2 Wakolinto 3 - I CILAGANE CIPYA 1991

I wetumami we Cilagane Cipya

¹ Alo yiyi yikulajila nha vyono cikwamula kanyhi kwiyilumba co weneco? Hamba cikusaka baluwa zo wulumbwe wetu zizo kwenyu hamba zilawe kwenyu, nhe wanji?

² Ninga anye nyo weneco yo nyenye mono muli baluwa yetu, kanyhi yo baluwa yono nyandikwe mu zinhumbula zetu, ho munhu wo wose yasume kuyiwona no kuyisoma.

³ Kanyhi yili calinze, nha vyono anye muli baluwa ya Kilisito yono yaletwa ne miwoko yetu. Ne baluwa yeneco siyandikwe ko wino aa, ngʼo, langa nyandikwe ko Muhe wo Mulungu mumi, hamba si nyandikwe mu cibanhi ceʼbwe, langa nyandikwe mu zinhumbula ze wanhu.

⁴ Nase cikulonga zizino ku soko yo witumbilo wetu wono cina nawo kuli Mulungu mu nzila ya Kilisito.

⁵ Ninga si vyono ase cosuma kwitumila nghani yinji yo yose mu vilungo vyetu co weneco, langa u wusume wetu wose, wulawaga kuli Mulungu,

⁶ hambi nha yo mweneco du mono yacipela u wusume wo kuwela i wetumami we cilagane Cipya, cono si cilagane co wulajilize wono mwandikwe, langa Cilagane co Muhe. Hambi u wulajilize wono mwandikwe, nha wuletaga yifwa, ningo Muhe, wuwumifyaga.

⁷ U Wulajilize waziza mu mandiko gono gali mandice mu vibanhi vye mabwe. Hamba yiwe u mudumo wayo waweza yifwa, u lukumyo lo Mulungu lukawa lucilile muno muno, sunga ne wana wa Isilayeli hamba siwasuma kwidoma no kuwulanga wusu wa Musa ku soko yo wungʼalale wayo. Na kumbe u wungʼale wuwo wali wa cipango cidodo du. Holeka u witumami wa cico cono caleta lifwa kumbe ciketumilwa mu lukumyo luwaha nha vivyo,

⁸ ale uwitumami wo Muhe wo wina ulukumyo lono lucilile muno muno.

⁹ Holeka hono hawe hali howuli lukumyo mu witumami wuwo wono waleta i ningʼaniza, ale, yili calinze muno, vyono u witumami wulya wono wukuleta u wuvumilwe hali Mulungu, wowa no lukumyo lono lucilile muno muno.

¹⁰ Holeka alu, ulukumyo lono lucilile muno muno lwakondya kusola cilejeho co lukumyo alulya lonolwaza baho ha lulongozi, wono wilumbi wayo luno, wakondya kupuluta.

¹¹ Holeka hono ci cilya cono cali ca cipango cidodo du, cali cino lukumyo lwayo, acilya cono cikalaga cibitilila, cowa cina lulumyo lono lucilile muno muno.

¹² Vyono wo wuwu wo witumbilo wetu, holeka ase cikulonga cisina woga hamba hadodo.

¹³ Kanyhi ase, si cikwituma nha kotya Musa mono yakawa yimunojeye yawufunicize n citambala wusu wakwe, wanhu wa Isilayeli ho walece kuwuwona u wungʼalale wuwulya wono wali weza kufwililicila.

¹⁴ Ninga i mahala gawo gakamufywa. Sunga na lulu, lono cikusomwa i citabu ce Cilagane ce Katali, i cicitizo cico nha cikali cili baho du. Ne cicitizo cico cosuma kuwuswa du, lono munhu yakondya kwilunza na Kilisito.

¹⁵ Heya, sunga ne zuwalili du baha, ho hose lono wukusomwa Wulajilize wa Musa mahala gawo gawezaga magubice.

¹⁶ Ninga i cicitizo cico cosuma kuwuswa, nha vyono gakutya i mandiko kuli za Musa, “Yali yeza kumupitucila Muwaha, ne cicitizo cakwe cikawa kuwuswa.”

¹⁷ Na ahano hono yikutya “U Muwaha,” nha cinji wo wutya, “U Muhe,” na ho hose hono hoyuli u Muhe wo Muwaha, ale baho ho howuli no welecele.

¹⁸ Holeka ase wose mono si cifunicize wusu wetu, ale cikumulajilila lukumyo lo Muwaha kotya nha mwilole, no lukumyo lulo nalo lono lukulawa kuli Muwaha, mono wo Muhe, wucikawanizaga ho cihwane muno muno ne cihwani cakwe, ku so lukumyo lono lucilile.