Luka 23 - I CILAGANE CIPYA 1991

Yesu ha mwande ya Pilato

¹ Yikenuka mhuga yose, wakamuleta kuli Pilato.

² Wakanza kumusonjeza, wakutya, “Cimuwona yuyu yakuwafunda vibi i wanhu wetu, yakulemeza walece kulipa kodi kwa Kayisali, yakwiyitya ati mwene yo Kilisito Mutemi.”

³ Pilato yakamuwuza Yesu yakutya, “Ati, yo gwegwe Mutemi we Wayahudi?” Yesu yakamupitula, yakatya, “Kulonga he gwegwe.”

⁴ Pilato yakawalonjela wakohani wawaha ne lipuga lye wanhu yakutya, “Ane singhuwona lisutya lyo lyose muli munhu yuyu.”

⁵ Ninga wene wakacila kutya, “Yakusagahaza wanhu so mafundo gakwe, mu yisi yose ya Yudiya, yamuliziza ku Galilaya sunga naluno alu, yali baha.”

Yesu yakutegulwa kwa Helode

⁶ Pilato yaza hulika zizo yakawuza yakutya, “Alu munhu yuyu munya Galilaya?”

⁷ Nayo yaza manya vyono Yesu yali mu wutemi wa Helode, yakamutegula kuli Helode, hambi mwene Helode nha yali yali mu Yelusalemi vilo vivyo.

⁸ Nayo Helode yakasecelela muno yaza muwona Yesu, hambi nha yali yahulika za Yesu, holeka yalanjililaga kwa vilo vinji, yasume kumuwona kwe meso gakwe mweneco. Hamonga na zizo, yali yetumbiye kumuwona Yesu yakunoza citanjilo.

⁹ Helode yakamuwuzawuza Yesu nghani nyinji, ninga Yesu siyamupitula cinji.

¹⁰ Wakohani wawaha ne wejizi wo Wulajilize, wakema, wakehinda muno muno kumusonjeza.

¹¹ Helode hamonga ne Wasilikale wakwe, wakamukoza cevu Yesu, no kumuzwajiza; hanyuma wakamuvwika mwenda we citemitemi, wakamugomola kuli Pilato.

¹² Lizuwa lilyo ho welamulila wa Helode na Pilato, hambi nha wali wesulile.

Yesu yakupegwau wulingʼanizwe wo kuwulagwa

¹³ Pilato yakawacemela hamonga Wakohani wawaha ne walongola ne wanhu,

¹⁴ yakawatya, “Mundetela munhu ayu, mukutya, yakufunda wanhu vibi, ale hulicizenyi, lono nimuwuzize hali nyenye, si mbwene hamba wusutye wo wose muli mwene, muli zizo zono mukumusonjeza,

¹⁵ hamba si nene du, langa sunga na Helode siyawene yisutya lyo lyose, na yo yilecile kamugomola kanyhi kono kwangu. Holeka yikwijela vyono munhu yuyu si yanozize nghani yo yose yimbi yono yoleka yawulagwe.

¹⁶ Holeka notya yakunwe viboko, hanyuma nomukombola.” [

¹⁷ Na mu zi sikukuu za Pasaka, Pilato yali yimunojeye yawawopolele mufungwa monga.]

¹⁸ Ninga wose wakazozeza hamonga, wakutya “Wumuwusaje ayu, langa uciwopolele Balaba.”

¹⁹ (Balaba yo munhu mono yatajilwa mu jela, so wuma wono yawuleta mweneco mwikaya, kanyhi na ku soko yo wuwulaji.)

²⁰ Pilato yahilaga kumuwopolela Yesu, holeka yakawalonjela kanyhi,

²¹ ninga wene wakazoza, wakutya, “Wumutumbice mu musalaba, Wumutumbice mu musalaba!”

²² Pilato yakawatya lwe kadatu, “Alu kahodanga nghani ci munhu ayu? Ane si mbwene lisutya lyo lyose muli mwene lyono lyoleka yafwe, holeka nomukuna viboko, hanyuma nimuwopolele.”

²³ Ninga wene wakacila kuzoza muno muno, wakutya, yimunojeye Yesu yatumbikwe mu musalaba. Ne ndumilizo, nhondo mazi gawo gakasuma.

²⁴ Holeka Pilato yakadumula nghani vyono wuhile wawo wufisilizwe.

²⁵ Yakamuwopolela Balaba mono wamusakaga, mono yali mudindile mu jela, ku so wuma no wuwulaji, ninga yakamukombola Yesu kuli wene, wamutendele vyono wasakaga.

Yesu yakutumbikwa mu Musalaba

²⁶ Na lono wamutegulaga, waketangʼanila na munhu monga mono yacemagwa Simoni munya Kilene, yalawaga mu matumbi. Wakamwibata, wakamupiciza musalaba, wetembase na Yesu.

²⁷ Wakamutyatya wanhu wenji muno; na mumo mwali mowali wacekulu wono wamulililaga muno.

²⁸ Ninga Yesu yakawapitucila, yakatya, “Nye wacekulu wa Yelusalemi! Mulece kundilila ane, langa mwiyililile nyenye nyo weneco ne wana wenyu.

