2 Wakolinto 5 - I CILAGANE CIPYA 1991

¹ Hambi nha cimanyile vyono kaya yiyi ya kononze yono cikaye lulu, wo wutya u muwili wetu, kolo yeza yapambulwa u Mulungu nha kocipela kaya yinji kuko ku wulanga, kaya yono yayinoza mweneco yo wikalo we cibitilila, yono si yizenjigwe ne miwoko.

² Hambi mu wikala mu kaya yiyi, nha citamikaga, cikuhila muno muno kuvwikwa mu wikalo wetu wono wuli ku wulanga.

³ Heya yicinojeye civwikwe nha vivyo, ho cize cilece kwima ha mwande yo Mulungu akuno cisina vivwalo.

⁴ Holeka lono cikali cili mu kaya yiyi ya kononze, cikulila vyono cikanyicizwe, ninga si vyono cikuhila kuwuvula u muwili wuwu wono wukufwa, aa, ngʼo, langa cikusulumila ho civwikwe awulya wono si wufwizaga, acilya cono cifwizaga, ho cimelelwe lukulu no wumi.

⁵ U Mulungu mweneco yaciwikaniziza u wukawanizwe wuwo, nayo yacipela u Muhe wakwe wuwe co cipingo ca vyose vyono yaciwiciye.

⁶ Holeka ase cina nhumbula yono yikamile nhondo zose. Kanyhi cimanyile vyono mu wikala mu muwili wuwu du, cikuwa cili kutali no Muwaha.

⁷ Hambi nha cikujendela wihuwilo, hamba si ko wuwone yaye.

⁸ Ninga hamba nha vivyo, cikamile du. Kanyhi cali cende cihame mu wikalo wuwuno wa mu muwili no kuhamila kuli Muwaha.

⁹ Ninga hamba nha vivyo, i mbaha yono yicizize muno, cikuhila cimwendeze, lono cikali cili bahano mono yinze, hamba kuko.

¹⁰ Hambi ase wose nha yowa yicinojeye kwima heʼgoda lyo wulingʼanizi lya Kilisito, u munhu wo wose ho yabocele zono zimunojeye nha vyono genha i metumo gakwe gono yetumaga lono yali yakali yekaye moonze, hono maswanu, hamba mabi.

Uwilamule no Mulungu mu nzila ya Kilisito

¹¹ Ale, ase ciyimanyile soko yo kumogopela u Muwaha, holeka ku soko yiyi cikwihinda kuwakwega wanhu. U Mulungu yacimanyiye lukulu, nane nitumbiye vyono na nyenye nha vivyo mucimanyiye lukulu mu viselinji vyenyu.

¹² Si vyono cikusaka kwiyendeza kuliʼnye, ngʼo, langa cikusaka cimulajilenyi zisoko zetu, zono zikuleka cikwilumbila muli nyenye, ho mutuje soko yo kuwapitula awalya wono wakwiyilumbila vyono wenha u wuwe wawo wa kunze, si nha vyono wenha mu nhumbula.

¹³ Hono ciwe cikwijela nha cina lukwale, ako ko ko Mulungu, na hono ciwe cina mahala gono gatulile, ayo cowa co cambuzi cenyu.

¹⁴ Hambi ase nha citemigwe no wendo wa Kilisito, mono cikwizuka nha vyono u munhu monga du, yafwa ku soko ya wose, nayo yiyo yikulajila nha vyono wose wakuhangana i lifwa lyakwe.

¹⁵ Umwene yafwa ku soko ye wanhu wose, wawalya wono wakuwumipa, ho walece kwiwumipila weneco, langa wawe womi ku soko yo mwene mono yafwa, yakazukulwa ku soko yawo.

¹⁶ Holeka ku wulawa lulu, ase si comumanya munhu wo wose mu nzila ye cimunhumunhu. Hamba yiwe camumanyila Kilisito mu nzila ye cimunhumunhu, ninga alu si nha vivyo kanyhi.

¹⁷ No munhu wo wose hono vilunze na Kilisito, yakuwa ciwumbwa cipya, i ze katali zapuluta, alu zaweza mhya.

¹⁸ Na zizi zose wo mulimo wo Mulungu mweneco kucilamula ase no mweneco mu nzila ya Kilisito, yakawa kucipela nase u mulimo wo kuwanoza wanhu welamule nayo.

¹⁹ Wo wutya, u Mulungu yakuyilamula yinze no mwene mu nzila ya Kilisito, no kuleka kuwawalila wanhu u wubi wawo. Umwene yacipela nghani yo kuwalamula i wanhu no Mwene.

²⁰ Holeka ase cili watumwa so Kilisito, nayo Mulungu mweneco yakucitumamila sese, cimunenenyi anye. Holeka cikumunenenyi ku so Kilisito, mwilamule no Mulungu.

²¹ Kilisito yali yasina wubi, ninga Mulungu yamunoza yawe wubi ku soko yetu, nase mu wilunza nayo, ho cisume kuhanga u wilingʼano wo Mulungu.