Filemoni 1 - I CILAGANE CIPYA 1991

¹ Ane yo nene Pawulo mono mbopigwe mu jela ku soko ya Kilisito Yesu, na Timoteyo ndugu yetu, cikukwandicila agwe Filemoni u mwendece wetu no mwitumami muyetu,

² hamonga ne likanisa lyono likuwa kwitangʼanilila mu nyumba yako, na kuli Afiya u lumbu lyetu, na kuli Alicipo u musilikale muyetu.

³ Ilihewa no mulamu vyono vikulawa kuli Mulungu na kuli u Muwaha wetu Yesu Kilisito, viwezane nanye.

U wendo no wihuwilo wa Filemoni

⁴ Nghuwa kukukumbucila nhondo zose mu wulombe wangu agwe Filemoni, kanyhi nghumulumba u Mulungu,

⁵ nha vyono nghuzihulika zo wihuwilo wono wina nawo kuli Muwaha wetu Yesu, na zo wendo wako kuli wanhu wo Mulungu wose.

⁶ Nghulomba u wihuwilo wono wina nawo kotya sese, wukupele u wusume wo kumanyila lukulu i ziswanu zose zono cikuzituga so wilunze wetu na Kilisito.

⁷ Gwe mwendece, u wendo wako wamhela nyemo mbaha muno muno, no kumhela vilungo mu nhumbula yangu! Ne zinhumbula ze wanhu wo Mulungu zikasangalala muno muno ku soko yako.

U wlombwe kuli Onesimo

⁸ Na ku soko yiyo, hamba niwe nali sume kukulonjela witume cono wunojeye kwituma, nha nili nduguyo muli Yesu.

⁹ Ninga ku soko yo wendo, mbona yili ciba hono nghulombe. Nghunoza nha vivi, hamba yiwe ane Pawulo nili mutumwa wa Kilisito Yesu, nalu kanyhi nili mufungwa mu jela ku soko yakwe.

¹⁰ Alu nina nghani monga du yono nghukulomba ku soko yo mwanangu Onesimo, u mwanangu muli Kilisito, hambi nha neza nili sogwe mono nimuleleye lono nili mu cifungo.

¹¹ Yo Onesimo yuyulya mono mwidaha linji si yakutazaga cinji, ninga alu yakunhaza ane sunga na gwegwe.

¹² Alu nghumugomola u kwako, nayo yenha i nhumbula yangu nene no mweneco.

¹³ Nali nyende yajendelele kwikalana nane bahano, ho yanhaze i hanhu hako ku soko yo Luganuzi Luswanu, lono ane nghali nili mu cifungo.

¹⁴ Ninga si nosuma kwituma nghani yinji lono nghali si ninakombolwa na gwegwe. Si nyendile nghudindimize ho wunhaze, vyono u wuswanu wako wunojeye wulawilile mu wuhile wako gwegwe go mweneco, hamba si muwudindimizwe.

¹⁵ Lunji Onesimo yawuka kwako so cidaha cidodo du, ho wusume kuwezana nayo kanyhi mu myaka yose.

¹⁶ Naluno mwene, si yenha muwanda du kanyhi, langa yawa muswanu kuciza muno si nha muwanda, u mwene yaweza ndugu yetu mwendece. Kanyhi yaweza munhu wa cambuzi ciwaha u kwangu, sunga no kwako nhavivyo si koleka kuwa munhu wa cambuzi ciwaha kotya muwanda na kanyhi kotya ndugu yetu muli Muwaha.

¹⁷ Ale, holeka hono wuwe wukumbona ane nili muyago, ale wumubocelaje kanyhi nha vyono wali wumbocele nene no mweneco.

¹⁸ Na hono yawe yali yakusutizye cinji, hamba lunji yena mugawa kuli gwe, ale wundayaje nene.

¹⁹ Nghuyandika i nghani yiyi no muwoko wangu nene no mweneco. Nene Pawulo nolipa! (Hamba sina soko yo kulonga vyono nagwe wina mugawa kwangu gwegwe go mweneco.)

²⁰ Ale du kanyhi ndugu yangu, wunozezaje i nghani yiyo ku soko ye litagwa lyo Muwaha, wusangalasizaje i nhumbula yangu muli Kilisito.

²¹ Nghwandika akuno nina no witumbilo vyono si koleka kuvumila u wulombe wangu. Akuno manyile vyono kokwituma kuciza ya zizi zono nghukulomba witume.

²² Hamonga na zizo, wumbikanizizaje ha wugono, hambi nha nitumbiye vyono so wulombe wenyu, u Mulungu nha komhela cilejeho, ho nize nimulamusenyi.

U mulamu we ndumilizo

²³ Epafala u mufungwa muyangu mu jela muli Kilisito Yesu, yakukulamusa.

²⁴ Nawo wa Maluko na Alisitaliko na Dema na Luka, i wetumami wayangu, wose wakukulamusa.

²⁵ Ilihewa lyo Mutwa wetu Yesu Kilisito liwezane na nyenye wose.