, “Golola muwoko wako.” Nayo yakawugolola; no muwoko wakwe wukawa kunoga.

¹¹ Ninga wene wakakolwa muno ne likuwo, wakalongana weneco wose vyono wosuma kumutendela vibi Yesu.

Yesu yakuwahagula watumwa ikumi na wejete

¹² Lizuwa linji Yesu yakabita kwitunda, kulomba; yakekala kuko cilo cose sunga wukela, yakumulombo Mulungu.

¹³ Waza kwela, yakawacema wejizwa wakwe, yakahagula muli wene, wanhu ikumi na wejete, wawo yakawacemela itagwa lye “Watumwa.”

¹⁴ Simoni mono Yesu yamupela itagwa lya Petelo na Andeleya mwanakwawe, na Yakobo na Yohana, na Filipo na Batolomayo,

¹⁵ na Matayo na Tomaso, na Yakobo na Alifayo,

¹⁶ na Simoni mono yacemagwa Zelote, na Yuda na Yakobo, na Yuda Musikaliyota, mono hanyuma yakamugaluka Yesu.

Yesu yakwijiza no kuwaponya wanhu

¹⁷ Yaza kutima kwitunda hamonga nawo, Yesu yakema hanhu hono hali hali wuhihi, hatendemaye, na baho hali howali Wejizwa wakwe wenji, no winji we wanhu wono walawa mbavu zose za Yudiya, na Yelusalemi, na ku mhwani yose ya Tulo na Sidoni, wose wakaza wamuhulicize Yesu, no kuponywa zinhamwa zawo.

¹⁸ Na wono wagazagwa ne macisi, wakaponywa.

¹⁹ Ne wanhu wose wasakaga wamupamize, hambi vilungo nha vyalawaga muli mwene, vikawaponya wose.

U Wumoti ne woyi he

²⁰ Yesu yakawapitucila wejizwa wakwe yakatya, “Muli wamoti nyo waciwa: hambi wutemi wo Mulungu nha wenyu.

²¹ “Muli wamoti nye mono muli nzala alu, hambi nha molokwigutywa. “Muli wamoti nye mono mukulila alu, hambi nha moloseka.

²² “Muli wamoti nye, kolo wanhu wakumusulenyi, na kolo wakumusiwanulenyi, no kumulijenyi, no kuliviza litagwa lyenyu nha wetuma vibi, ku soko yo Mwana wo Munhu.

²³ Mucidaha cico zilakwijela zizo, nhondo muze musecelele mwizuwa lilyo so nyemo. Hambi wuhumbilizwe wenyu nha wuwaha ku wulanga. Hambi wasogo zawo nha vyo wawatendela i wawizi.”

²⁴ “Ninga woyi he nye mono muli wagoli! Hambi nha mwapegwa mwakondya wusindamice wenyu.

²⁵ “Woyi he nye mono mwigute aluno, hambi nha molodabuka. “Woyi he nye mono mukuseka aluno, hambi nha molokalala no kulila.

²⁶ “Woyi he nye kolo wakumulumbizenyi wanhu wose, hambi wasogo zawo nha vyo wawatendela i wawizi wo wulambi.

Kuwenda i walugu

²⁷ “Ninga ane nghumutyenyi anye mono mukuhuliciza, Muwendaje i walugu wenyu, muwatendelaje viswanu wono wakumusulenyi.

²⁸ Muwalugutize wono wakumulijitenyi, muwalombele wono wakumutendelenyi vibi.

²⁹ Munhu hono yakutowe mu luzagasa lumonga, umupitusize no luzagasa luyagwe; munhu hono yakuboce likoti lyako, umulecelaje ne shati yako.

³⁰ Muli wose mono yakukulomba cinji, umupelaje, na mono yakukusolela sawo yako, ulece kuyisaka yakugomolele.

³¹ Muwatendelaje wanhu wose, nha vyono anye mukusaka wene wamutendelenyi nyenye.

³² “Hambi hono muwe kuwenda du wono wakumwendenyi, mowa mwina ilumboci? Hasina. Ku soko hamba ne wanyo wubi nawo, nha wetumaga nhavivyo.

³³ Na hono muwe kuwatendela viswanu wono wakumutendelenyi viswanu du, mowa mwina ilumboci? Hambi nha sunga ne wanyo wubi nawo nha watendaga nhavivyo.

