Luka 17 - I CILAGANE CIPYA 1991

I Mewajizo

¹ Yesu yakawatya wejizwa wakwe; “I mewajizo gono gakuwakwega wanhu ho wetume wubi; si goleka kuza, ninga woyi he kuli munhu yuyo mono yakugaleta!

² Ciba yali yawopelezwe izala iwaha mu singo, yatagwe mwilenga, si nha kumwiwajiza mudodo monga muyagwe na wawa.

³ Mulanjilile! Hono nduguyo yakusutizye, umukaje; na hono yanene umunenelaje.

⁴ Hamba yakusutizye kali mupunghati, mwizuwa limonga, na hono yakusutya yakukuziza no kukutya ‘Nghunena,’ umunenelaje.”

U wihuwilo

⁵ Iwatumwa wakamutya, “Muwaha, Uconjeleze wihuwilo.”

⁶ Nayo Muwaha yakawatya, Hono mwali muwe no wihuwilo wudodo kotya nhe mhece ya haladali, mwali muwulonjele mubici wuwu wo mukuyu mukutya, kulice wukehadice mwilenga, nawo wali wumuhulicenyi.

Yono yimunojeye mwitumami

⁷ “Lunji citye muli nyenye, yunji yena mwitumami mono yali kwilima, hamba yali ku wudimi we zingholo; wulenyi kolo yawuya, kulawa ku mugunda, komulonjela yuyo mwitumami, ‘Uze lulu baha wulye zindigwa?’

⁸ Ngʼo, langa komutya, ‘Unhenjele nilye; witunje, unyitumamile, sunga nghondye kulya no kungʼwa, hanyuma nagwe ho kolya no kungʼwa?’

⁹ Si komulumba mwitumami vyono ketuma zono yalajilizwe?

¹⁰ Ale na nyenye nha vivyo, kolo mukukondya kwituma zose zono mulajilizwe, mutye, ‘Ase cili wetumami mono cisina cambuzi, cifisiliza du zono zali zicinojeye kwituma.’ ”

Yesu yakuwaponya wanhu ikumi wo Wukoma

¹¹ Kukawa Yesu lono yabitaga ku Yelusalemi, yakakolela mu mipaka ya Samaliya na Galilaya.

¹² Nayo lono yenjilaga mu citumbi cinji, waketangʼanila nayo wanhu ikumi wo wukoma, wali wemile kutali.

¹³ Wakenula mazi gawo, wakutya, “Yesu Muwaha, Uciwonele lusungu.”

¹⁴ Yaza kuwawona, yakawatya, “Bitenyi mukelajile kuli Wakohani.” Kukawa lono wabitaga, wakawa kwezwa.

¹⁵ No muyawo monga, yaza wona vyono yapona yakawuya yakumulumbo Mulungu ne lizi iwaha;

¹⁶ yakegwisa hasi ha mwande ye magulu ga Yesu, akuno yakumulumba. Nayo yali Musamaliya.

¹⁷ Baho Yesu yakatya, “Alu si wali wanhu ikumi wono wezigwe? Awalya we licenda wali hayi lu?

¹⁸ Si yejeye yunji mono yazize kumupelo Mulungu ilumbo, langa mujenzi ayu du?”

¹⁹ Hanyuma yakamutya yuyo munhu, “Winuce wubite, wihuwilo wako wukuponya.”

U wuze wo wutemi wo Mulungu

²⁰ Mwipango linji, Wafalisayo wamuwuza Yesu wakutya, “U wutemi wo Mulungu wolokuza nili?” Nayo yakawapitula, yakatya, “U wutemi wo Mulungu si wuzizaga mu nzila yono yikwijela ne meso.

²¹ Hamba hasina mono kolosuma kutya, ‘Awu aha.’ Hamba lunji ‘Awulya ahalya.’ Hambi wutemi wo Mulungu nha wuli muli nyenye.”

²² Hanyuma yakawatya wejizwa wakwe, vyolokuza vilo, lono molohila kuwona izuwa limonga, lya mu vilo vyo Mwana wo Munhu, hamba si mololiwona.

²³ Ne wanhu wolomulonjelenyi wakutya, “Lanjenyi ta yali ahalya.” Mulece kubita, hamba kuwatyatya.

²⁴ Hambi nha vyono linha limuli, lono likumulika likulawa ku lubavu lumonga lo wulanga, sunga ku lubavu luyagwe lo wulanga; vyo kolowa no Mwana wo Munhu mwizuwa lyakwe.

²⁵ Ninga lono zikali si nawa zizo, sikoleka kwamula kutamiswa vibi, no kulemwa no lulelo alu.

²⁶ Nha vyono zali mu vilo vya Noha, vyo zolowa vilo vyo Mwana wo Munhu.

²⁷ Wanhu wajendelelaga kulya no kungʼwa, kutola no kutolwa, sunga mwizuwa lililya lyono Noha yenjilila mwigalawa. Ihwazi likaza, likawawulaga wose.

²⁸ Ale, yolowa nha vyono zali mu vilo vya Loti; wanhu wajendelelaga kulya no kungʼwa, kugula no kuguza, kuhadika zimbeyu no kuzenga.

²⁹ Ninga mwizuwa lililya lyono yawucila Loti mu Sodoma, moto we cibiliti wukatonya nha mvula kulawa ku wulanga, no kuwawulaga wose.

³⁰ Nha vivyo vyo yolowa yinha mwizuwa lilyo lyono kologubulilwa u Mwana wo Munhu.

³¹ “Mwizuwa lilyo munhu wo wose mono kolowa mwitembe lye nyumba yakwe, yalece kutima ho yasole vinhu vyakwe vyono vili mu nyumba. Na mono kolowa ku mugunda nhavivyo yalece kuwuya.

³² Kumbucilenyi zono zamwagana u mugolece wa Loti.

³³ Muli wose mono kolondola kuponya nhumbula yakwe, koyajiliza, ninga muli wose mono koyajiliza, yo koyiponya.

³⁴ Nghumutyenyi, mwizuwa lilyo ne cilo, wolowa wagonile wanhu wejete hamonga, yumonga kolosolwa, no muyagwe kololekwa.

³⁵ Wacekulu wejete wolowa wakusajila hamonga; yumonga kolosolwa, no muyagwe kololekwa. [

³⁶ “Wanhu wejete wolowa mu mugunda; yumonga kolosolwa, no muyagwe kololekwa.”]

³⁷ Baho wakamuwuza, “Hayi lo Muwaha?” Nayo yakawatya, “Kono ko wuli muvimba, kuko ne zindi ko zolokwikongholela.”