²⁹ Hambi lanjenyi, vilo nha vyolokuza vyono wanhu wolotya. ‘Wamoti iwagumba, na we zinda zono si zilelaga, ne matombo gono si gosaga.’

³⁰ Mwipango lilyo i wanhu ho wolokwanza kugalonjela matunda, ‘Mucigwilaje.’ Ne vigongo, ‘Mucigubice.’

³¹ Hono wanhu wakutenda zizi mwibici lidece, ma mwibici likavu ho zowa wule?”

³² Wakawasola kanyhi na wanhu wanji wejete, wahodanji, wawulagwe hamonga na Yesu.

³³ Nawo waza fika hanhu hono hatezagwa, “Cipala,” ho wamutumbika Yesu mu musalaba hamonga na wawalya wahodanji wejete, yunji ku muwoko wo kulume u muyagwe ku muwoko wo kucekulu.

³⁴ Yesu yakatya, “Baba, uwanenele, hambi nha si wamanyile yono wakwituma. Hanyuma wakagawana vivwalo vyakwe kwa kutowa kula.”

³⁵ Wanhu wakawa wemile baho wakulanga. Ne wawaha walongola wakamuzwaga, wakutya, “Yaponyaga wanji, alu yeponye mweneco hono yo mweneco Kilisito wo Mulungu, u muhagulwa wakwe.”

³⁶ Ne wasilikale nawo wakamuzwaga, wakaza, wakamupela siki,

³⁷ wakutya, hono yo gwegwe Mutemi we Wayahudi, ale wiponye go mweneco.

³⁸ Hacanyha yakwe wakawika Mandiko gono gakutya “Ayu yo Mutemi we Wayahudi.”

³⁹ Yu monga muli wawalya wahodanji, wono watumbikwa mu misalaba hamonga nayo, yakamutovula yakutya, “Alo si yo gwegwe Kilisito? Ale wiponye go mweneco, uciponye na sese.”

⁴⁰ Ninga muhodanji muyagwe yakamutacila, yakatya, “Alu gwe, si ukumogopo Mulungu hamba hadodo? Nagwe wuli mu wulipicizwe wuwo.

⁴¹ Nase mbeka yo lingʼani yetu, hambi nha cikulipicizwa nha vyono yicinojeye ku so metumo getu. Ninga Munhu ayu siyetuma cinji cibi.”

⁴² Hanyuma yakatya, “Yesu wunghumbucile kolo wukuza mu wutemi wako.”

⁴³ Yesu yakamutya, “Mbeka nghukulonjela, izuwalili du cowezana nane ku Wulanga.”

Yesu yakufwa mu Musalaba

⁴⁴ Yikawa nha saa sita ye misi, lizuwa likatukuwala, citi cikadinda mu yisi yose, sunga saa tisa,

⁴⁵ ne libupa lyo mwenda lyono lyali itumbikwe mu Nyumba yo Mulungu, likademuka haciligati.

⁴⁶ Yesu yakalila ne lizi yiwaha yakatya, “Baba, nghuwika muhe wangu mu Miwoko yako.” Yaza kukondya kulonga zizi, hodu yakawa kufwa.

⁴⁷ U muwaha we wasilikale igana, yaza kuwona zono ziweye, yakamukumyo Mulungu, yakutya, “Mbeka munhu ayu, yali yalilingʼani.”

⁴⁸ Ne wanhu wose wono wali wekongholeye baho kulanga zizo, waza wona zono ziweye, wakawuya kwawo wakwibinha mu zimhambaga so wukalale.

⁴⁹ We cimanyi wakwe wose, ne wacekulu wono wamutyatyaga Yesu wakulawa Galilaya, wakema kutali wakulanjilila zizi.

Wuzikwe wa Yesu mu citenjelo

^50-51 Kukawa na munhu yunji itagwa lyakwe Yusufu, mono yali munya citumbi cinji, ce Wayahudi, cono cicemagwa Alimataya. Yali munhu muswanu na wa cogopo, mono yalanjililaga uwuze wo wutemi wo Mulungu. Yali muyagwe na walya we libalaza liwaha lye Wayahudi. Ninga hamba nhavivyo siyelumbaniza mwitumo lyawo lilyo.

⁵² Mwene yakabita kuli Pilato yakawulomba u muwili wa Yesu.

⁵³ Yakawutungula mu musalaba, yakawuwopa na mwenda wa bafuta, yakawuzika mu citenjelo cono catulwa mwibwe, cono cali cikali sinawikwa munhu.

⁵⁴ Ilizuwa lilyo, lyali lizuwa lye Ijumaa, no wuwikanize we lizuwa lye Sabato wali weza kwanza.

⁵⁵ Ne wacekulu wawalya wono wamutyatyaga Yesu kuwulawa ku Galilaya, wakamutyatya Yusufu, wakacilanga citenjelo, na vyono u muwili wa Yesu wazikwa.

⁵⁶ Wakawuya kwawo, wakanozeleza mafuta ge mhunjile swanu. Na mu Sabato wakaceha nha vyono yalajilizwa.