2 Wakolinto 8 - I CILAGANE CIPYA 1991

U wucemezi we Cikilisito

¹ Kanyhi nyo wandugu zetu, cendile cimumanyizenyi ze lihewa lyono u Mulungu yagapelile makanisa ga Makedoniya.

² Wose wono wehuwiye wono wali kuko, vyono watuga majelo mawaha so wugaye, ninga hamba nhavivyo inyemo yawo yikonjelezeka muno, sunga wakawa wacemezi muno, hamba wawe wali waciwa muno muno.

³ Nosuma kuhomelela vyono wali wacemezi mu nghango ye vilungo vyawo no kuciziliza. Kanyhi ko wuhile wawo weneco du,

⁴ wakacinena muno wapegwe cilejeho co kuhanga nase mu witumami wuwu wo kuwataza wanhu wo Mulugu wono wali mu Wuyahudi.

⁵ Ayo yali yo nghani yono si cali ciyilanjliiye hamba hadodo! Hambi nha wamula kwiyilavywa weneco kuli Muwaha, hanyuma ho wakawa kwiyilavya na kuliʼse nha vivilya nha vyono winha uwuhile wo Muwaha.

⁶ Holeka cikamunena Tito mono yawamula u mulimo wuwu, yamutazilizenyi, ho musume kuwituma u witumami wuwuno wo wendo muli nyenye.

⁷ Vyono mukwizize vyose, mu wihuwilo, wulonje, wumanye, wupiligazi wo kwituma i ziswanu, sunga na mu wendo wenyu wa kuliʼse. Holeka, cikuhila mucile muno mu witumami wuwuno wo wendo.

⁸ Si nghumupelenyi ilajilizo, langa nghuhila kulajila du nha vyono wanji wena wuhidimbazi wo wutazi, ho sume kuwumanya u wendo wenyu vyono wa mbeka.

⁹ Hambi anye nha mulimanyile lihewa lyo Mutwa wetu Yesu Kilisito, nha vyono mwene hamba yawe yali yakwizize vyose, ninga yakenoza nha muciwa ku soko yenyu, anye ho mugolipile mu wuciwa wakwe.

¹⁰ Ku soko ye nghani yiyi, ane nghumutyenyi nhavi, yinojeye mwitume zizilya zono mwamula mwekazo. Vyono yo nyenye mwali walongozi kusola nghanzo yo kulamula kwituma nha vivyo.

¹¹ Ale muwukondelezaje u mulimo wuwo, mu nghango ye nyhilu yono mwina nayo yo kulavyo ʼtazi, mwitumaje nha vivyo ko wuhidimbazi, muwukondelezeze mu nghango nha vyono mosuma.

¹² Hono munhu yawe yena mutima wo wutazi, u Mulungu nayo kabocelaga co cose cono u munhu yuyo kosuma kulavya, Mwene si kakanililaga yaye.

¹³ Ninga si munojeye monjelezwe wugaye wenyu, wanji ho wasume kucepulilwa umutegulo wawo wo kulavya wutazi, aa ngʼo, ninga yicinojeye cilanje u mulingʼano wa kose kose hamonga ne lingʼani.

¹⁴ Co cose cono mwina naco cono cicizize, yinojeye cico ciwataze awalya wono wena wanjile, nawo kolo watuga vyono yicizize, ho wamutazenyi nanye mu visakwa vyenyu, na mu nzila yiyo, ho mowa mweza muli mulingʼano.

¹⁵ Nha vyono i Mandiko gakutya, “Mono yakonghola ko winji, hamba siyatuga kuciziliza, nayo mono yakonghola vicefu, hamba si yanjiza.”

Tito ne wayagwe

¹⁶ Nghumulumbo Mulungu mono yamupela Tito i nhumbula yono yina nyhilu nhe yangu yo kumupelenyi wutazi.

¹⁷ Ninga si yalumba ku soko vyono camulomba yanoze nha vivyo, langa sunga no mweneco yali yena nyhilu muno yo wutazi, sunga yakasuma kulamula mweneco du ho yaze kuko kwenyu.

¹⁸ Alu cikumutumiliza hamonga no ndugu yetu yunji mono u lukumyo lwakwe lutandaye mu makanisa gose ku soko yo wuganula u Luganuzi Luswanu.

¹⁹ Hamonga na zizo, mwene yehagwa ne makanisa gose, ho ciwe jendana nayo lono cikwitumama u witumami wetu wuwuno wo wendo, witumami wono cikwituma so lukumyo lo Muwaha no kulajila wuhile wetu wuswanu, wo kuhila kulavya wutazi.

²⁰ Cikuhila kwilega yunji yalece kucihosa ku soko yo wulanjliizi we vipegwa vyono civilavizye sese.

²¹ Ninga wuhile wetu, cikusaka citume viswanu du hali Muwaha, sunga na hali wanhu nha vivyo.

²² Hamonga ne wandugu zetu wawo, cimutuma no ndugu yetu yunji, mono cakondya kumuwona kali kenji vyono u mwene nayo yena wuhidimbazi wo wutazi, sunga na lulu yena witumbilo wuwaha na nyenye.

²³ Tito yo muyangu, mono cikwituma hamonga u mulimo kusoko yenyu. Ninga kuli za awano wandugu zetu wanji wono vikuzana nawo, awo watumwa ne makanisa no lukumyo lwa Kilisito.

²⁴ Holeka muwalajilaje u wendo wenyu, i makanisa ho gasume kuwona vyono cina lingʼani yo kwilumba so nyenye.