2 Yohana 1 - I CILAGANE CIPYA 1991

¹ Ane no munyamhala nghukwandicila agwe go mugolece muhagulwa, hamonga ne wanago, mono nimwendilenyi mu mbeka. Kanyhi hamba si nene du mono nimwendilenyi, langa sunga na wono wayimanyile i mbeka, wose wamwendilenyi nyenye,

² vyono yimbeka yikalaga nase cibitilila.

³ Ilihewa no lusungu no mulamu zono zilawaga kuli Mulungu Baba, na kuli Yesu Kilisito, u Mwana wa Baba, zowezana hamonga nase mu mbeka na mu wendo.

I mbeka no wendo

⁴ Nghusecelela muno vyono mbwene wanago wanji wakujendela mu mbeka, nha vyono cabocela i lilajilizo kuli Sogo yo munhu.

⁵ Nalu go mugolece, nghulomba nghani monga du kwako, “Ciyendaje.” Si nha vyono nghukwandicila ilajilizo ipya, langa lye lajilizo lililya du lyono cawezaga nalyo na katali.

⁶ Ne nhunizo yo wendo, wo wutya, i mikalile yo wibate we malajilizo go Mulungu. Ne lilajilizo lyono mwalihulika ku wulawa u mwamulizo nha lyoli, yimunojelenyi wose mwikalaje mu wendo.

⁷ Hambi i wakoci wenji nha wemuka kononze wono siwakuvumila vyono Yesu Kilisito yaza kono kwetu yakawa munhu. No munhu mono yakulonga nha vivyo, yuyo yo mulugu wa Kilisito.

⁸ Holeka mulanjilile, ho muze mulece kwajiliza cono mwali mucipiligaliye, langa muze mutuje i lifungu lyono likwilaniciye.

⁹ Nayo mono siyakwibata no kwikala mu mafundo ga Kilisito hamba kugatyatya, yuyo yamusina u Mulungu. Langa mono yakwikala mu mafundo gago, yuyo yo yena u Sogo yo munhu kanyhi no Mwana.

¹⁰ Holeka yunji hono yaze kwenyu na kuno siyakuleta i mafundo gaga, yuyo mulece kumubocela mu zinyumba zenyu, hamba mulece kumulamusa.

¹¹ Hambi mono yakumulamusa u munhu yuyo nha yakuhanga nayo mu metumo gakwe mabi.

Hanyuma

¹² Nina nyinji zo kumulonjelenyi, ninga sinyendile kumwandicilenyi mu kalatasi no wino, langa nitumbiye kuza kuko kwenyu ho ciduwane nanye meso kwa meso, i nyemo yetu ho yimemelecele.

¹³ I wana wo lumbulyo muhagulwa, wakukulamusa.