³⁴ Na hono muwe kuwakopesa wono mwitumbiye vyono womugomolelenyi kanyhi, mowa mwina ilumboci? Ku soko sunga ne wanyo wubi nawo nha wawakopesaga i wanyo wubi wayawo, ho wagomolelwe kanyhi vyono vilingʼaniye.

³⁵ Vyo si yinha, ninga muwendaje walugu wenyu, muwatendelaje viswanu, mweze kuwakopesa, kuno si mukulanjilila kugomolelwa. No wuhumbilizwe wenyu wowa wuwaha, nanye mowa wana wo Mulungu Mono Yalawiliciye Muli Vyose: hambi mwene nha muswanu kuli wono wasina ilumbo na kuli wabi.

³⁶ Mweze no lusungu nha vyono Senyu yali lusungu.

Muli zo kuwalingʼaniza wanji

³⁷ “Mulece kuwalingʼaniza wanji, nanye ho si molingʼanizwa no Mulungu, mulece kuwahosa wanji, nanye si molohoswa: muwanenelaje wanji, nanye molonenelwa.

³⁸ Wapelenyi wanji vyono wakusaka, nanye molopegwa, Heya molobocela mu miwoko yenyu cipimo ciswanu cisindilwe, cisinjisizwe, cono cimemeleceye, no kumwajika. Hambi nha mu cipimo cicilya du cono mwitumamilaga kuli wanji, co cico du cono Mulungu nayo kolomujelelenyi na nyenye.”

³⁹ Yesu yakawalonjela cihwanicizo cici “Wulenyi, u mubofu kosuma mbi kumutonga mubofu muyagwe? hamba hadodo. Wose wogwila mwikombo.

⁴⁰ U mwijizwa kowa nho mwijizi wakwe.”

⁴¹ Kosuma nhawule kuciwona cilagala cono cili mu liso lyo nduguyo, hamba si kukumbucilaga ibici lyono lili mu liso lyako go mweneco?

⁴² Hamba kosuma nhawule kumutya nduguyo, “Ndugu yangu, leka ta nghuwuse i cilagala cono cili mu liso lyako, na akuno si ukulanga ibici lyono lili mu liso lyako go mweneco? Go mukoci gwe, wamule kuwusa ibici lyono lili mu liso lyako, ho kosuma kuwona viswanu no kusuma kuwusa icilagala cono cili mu liso lyo nduguyo.”

U Mubici wumanyicilaga mu mikalo yayo

⁴³ “Hasina ibici iswanu lyono lilelaga mikalo mibi, hamba ibici ibi lyono Ulelaga mikalo miswanu.

⁴⁴ Wanhu wawutanjilaga mubici mu mikalo yayo. Kanyhi yili calinze, vyono wanhu si wahepaga mikuyu mu mamivya, hamba si wahepaga zabibu mu mabijili.

⁴⁵ Munhu muswanu, kalavyaga ziswanu kulawa mu viwutwa vyakwe vya mu nhumbula yakwe. No munhu mubi nayo kalavyaga izimbi kulawa mu viwutwa vyakwe vya mu nhumbula yakwe, hambi munhu nha kalongaga kulawa muli zono zimemile mu nhumbula yakwe.

I Wazenji wejete

⁴⁶ “Nghuwona mukunyitya, Muwaha, Muwaha, akuno si mukwituma zono nghulonga?

⁴⁷ Nomulonjelenyi cihwanicizo cono cokwila, kulajila vyono yenha mono yakunyiziza, no kuzihulika zinghani zangu no kuzituma.

⁴⁸ Yuyo yehwanile munhu mono yakuzenga kaya, mono yahimba hasi muno, no kuwika musinji wa mabwe, gakaza malenga menji, gakayikundujiza kaya yiyo, hamba kuyisinjisa ngʼo vyono yali yizenjigwe mu musinji wono wukamile.

⁴⁹ Ninga mono yakuzihulika zinghani zangu, hamba kwituma cinji, yuyo yehwanile munhu mono yazenga kaya yakwe mu muhangha caka du, hamba kuwicila musinji, malenga gakayikundujiza kaya yiyo, nayo yikagwa no kuhodanjika lukulu.”